ຮອງລັດຖະມົນຕີກະຊວງແຜນການ-ການລົງທຶນ ເນັ້ນໃຫ້ແຂວງສະຫວັນນະເຂດ ເອົາໃຈໃສ່ 10 ບັນຫາສຳຄັນ ເພື່ອພັດທະນາເສດຖະກິດ-ສັງຄົມ

ໃນໂອກາດທີ່ ທ່ານ ນາງ ພອນວັນ ອຸທະວົງ ຮອງລັດຖະມົນຕີກະຊວງແຜນການ ແລະ ການລົງທຶນ ໄດ້ເຄື່ອນໄຫວພົບປະໂອ້ລົມຄະນະພັກ-ຄະນະນຳ ແລະ ພະນັກງານຫລັກແຫລ່ງຂອງພະແນກແຜນການ ແລະ ການລົງທຶນແຂວງສະຫວັນນະເຂດ ວັນທີ 13 ມິຖຸນາ 2023, ໂດຍການຕ້ອນຮັບຈາກທ່ານ ຄຳຜຸຍ ສີບຸນ ເຮືອງ ຫົວໜ້າພະແນກແຜນການ ແລະ ການລົງທຶນແຂວງ.

ທ່ານ ຮອງລັດຖະມົນຕີ ມີຄຳເຫັນຊີ້ນຳເພື່ອເຮັດໃຫ້ການຈັດຕັ້ງປະຕິບັດວຽກງານແຜນການ ແລະ ການລົງທຶນ ກໍຄືແຜນພັດທະນາເສດຖະກິດ-ສັງຄົມ ປີ 2023 ຂອງແຂວງສະຫວັນນະເຂດ ມີຜົນສຳເລັດຕາມຈຸດປະສົງ ແລະ ລະດັບຄາດໝາຍ, ພ້ອມທັງເນັ້ນໃຫ້ເອົາໃຈໃສ່ບັນຫາສຳຄັນຄື:

