ການທ່ອງທ່ຽວ ປີນພູເຂົາ ກາຍເປັນການທ່ອງທ່ຽວຮູບແບບໃໝ່ຂອງລາວ

ປະຈຸບັນ ການທ່ອງທ່ຽວຢູ່ລາວເຮົາແມ່ນຖືການທ່ອງທ່ຽວທຳມະຊາດ ປະ ຫວັດສາດ ແລະ ວັດທະນະທຳ ແບບປະຊາຊົນມີສ່ວນຮ່ວມ ເຮັດໃຫ້ນັກທ່ອງທ່ຽວຈາກທົ່ວໂລກສົນໃຈແລະເຂົ້າມາສຳຜັດກັບຕົວຈິງຂອງແຫຼ່ງທ່ອງທ່ຽວຢູ່ປະເທດເຮົາເປັນຈຳນວນຫຼາຍ,ສາມາດສ້າງລາຍຮັບທາງດ້ານເສດຖະກິດໄດ້ເປັນກອບເປັນກຳລວມທັງພາກລັດແລະປະຊາຊົນ,
ປະຈຸນີ້ ລັດຖະບານແມ່ນສົ່ງເສີມໃຫ້ກິດຈະກຳການທ່ອງທ່ຽວທາງທຳມະຊາດ ໂດຍສະ ເພາະແມ່ນກິດຈະກຳການທ່ອງທ່ຽວ ພູເຂົາ ກາຍເປັນການ ທ່ອງທ່ຽວຮູບແບບໃໝ່ຂອງລາວເພື່ອດຶງດູດເອົານັກທ່ອງທ່ຽວຕ່າງປະເທດໃຫ້ເຂົ້າມາທ່ຽວລາວຫຼາຍຂື້ນ ເນື່ອງຈາກປະ ເທດລາວພວກເຮົາຍັງມີພູເຂົາທຳມະຊາດທີ່ອຸດົມສົມບູນແລະສວຍງາມຫຼາຍໆບ່ອນທີ່ໜ້າປະທັບໃຈແລະຍັງບໍ່ທັນໄດ້ຄົ້ນຄວ້າດັດແປງພັດທະນາແຕ່ຢ່າງໃດ,

ພາຍຫຼັງການລະບາດຂອງພະຍາດໂຄວິດ-19 ຜ່ອນຄາຍລົງ ກິດຈະກຳການທ່ອງທ່ຽວພູເຂົາກາຍເປັນສິ່ງທີ່ນິຍົມແລະໄດ້ຮັບຄວາມສົນໃຈຈາກນັກທ່ອງທ່ຽວຕ່າງປະເທດເປັນຕົ້ນແມ່ນກິດຈະກຳຍ່າງປ່າ, ທ່ຽວຊົມສັດປ່າ, ຊົມທິວທັດທຳມະຊາດ, ກາງເຕັ່ນນອນ, ຮຽນຮູ້ກ່ຽວກັບພືດພັນນາໆຊະນິດ ແລະ ການແລກປ່ຽນວັດທະນະທຳວິຖີການດຳລົງຊີວິດກັບປະຊາຊົນທ້ອງຖິ່ນແລະອື່ນໆຊຶ່ງໄດ້ປະກອບສ່ວນສຳຄັນໃນການສ້າງແຮງງານສ້າງອາຊີບທີ່ໝັ້ນຄົງ,

ທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງ ຖະແຫຼງຂ່າວ ວັດທະນະທຳ ແລະ ທ່ອງທ່ຽວເວົ້າວ່າ: ການທ່ອງທ່ຽວໃນຮູບແບບນີ້ໃນລາວພວກເຮົາກຳລັງໄດ້ຮັບຄວາມນິຍົມມີ ນັກທ່ອງທ່ຽວຈາກຫຼາຍປະເທດເຂົ້າມາທ່ອງທ່ຽວໂດຍສະເພາະແມ່ນບ້ານໃກ້ເຮືອນຄຽງຊຶ່ງມາແບບເປັນກຸ່ມທ່ອງທ່ຽວ ແລະ ມາທ່ອງທ່ຽວເປັນລາຍບຸກຄົນຈາກປະເທດຕ່າງໆຕື່ມອີກຊຶ່ງເຂົາເຈົ້າມີຄວາມສົນໃຈຫຼາຍຍ້ອນວ່າປະເທດເຮົາຍັງມີພູຜາປ່າດົງທີ່ສວຍງາມແລະຄົງຄວາມອຸດົມສົມບູນຂອງທຳມະຊາດ ແລະ ຍັງມີຫຼາຍແຫ່ງທີບໍ່ທັນໄດ້ພັດທະນາ ສະນັ້ນຈຶ່ງເປັນໂອກາດດີທີ່ພວກເຮົາຈະໄດ້ພັດທະນາໃນຮູບແບບໃໝ່ຂອງການທ່ອງທ່ຽວ,ປະຈຸບັນໄດ້ມີແຜນການແລ້ວ ແລະ ກະຊວງຊັບພະຍາກອນທຳມະຊາດແລະສິ່ງແວດລ້ອມ,ກະຊວງກະສິກຳແລະປ່າໄມ້ໄດ້ເຮັດຜ່ານມາໃນຮູບ ການທ່ອງທ່ຽວແບບອະນຸລັກປ່າສະຫງວນແຫ່ງຊາດໃຫ້ກາຍເປັນການທ່ອງທ່ຽວທີ່ປະຊາຊົນມີສ່ວນຮ່ວມ,ໂດຍສະເພາະແມ່ນຢູ່ນ້ຳກັດ, ຢູ່ປ່າສະຫງວນແຫ່ງຊາດນ້ຳແອດ-ພູເລີຍ, ການທຳລາຍສັດປ່າ ຫຼື ການຕັດໄມ້ທຳລາຍປ່າຫຼຸດລົງ,ເພາະປະຊາຊົນທຸກຄົນມີສ່ວນຮ່ວມເນື່ອງຈາກເຂົາເຈົ້າມີລາຍໄດ້ຈາກການສ້າງກິດຈະກຳການທ່ອງທ່ຽວນີ້,
ສຳລັບກິດຈະກຳການທ່ອງທ່ຽວ ພູເຂົາ ຢູ່ລາວທີ່ໜ້າສົນໃຈໃນປະຈຸບັນແມ່ນ ພູຜາມ່ານໃນເຂດປ່າສະຫງວນພູຫີນປູນ ເມືອງຄູນຄຳ ແຂວງຄຳມ່ວນ ທີ່ນັກທ່ອງທ່ຽວຈະໄດ້ສຳຜັດກັບຄວາມງາມທາງທຳມະຊາດພູຫີນປູນ, ກິດຈະກຳຜະຈົນໄພທີ່ໜ້າຕື່ນເຕັ້ນເຊັ່ນ ການຂີ່ສະລິງ,ໄຕ່ຂົວອູ່,ໄຕ່ຂົວໄຍແມງມຸມທ່ຽວຊົມຄວາມງາມຢູ່ຈຸດສູງສຸດຂອງພູຫີນໜາມໜໍ່ ແລະ ທ່ຽວຊົມສັດປ່ານາໆຊະນິດເປັນຕົ້ນ ນົກຫົວໂລ້ນທີ່ໃກ້ຈະສູນພັນແລະອື່ນໆ ນອກນີ້ຍັງມີພູສູງອີກຫຼາຍແຫ່ງທີ່ສວຍງາມສາມາດມອງເຫັນທິວທັດເປັນບໍລິເວນກວ້າງເຊັ່ນ ຜາເງິນແລະຜາໜາມໄຊ ເມືອງວັງວຽງ ແຂວງວຽງຈັນ,ຈຸດຊົມວິວ ພູຜາແດງ ເມືອງງອຍ ແຂວງຫຼວງພະບາງ, ພູເບ້ຍ ແລ ະພູຫົວຊ້າງ ເມືອງ ອານຸວົງ ແຂວງໄຊສົມບູນ ແລະບ່ອນອື່ນໆ,

ຈະແມ່ນການທ່ອງທ່ຽວໃນຮູບແບບໃດກໍ່ຕາມເພື່ອດຶງດູດແລະສ້າງຄວາມປະທັບໃຈທີ່ດີໃຫ້ນັກທ່ອງທ່ຽວ ກໍ່ຍັງແມ່ນຄວາມເປັນເຈົ້າບ້ານທີ່ດີໃນການຕ້ອນຮັບນັກທ່ອງທ່ຽວເຫຼົ່ານັ້ນດ້ວຍຄວາມຈິງໃຈ, ບໍ່ເອົາປຽບນັກທ່ອງທ່ຽວໃນທຸກຮູບແບບ, ການຮັກສາຄວາມປອດໄພເຮັດໃຫ້ເຂົາເຈົ້າທ່ອງທ່ຽວຢ່າງມີຄວາມສະບາຍໃຈລວມທັງການຮັກສາຄວາມສະອາດຍັງແມ່ນປັດໃຈສຳຄັນໃນການດຶງດູດເອົານັກທ່ອງທ່ຽວຕ່າງປະເທດເຂົ້າມາທ່ຽວລາວໃຫ້ຫຼາຍຂຶ້ນ.

ໂດຍ: ຜາຕຸງ