ລາວ-ສ.ເກົາຫລີ ຮ່ວມລົງນາມແລກປ່ຽນດ້ານແຮງງານໃນຂົງເຂດກະສິກໍາ
ວັນທີ 14 ມິຖຸນາ 2023 ຜ່ານມາ, ທ່ານ ນາງ ໃບຄຳ ຂັດທິຍະ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຮສສ) ພ້ອມດ້ວຍຄະນະເດີນທາງໄປຢ້ຽມຢາມ ແລະ ເຮັດວຽກຢູ່ ສ ເກົາຫຼີ ໄດ້ເຂົ້າພົບປະກັບທ່ານ KIM BYUNG KYOO ຮອງເຈົ້າແຂວງຈີຢອນຊັງນໍາໂດ (Gyeongsangnam-do) ແລະ ເຂົ້າຮ່ວມລົງນາມບົດບັນທຶກຄວາມເຂົ້າໃຈລະຫວ່າງກະຊວງ ຮສສ ແລະ ແຂວງຈີຢອນຊັງນໍາໂດກ່ຽວກັບການຟື້ນຟູການແລກປ່ຽນດ້ານແຮງງານຂົງເຂດກະສິກໍາ.
ທ່ານ ນາງ ອານຸສອນ ຄຳສິງສະຫວັດ ຫົວໜ້າກົມການຈັດຫາງານໄດ້ຮ່ວມລົງນາມບົດບັນທຶກຄວາມເຂົ້າໃຈຮ່ວມກັບເຈົ້າເມືອງ Namhae-County Geochang-County Goseong-County Haman-County ແລະ Sacheon-city ນຳອີກ ໃນໄລຍະຜ່ານມາກົມການຈັດຫາງານໄດ້ລົງນາມບົດບັນທຶກຄວາມເຂົ້າໃຈວ່າດ້ວຍການຈ້າງແຮງງານຕາມລະດູການໃນຮູບແບບແລກປ່ຽນຮ່ວມກັບ ບັນດາເມືອງພາຍໃນແຂວງຈີຢອນຊັງນໍາໂດແລ້ວ 5 ເມືອງ ຄື Changnyeong-Gun MIRYANG-SI UIRYEONG-GUN SANCHEONG-GUN ແລະ Namhae-Gun ພ້ອມນັ້ນ ກົມການຈັດຫາງານ ຮ່ວມກັບພະແນກ ຮສສ ແຂວງ ແລະ ເມືອງປະກາດຮັບສະໝັກ ແລະ ຄັດເລືອກເອົາແຮງງານໄປເຮັດຕາມລະດູການຕາມຈຳນວນ ແລະ ເງື່ອນໄຂຂອງບັນດາເມືອງທີ່ໄດ້ແຈ້ງໃນແຕ່ລະຄັ້ງ ໂດຍໄດ້ຈັດສົ່ງແຮງງານໄປເຮັດວຽກຢູ່ແຂວງ ຈີຢອນຊັງນໍາໂດ ທັງໝົດ 434 ຄົນ ຍິງ 289 ຄົນ ໃນນີ້ຈັດສົ່ງໄປເມືອງ Changnyeong-Gun ເລີ່ມແຕ່ວັນທີ 28 ເມສາ 2022 ເປັນຕົ້ນມາ ມີ 4 ຊຸດ ລວມ 261 ຄົນ ຍິງ 140 ຄົນ ຈັດສົ່ງ ໄປເມືອງ MIRYANG-SI ເລີ່ມແຕ່ວັນທີ 8 ກຸມພາ 2023 ເປັນຕົ້ນມາ 3 ຊຸດ ລວມທັງໝົດ 153 ຄົນ ຍິງ 131 ຄົນ ຈັດສົ່ງໄປເມືອງ UIRYEONG-GUN ເລີ່ມແຕ່ວັນທີ 3 ພຶດສະພາ 2023 ເປັນຕົ້ນມາ ໄດ້ 1 ຊຸດ ມີ 3 ຄົນ ຍິງ 2 ຄົນ ຈັດສົ່ງ ໄປເມືອງ SANCHEONG-GUN ວັນທີ 8 ກຸມພາ 2023 ເປັນຕົ້ນມາ ຈໍານວນ 2 ຊຸດ ມີ 17 ຄົນ ຍິງ 16 ຄົນ.
ນອກນີ້, ທ່ານ ລັດຖະມົນຕີ ຍັງໄດ້ສະເໜີຕໍ່ຝ່າຍ ສ.ເກົາຫຼີ ບາງບັນຫາ ເປັນຕົ້ນແມ່ນ ຊ່ວຍຕິດຕາມການນໍາໃຊ້ແຮງງານຂອງນາຍຈ້າງ ເພື່ອຮັບ ປະກັນໃຫ້ນາຍຈ້າງ ປະຕິບັດນະໂຍບາຍຕໍ່ແຮງງານຕາມກົດໝາຍ ແລະ ລະບຽບການຂອງ ສ.ເກົາຫຼີ ທີ່ໄດ້ກຳນົດ ຊຶ່ງອາດເປັນອີກໜຶ່ງກົນໄກໃນການປ້ອງກັນບໍ່ໃຫ້ແຮງງານໂຕນໜີ; ພ້ອມທັງ ໃຫ້ພິຈາລະນາ ເພີ່ມຈໍານວນໂກຕາ ຈ້າງແຮງງານລາວໃຫ້ຫຼາຍຂຶ້ນກວ່າເກົ່າ ສຳລັບເມືອງທີ່ໄດ້ສະເໜີຈ້າງແຮງງານຈຳນວນໜ້ອຍ ຊຶ່ງມີຄວາມຫຍຸ້ງຍາກໃນການຄັດເລືອກ ແລະ ຈັດສົ່ງ; ພິຈາລະນາ ຄັດເລືອກນາຍຈ້າງ ທີ່ມີເງື່ອນໄຂເໝາະສົມ ເພື່ອໃຫ້ແຮງງານລາວສາມາດເຮັດວຽກໄດ້ສະດວກ ແລະ ໄດ້ຮັບການປົກປ້ອງທີ່ດີ; ແລະ ສະເໜີໃຫ້ບັນດາເມືອງທີ່ໄດ້ລົງນາມບົດບັນທຶກຄວາມເຂົ້າໃຈຮ່ວມກັນ ພິຈາລະນາແບ່ງປັນໂກຕາຈ້າງແຮງງານລາວ ຊຶ່ງກະຊວງແຮງງານ ແລະ ສະຫວັດດີການສັງຄົມ ຈະເອົາໃຈໃສ່ຄັດເລືອກເອົາແຮງງານທີ່ໄດ້ຄຸນນະພາບໃຫ້ຫຼາຍຂຶ້ນ ແລະ ພ້ອມທັງ ກຳນົດມາດຕະການໃນການປ້ອງກັນການໂຕນໜີໃຫ້ຮັດກຸມຫຼາຍຂຶ້ນຕື່ມອີກ.