1. ສືບຕໍ່ຄຸ້ມຄອງລາຄາສິນຄ້າ, ອັດຕາເງິນເຟີ້ ແລະ ອັດຕາແລກປ່ຽນ ເຊິ່ງວຽກທີ່ຮີບດ່ວນແມ່ນເລັ່ງໃສ່ຄຸ້ມຄອງເງິນຕາຕ່າງປະເທດໃຫ້ເຂົ້າລະບົບຫລາຍຂຶ້ນ, ຂະຫຍາຍຕົວແທນຮ້ານແລກປ່ຽນທະນາຄານທຸລະກິດໃຫ້ສາມາດ ຕອບສະໜອງຄວາມຕ້ອງການຂອງສັງຄົມ; ເພີ່ມທະວີການລະດົມແຫລ່ງທຶນທີ່ເປັນເງິນຕາຕ່າງ ປະເທດຈາກການລົງທຶນຈາກຕ່າງປະເທດ, ການຊ່ວຍເຫລືອທາງການເພື່ອການພັດທະນາ, ຈາກການທ່ອງທ່ຽວແລະແຫລ່ງອື່ນໆ ໃຫ້ເພີ່ມຂຶ້ນ ເພື່ອດຸນດ່ຽງເງິນຕາ.
2. ສຸມໃສ່ຂະຫຍາຍການຫັນເປັນທັນສະໄໝໃນການເກັບລາຍຮັບ ງົບປະມານໃຫ້ກວ້າງຂວາງ ແລະ ຫລາຍຂຶ້ນ ພ້ອມທັງຂະຫຍາຍຖານ ລາຍຮັບໃໝ່ໃຫ້ມີຄວາມຫລາກຫລາຍ. ໂດຍເນັ້ນໃສ່ການເກັບລາຍຮັບຈາກບໍລິສັດຂະໜາດໃຫຍ່.
3. ສຸມໃສ່ການຜະລິດເພື່ອທົດແທນ ການນຳເຂົ້າໃຫ້ແຂງແຮງກວ່າ ເກົ່າ ໂດຍເລັ່ງໃສ່ພືດ ແລະ ສັດທີ່ມີທ່າແຮງ, ຊຸກຍູ້ການຜະລິດຝຸ່ນ ຊີວະພາບ, ຫົວອາຫານສັດໃຫ້ຫລາຍຂຶ້ນ.
4. ເອົາໃຈໃສ່ໃນການຄຸ້ມຄອງ, ຕິດຕາມ ແລະ ປະເມີນຄືນບັນດາໂຄງການລົງທຶນແຮ່ທົດລອງທີ່ໄດ້ອະນຸມັດໄປແລ້ວ ເພື່ອຫລີກລ້ຽງຜົນກະທົບ ສິ່ງແວດລ້ອມ.
5. ເລັ່ງແກ້ໄຂການປະລະການຮຽນ, ສ້າງເງື່ອນໄຂການເຂົ້າເຖິງໃຫ້ການຮຽນ-ການສອນ, ການແກ້ໄຂແຮງງານ ໄປອອກແຮງງານຢູ່ຕ່າງປະເທດ.
6. ຕັ້ງໜ້າສຸມໃສ່ການປະຕິບັດ 2 ວາລະແຫ່ງຊາດໃນໄລຍະທີ່ຍັງ ເຫລືອໃຫ້ແຂງແຮງກວ່າເກົ່າ.
7. ເພີ່ມທະວີໃນການໂຄສະນາເຜີຍ ແຜ່ນະໂຍບາຍຂອງພັກ-ລັດ, ແຜນ ພັດທະນາເສດຖະກິດ-ສັງຄົມ 6 ເດືອນທ້າຍປີ 2023, 2 ວາລະແຫ່ງຊາດ ແລະນິຕິກຳຕ່າງໆໃຫ້ທຸກພາກສ່ວນເຂົ້າໃຈ ແລະ ຜັນຂະຫຍາຍເປັນອັນລະອຽດເຂົ້າ ສູ່ວຽກງານຕົວຈິງໃຫ້ເປັນຮູບປະທຳ ພ້ອມທັງເພີ່ມທະວີການຊີ້ນຳ-ນໍາພາຂອງຄະນະພັກ-ຄະນະນໍາທຸກຂັ້ນທັງສູນກາງ ແລະ ທ້ອງຖິ່ນ.
8. ໃຫ້ພະແນກແຜນການ ແລະ ການລົງທຶນເອົາໃຈໃສ່ ສ້າງຄວາມເຂັ້ມແຂງດ້ານວິຊາການໃນວຽກງານແຜນການ ແລະ ການລົງທຶນ ໂດຍສະເພາະພະນັກງານຢູ່ຂັ້ນເມືອງ ເພື່ອໃຫ້ກາຍເປັນເສນາທິການໃຫ້ແກ່ຄະນະ ພັກ-ຄະນະນຳຂອງເມືອງໃນການ ພັດທະນາເສດຖະກິດ-ສັງຄົມ.
9. ສືບຕໍ່ການປັບປຸງກົນໄກລະບຽບການລົງທຶນ ແລະການດໍາເນີນທຸລະກິດໃຫ້ມີຄວາມວ່ອງໄວ, ປັບປຸງການບໍລິການໃນການຂົນສົ່ງສິນຄ້າ ແລະໂດຍສານໃຫ້ມີຄວາມສະດວກກວ່າເກົ່າຕິດພັນກັບການໂຄສະນາດຶງດູດນັກທ່ອງທ່ຽວຕ່າງປະເທດໃຫ້ຫລາຍຂຶ້ນ.
10. ເອົາໃຈໃສ່ຈັດຕັ້ງປະຕິບັດບັນດາໂຄງການລົງທຶນຂອງລັດຂອງສະ ຫວັນນະເຂດໄປຕາມແຜນທີ່ສະພາແຫ່ງຊາດ ແລະ ສະພາປະຊາຊົນທ້ອງຖິ່ນໄດ້ຮັບຮອງໃຫ້ມີຜົນສຳເລັດ ແລະ ບັນຫາສຳຄັນອື່ນໆ.