ສະພາແຫ່ງຊາດ ທາບທາມຄວາມໄວ້ວາງໃຈຕໍ່ການນໍາພາລວມ ແລະ ບຸກຄົນ ຂອງຄະນະບໍລິຫານງານພັກ ສະໄໝທີ IV ເພື່ອກວດກາຄືນ ການຊີ້ນໍາ-ນຳພາ
ວັນທີ 13 ມິຖຸນາ 2023 ທີ່ສະພາແຫ່ງຊາດ, ຄະນະບໍລິຫານງານພັກສະພາແຫ່ງຊາດ ໄດ້ດໍາເນີນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກສະພາແຫ່ງຊາດ ສະໄໝທີ IV ເພື່ອທາບທາມຄວາມໄວ້ວາງໃຈຕໍ່ການນໍາພາລວມ ແລະ ບຸກຄົນ ຄະນະບໍລິຫານງານພັກສະພາແຫ່ງຊາດ ກາງສະໄໝ ທີ IV, ເປັນປະທານຂອງສະຫາຍ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ເລຂາຄະນະບໍລິຫານງານພັກສະພາແຫ່ງຊາດ, ປະທານສະພາແຫ່ງຊາດ.
ໃນກອງປະຊຸມ, ສະຫາຍ ໄຊສົມພອນ ພົມວິຫານ ກ່າວວ່າ: ເພື່ອທາບທາມຄວາມໄວ້ວາງໃຈຕໍ່ການນໍາພາລວມ ແລະ ບຸກຄົນຂອງຄະນະບໍລິຫານງານພັກສະພາແຫ່ງຊາດ ກາງສະໄໝທີ IV ໃນສໍາຫລວດກວດກາຄືນ ການຊີ້ນໍາ-ນຳພາ ຂອງຄະນະບໍລິຫານງານພັກສະພາແຫ່ງຊາດ ກາງສະໄໝ ເຊິ່ງຈະໄດ້ຍົກໃຫ້ເຫັນການຊີ້ນໍາ-ນໍາພາ ຂອງອົງຄະນະພັກສະພາແຫ່ງຊາດ ສະໄຫມທີ IV ໃນໄລຍະ 1 ປີກວ່າທີ່ຜ່ານມາ ກໍຄືການປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ, ຍົກໃຫ້ເຫັນດ້ານດີ ແລະ ຜົນສໍາເລັດ ໃນຄວາມຮັບຜິດຊອບໃນການປະຕິບັດໜ້າທີ່ການເມືອງ, ຄວາມຮັບຜິດຊອບໃນການຜັນຂະຫຍາຍບັນດາມະຕິ, ຄໍາສັ່ງ ແລະ ເອກະສານສໍາຄັນຕ່າງໆຂອງພັກ, ການນໍາພາດ້ານການເມືອງ-ແນວຄິດ, ການກໍ່ສ້າງພັກ-ພະນັກງານ, ປັບປຸງກົງຈັກການຈັດຕັ້ງ, ແບບແຜນການນໍາພາ ແລະ ວິທີເຮັດວຽກ, ນໍາພາອົງການຈັດຕັ້ງມະຫາຊົນ, ວຽກງານການເຄື່ອນໄຫວຕ່າງປະເທດ, ວຽກງານກວດກາ ແລະ ປ້ອງກັນພາຍໃນ ແລະ ອື່ນໆ.
ນອກນີ້ ຜູ້ແທນກອງປະຊຸມ ຍັງໄດ້ທາບທາມຄວາມໄວ້ວາງໃຈຕໍ່ການນໍາພາຂອງບຸກຄົນ ໃນຄະນະບໍລິຫານງານພັກສະພາແຫ່ງຊາດ ດ້ານຄຸນທາດການເມືອງ, ຄຸນສົມບັດສິນທໍາປະຕິວັດ, ແບບແຜນດໍາລົງຊີວິດ, ຄວາມຮັບຜິດຊອບຕໍ່ໜ້າທີ່ການເມືອງທີ່ຖືກມອບໝາຍ ແລະ ແບບແຜນນໍາພາ ແລະ ວິທີເຮັດວຽກ. ເພື່ອເຮັດໃຫ້ກອງປະຊຸມທາບທາມຄວາມໄວ້ວາງໃຈຕໍ່ການນໍາພາລວມ ແລະ ບຸກຄົນ ຄະນະບໍລິຫານງານພັກສະພາແຫ່ງຊາດ ກາງສະໄໝ ຄັ້ງນີ້ ດຳເນີນໄປດ້ວຍຜົນສໍາເລັດເປັນຢ່າງດີ, ສາມາດບັນລຸຕາມຈຸດປະສົງຄາດໝາຍທີ່ວາງໄວ້. ພ້ອມນີ້, ປະທານກອງປະຊຸມ ຍັງໄດ້ຮຽກຮ້ອງໃຫ້ບັນດາສະຫາຍຜູ້ແທນກອງປະຊຸມ ຈົ່ງໄດ້ພ້ອມກັນຍົກສູງຄວາມຮັບຜິດຊອບຂອງຕົນ ສຸມໃສ່ຈັດຕັ້ງປະຕິບັດຕາມພາລະບົດບາດ, ສິດ ແລະ ໜ້າທີ່ ຂອງຕົນຢ່າງເຕັມສ່ວນ ເພື່ອເປັນການຍົກສູງບົດບາດການຊີ້ນໍາ-ນໍາພາຂອງ ອົງຄະນະພັກສະພາແຫ່ງຊາດ.
