ອົດສະຕຣາລີກຽມຊຸກຍູ້ກົດໝາຍ ຂວາງຣັດເຊຍສ້າງສະຖານທູດໃໝ່ໃກ້ລັດຖະສະພາ ອ້າງວ່າເປັນໄພຄຸກຄາມຄວາມໝັ້ນຄົງ

ວັນທີ 15 ມິຖຸນາ, ທ່ານ ແອນໂທນີ ອັລບາເນຊີ ນາຍົກລັດຖະມົນຕີອົດສະຕຣາລີ ເປີດເຜີຍວ່າ: ລັດຖະບານອົດສະຕຣາລີຈະສະເໜີກົດໝາຍສະບັບໃໝ່ເຂົ້າສູ່ລັດຖະສະພາ ເພື່ອຍົກເລີກສັນຍາເຊົ່າທີ່ດິນຂອງຣັດເຊຍ ທີ່ຢູ່ໃກ້ອາຄານລັດຖະສະພາໃນນະຄອນຫລວງແຄນເບີຣາ ເຊິ່ງຣັດເຊຍວາງແຜນກໍ່ສ້າງເປັນອາຄານສະຖານເອກອັກຄະລັດຖະທູດແຫ່ງໃໝ່ ໂດຍລະບຸເຫດຜົນວ່າເປັນໄພຄຸກຄາມຄວາມໝັ້ນຄົງຂອງປະເທດ.

ປັດຈຸບັນຣັດເຊຍຖືຄອງສັນຍາເຊົ່າທີ່ດິນດັ່ງກ່າວ ຫລັງເຮັດຂໍ້ຕົກລົງກັບ National Capital Authority ເຊິ່ງເປັນໜ່ວຍງານຂອງລັດຖະບານກາງ ມາແຕ່ປີ 2008 ແລະ ໄດ້ຮັບການອະນຸມັດໃຫ້ກໍ່ສ້າງສະຖານທູດແຫ່ງໃໝ່ໃນປີ 2011.

ການເຄື່ອນໄຫວຫລ້າສຸດນີ້ເກີດຂຶ້ນຫລັງສານລັດຖະບານກາງມີຄຳພິພາກສາໃນຄະດີຟ້ອງຮ້ອງກ່ຽວກັບສັນຍາເຊົ່າທີ່ດິນດັ່ງກ່າວ ເຊິ່ງສານຕັດສິນໃຫ້ຄຳສັ່ງຟ້ອງຂັບໄລ່ຂອງ National Capital Authority ບໍ່ຖືກຕ້ອງ ສົ່ງຜົນໃຫ້ລັດຖະບານແຄນເບີຣາຕ້ອງຫັນໄປຊຸກຍູ້ກົດໝາຍສະບັບໃໝ່ເພື່ອຂັດຂວາງການກໍ່ສ້າງ ໂດຍຍຶດເຫດຜົນດ້ານຄວາມໝັ້ນຄົງ.

ສໍາລັບກົດໝາຍໃໝ່ດັ່ງກ່າວ ເຊິ່ງໄດ້ຮັບການສະໜັບສະໜູນຈາກທັງສອງສະພາ ບໍ່ໄດ້ຂັດຂວາງຣັດເຊຍຈາກການມີຖານທາງການທູດໃນອົດສະຕຣາລີ, ແຕ່ສະເພາະການສ້າງສະຖານທູດໃກ້ກັບລັດຖະສະພາເທົ່ານັ້ນ.

ສ່ວນສະຖານເອກອັກຄະລັດຖະທູດຣັດເຊຍໄດ້ປະກາດກ່ອນໜ້ານີ້ວ່າ: ມີຄວາມຕັ້ງໃຈຈະກໍ່ສ້າງສະຖານທູດແຫ່ງໃໝ່ໃຫ້ສໍາເລັດ ເຖິງວ່າຈະຜະເຊີນການຄັດຄ້ານຈາກລັດຖະບານອົດສະຕຣາລີກໍຕາມ.

ອ້າງອີງ:

http://www.reuters.com/…/australia-cancels-lease-new…/

http://www.channelnewsasia.com/…/australia-block…