ຜູ້ນຳຕວກກີຢືນຢັນ ຍັງບໍ່ຮັບຮອງການສະໝັກເຂົ້າເປັນສະມາຊິກໃໝ່ NATO ຂອງສະວີເດັນ ເຖິງວ່າຖືກກົດດັນຈາກປະເທດສະມາຊິກ
ທ່ານ ເຣເຈບ ໄຕຍິບ ແອຣໂດອັນ ປະທານາທິບໍດີຕວກກີຢືນຢັນວ່າ: ທາງການຕວກກີຈະຍັງບໍ່ຮັບຮອງການສະໝັກເຂົ້າເປັນສະມາຊິກໃໝ່ NATO ຂອງສະວີເດັນ ເຖິງວ່າຈະຖືກກົດດັນຈາກປະເທດສະມາຊິກ ຄືອາເມລິກາ ລວມທັງທ່ານ ເຍນ ສໂຕລເຕນເບິກ ເລຂາທິການ NATO ກໍຕາມ.
ຜູ້ນໍາຕວກກີຊີ້ແຈງວ່າ: ທາງການສະວີເດັນຍັງບໍ່ປະຕິບັດຕາມຄໍາຮ້ອງຂໍດ້ານຄວາມໝັ້ນຄົງຕາມທາງການຕວກກີຕ້ອງການ ໂດຍສະເພາະບັນຫາກ່ຽວຂ້ອງກັບກຸ່ມຊາວເຄີດພາຍໃນປະເທດ ເຊິ່ງທາງການຕວກກີເຊື່ອວ່າມີການພົວພັນຕໍ່ເຫດການຄວາມບໍ່ສະຫງົບພາຍໃນຕວກກີມາຢ່າງຍາວນານ.
ສະວີເດັນ ແລະ ຟິນແລນ ໄດ້ສະໝັກເຂົ້າເປັນສະມາຊິກໃໝ່ອົງການ NATO ພ້ອມກັນໃນປີ 2022.
ກ່ອນຟິນແລນຈະໄດ້ເຂົ້າເປັນສະມາຊິກລໍາດັບທີ 31 ຂອງ NATO ຢ່າງເປັນທາງການໃນເດືອນເມສາ 2023 ເນື່ອງຈາກທາງການຕວກກີລິ່ງເຫັນຄວາມພະຍາຍາມຂອງຟິນແລນໃນການປະຕິບັດຕາມຄໍາຮ້ອງຂໍທີ່ຄ້າຍຄືກັນ ຈຶ່ງມີມະຕິຮັບຮອງການສະໝັກເຂົ້າເປັນສະມາຊິກໃໝ່ NATO ຂອງຟິນແລນໂດຍສົມບູນ, ແຕ່ພັດໂຈະການຮັບຮອງດັ່ງກ່າວໃນກໍລະນີຂອງສະວີເດັນ.
NATO ຈຶ່ງພະຍາຍາມຈະເປີດການເຈລະຈາກັບສະວີເດັນ ແລະ ຕວກກີ ເພື່ອຫາທາງອອກໃນບັນຫາສໍາຄັນນີ້ ໂດຍຫວັງວ່າບັນຫາທັງໝົດຈະຫລຸດຜ່ອນລົງກ່ອນກອງປະຊຸມສຸດຍອດຜູ້ນຳ NATO ຈະຈັດຂຶ້ນຢູ່ນະຄອນຫລວງວິລນີອຸສ ຂອງລິທົວເນຍ ລະຫວ່າງວັນທີ 11-12 ກໍລະກົດນີ້.
ໂດຍລັດຖະບານຕວກກີເບິ່ງວ່າ: ທາງການສະວີເດັນຫລຸດຜ່ອນຕໍ່ກຸ່ມຊາວເຄີດພາຍໃນປະເທດຫລາຍເກີນໄປ ທັງຍັງເບິ່ງວ່າຄົນກຸ່ມນີ້ເປັນໄພຄຸກຄາມດ້ານຄວາມໝັ້ນຄົງ ແລະ ອາດມີສ່ວນກ່ຽວຂ້ອງກັບຄວາມພະຍາຍາມໂຄ່ນລົ້ມອໍານາດລັດຖະບານທ່ານ ແອຣໂດອັນ ໃນປີ 2016.
ອ້າງອີງ:
https://www.aljazeera.com/…/turkeys-erdogan-defies…
https://apnews.com/…/sweden-nato-turkey…
https://www.ndtv.com/…/they-have-expectations-but…
