“ໂຢໂຄວິດ” ສ້າງສະຖິຕິຄວ້າແຊ້ມລະດັບ ແກຣນສະແລມ ຫລາຍທີ່ສຸດຕະຫລອດການ

ໂນວັກ ໂຢໂຄວິດ ທີ່ຫາກໍສ້າງປະຫວັດສາດດ້ວຍການເປັນນັກເທັນນິດຊາຍ ທີ່ຄວ້າແຊ໋ມລະດັບແກຣນສະແລມ ຫຼາຍທີ່ສຸດໃນໂລກ ຫຼັງຈາກເອົາຊະນະ ຄາດເປີ ຣຸດ ນັກເທັນນິດຈາກນອກແວ ໃນການແຂ່ງຂັນເທັນນິດ ເຟຣນ ໂອເພັນ 2023 ເມື່ອວັນທີ 11 ມິຖຸນາ ຜ່ານມາ ຈາກການຄວ້າແຊ໋ມດັ່ງກ່າວ ຍັງເຮັດໃຫ້ ໂຢໂຄວິດ ກັບຂຶ້ນໄປຄອງມື 1 ຂອງໂລກອີກດ້ວຍ.

ນອກຈາກແຊ໋ມລະດັບແກຣນສະແລມທີ 23 ແລ້ວ ໂຢໂຄວິດ ຄືນັກເທັນນິດຊາຍທີ່ອາຍຸຫຼາຍສຸດ ທີ່ 36 ປີ ທີ່ຄອງແຊ໋ມ ເທັນນິດ ເຟຣນ ໂອເພັນ ແລະ ວ່າກັນວ່າ ແກຣນສະແລມ ທີ 23 ຂອງ ໂນວັກ ໂຢໂຄວິດ ນັ້ນເປັນໄປຕາມຄວາມຄາດໝາຍສຳລັບການສ້າງສະຖິຕິຄວ້າແຊ໋ມລະດັບແກຣນສະແລມ ຫຼາຍທີ່ສຸດໃນບັນດານັກເທັນນິດຊາຍດ້ວຍກັນ ແຕ່ວ່າຈະຊ້າ ຫຼື ໄວເທົ່ານັ້ນ ເພາະມັນພຽງຄັ້ງດຽວ ແລະ ປີໜຶ່ງມີແກຣນສະແລມໃຫ້ຫຼິ້ນ 4 ແກຣນສະແລມ.

ກ່ອນໜ້ານີ້ ໂຢໂຄວິດ ກັບ ຣາຟາເອວ ນາດາວ ມີຈຳນວນເທົ່າກັນທີ່ 22 ແກຣສະແລມ ສ່ວນ ໂຣເຈີ ເຟເດີເຣີ ທີ່ອຳລາວົງການໄປແລ້ວນັ້ນຢຸດທີ່ 20 ແກຣນສະແລມ ເລື່ອງຕົວເລກສະຖິຕິ ຄົງຕ້ອງປ່ອຍໃຫ້ ນາດາວ ກັບ ໂຢໂຄວິດ ຍາດຊີງກັນ. ຫຼັງຈາກຈົບ ເຟຣນ ໂອເພັນ ຫຼ້າສຸດ ໂຢໂຄວິດ ສ້າງສະຖິຕິຂຶ້ນມານຳດ່ຽວ ເພາະ ນາດາວ ໄດ້ຖອນຕົວຈາກການແຂ່ງຂັນ ເນື່ອງຈາກເຂົ້າຮັບການຜ່າຕັດສະໂພກແລ້ວຈະຕ້ອງພັກຢ່າງໜ້ອຍ 5 ເດືອນ.

ນັ້ນເທົ່າກັບວ່າ ໂອກາດກັບມາຫຼິ້ນເທັນນິດອີກຄັ້ງຂອງ ນາດາວ ກໍຄືປີ 2024 ແລະ ເປັນປີທີ່ ນາດາວ ວາງແຜນຈະອຳລາວົງການເທັນນິດອີກດ້ວຍ. ນີ້ເທົ່າກັບເພີ່ມໂອກາດໃຫ້ ໂຢໂຄວິດ ໃນການສ້າງສະຖິຕິ ແກຣນສະແລມຫຼາຍຂຶ້ນໄປອີກເພາະຍັງເຫຼືອອີກ 2 ລາຍການ ວິມເບິນດັນ ທີ່ປະເທດອັງກິດ ແລະ ຢູເອັດ ໂອເພັນ ທີ່ນະຄອນນິວຢອກ ສະຫະລັດອາເມຣິກາ ຖາມວ່າມີໂອກາດຈະບວກເປັນ 24-25 ໄດ້.

ຂໍ້ມູນ-ຮູບພາບ: ໜັງສືພິມສຶກສາ-ກິລາລາຍວັນ