ນະຄອນຫລວງໂຕກຽວປະກາດເຕືອນນັກຮຽນ ບໍ່ໃຫ້ໃຊ້ AI ຊ່ວຍເຮັດວຽກງານຊ່ວງປິດພາກຮຽນ

ຄະນະກໍາມະການການສຶກສານະຄອນຫລວງໂຕກຽວຂອງຍີ່ປຸ່ນອອກປະກາດຂໍໃຫ້ເຈົ້າໜ້າທີ່ໂຮງຮຽນພາຍໃນເມືອງ ເຕືອນນັກຮຽນບໍ່ໃຫ້ອາໄສ AI ໃນການເຮັດວຽກບ້ານໃນຊ່ວງປິດພາກຮຽນລະດູຮ້ອນ.

ປະກາດດັ່ງກ່າວອອກໃນວັນທີ 13 ມິຖຸນາ ໂດຍໂຮງຮຽນທີ່ໄດ້ຮັບແຈ້ງ ຄືໂຮງຮຽນພາຍໃຕ້ການເບິ່ງແຍງຂອງທາງການທ້ອງຖິ່ນ.

ນອກຈາກນີ້, ຍັງມີການແຈ້ງເຖິງເຈົ້າໜ້າທີ່ໂຮງຮຽນຕ່າງໆ ວ່າບໍ່ຄວນອະນຸຍາດໃຫ້ນັກຮຽນກ່າຍ ຫລື ສົ່ງຄໍາຕອບທີ່ສ້າງຂຶ້ນໂດຍ AI ແລະ ເນັ້ນເຖິງຄວາມຈໍາເປັນຂອງການສຶກສາ ເພື່ອສັ່ງສອນຄວາມສາມາດຂອງນັກຮຽນໃນການຄິດດ້ວຍຕົນເອງ. ອີກທັງຍັງຂໍໃຫ້ເຈົ້າໜ້າທີ່ໂຮງຮຽນສະໜັບສະໜູນໃຫ້ນັກຮຽນຂຽນລາຍງານຕາມສິ່ງທີ່ພວກເຂົາໄດ້ຮັບການສອນໃນຫ້ອງຮຽນ.

ໂດຍປະກາດຍັງລະບຸເຖິງຕົວຢ່າງວຽກບ້ານທີ່ນັກຮຽນອາດອາໄສ AI ເຊັ່ນ: ການຂຽນບັນທຶກປະຈໍາວັນ, ເຮັດລາຍງານ, ການຂຽນໂປຣແກຣມ ຫລື ການສ້າງຮູບຕ່າງໆເຊັ່ນ: ຮູບໂປສເຕີ.

ທັງນີ້, ຄະນະກໍາມະການການສຶກສານະຄອນຫລວງໂຕກຽວກໍາລັງພິຈາລະນາທີ່ຈະອອກປະກາດສະບັບອື່ນເພີ່ມອີກ ເຊິ່ງຈະຖືກຮວບຮວມໄປໃນຂໍ້ພິຈາລະນາຂອງລັດຖະບານກາງສໍາລັບແນວທາງປະຕິບັດດ້ານການສຶກສາທີ່ກໍາລັງຈະມີຂຶ້ນ.

ອ້າງອີງ:

https://www3.nhk.or.jp/nhkworld/en/news/20230615_13/