ຫາລືຮ່ວມກັບຜູ້ປະກອບການທຸລະກິດ ພ້ອມກັນແກ້ໄຂບັນຫາ ສຽງເນືອງນັນທີ່ເກີດຈາກຮ້ານອາຫານຮ້ານກິນດື່ມ ທີ່ສົ່ງສຽງດັງແຮງເກີນກຳນົດ

ວັນທີ 8 ມິຖຸນາ 2023 ຜ່ານມາ, ຫ້ອງການຖະແຫຼງຂ່າວ ວັດທະນະທຳ ແລະ ທ່ອງທ່ຽວ ເມືອງຫາດຊາຍຟອງ ນະຄອນຫຼວງວຽງຈັນ ແລະ ຄະນະກຳມະການເພື່ອແກ້ໄຂບັນຫາປາກົດການຫຍໍ້ທໍ້ທີ່ເກີດຂື້ນຢູ່ໃນຂົງເຂດວັດທະນະທໍາ ທ່ອງທ່ຽວ ຈັດກອງປະຊຸມຄົ້ນຄວ້າຫາລືຮ່ວມກັບຜູ້ປະກອບການທຸລະກິດ ຮ້ານອາຫານ ບັນເທີງ ແລະ ກິນດື່ມ ພາຍໃນເມືອງ ໂດຍການເຂົ້າຮ່ວມຂອງ ທ່ານ ບົວໃສ ລຸນນະວົງສາ ຫົວໜ້າຫ້ອງວ່າການ ເມືອງຫາດຊາຍຟອງ ທ່ານ ຄຳໄພສານ ພີມມະສອນ ຫົວໜ້າຫ້ອງການ ຖະແຫຼງຂ່າວ ວັດທະນະທຳ ແລະ ທ່ອງທ່ຽວ ເມືອງຫາດຊາຍຟອງ ແລະ ຜູ້ປະກອບການ.

ທ່ານ ນາງ ນົງເຍົາ ແກ້ວປະເສີດ ຮອງຫົວໜ້າຫ້ອງການ ຖວທ ເມືອງຫາດຊາຍຟອງ ໄດ້ລາຍງານໃຫ້ຮູ້ຕໍ່ສະພາບການຈັດຕັ້ງປະຕິບັດມາດຕະການ ແລະ ການຄຸ້ມຄອງແກ້ໄຂປາກົດການຫຍໍ້ທໍ້ດ້ານສຽງເນືອງນັນທີ່ມີຜົນກະທົບຕໍ່ສັງຄົມ ໂດຍເຫັນວ່າໃນໄລຍະທີ່ລົງຕິດຕາມກວດກາຜ່ານນັ້ນມາຍັງພົບມີບັນດາປາກົດການຫຍໍ້ທໍ້ທາງດ້ານວັດທະນະທຳ ແລະ ທ່ອງທ່ຽວເກີດຂື້ນເປັນຕົ້ນການປະຕິບັດລະບຽບເປີດ ແລະ ປິດກາຍໂມງເວລາທີ່ກຳນົດໄວ້ ການນຳໃຊ້ເຄື່ອງຂະຫຍາຍສຽງດັງເກີນຂອບເຂດເປັນການລົບກວນເຮືອນໃກ້ຄຽງ ຕໍ່ສະພາບດັ່ງກ່າວກໍ່ໄດ້ມີການເຮັດບົດບັນທຶກກ່າວເຕືອນສຶກສາອົບຮົມຕໍ່ຜູ້ປະກອບການໃຫ້ເປັນເຈົ້າການປະຕິບັດລະບຽບກົດໝາຍໃນເງື່ອນໄຂການຄຸ້ມຄອງ ແລະ ດຳເນີນທຸລະກິດຕາມແນວທາງນະໂຍບາຍ ທີ່ສຳຄັນແມ່ນຮັກສາໄດ້ຮີດຄອງປະເພນີວັດທະນະທຳຂອງຊາດ ພ້ອມດຽວກັນກໍຍັງໄດ້ມີການເຜີຍແຜ່ຂໍ້ຕົກລົງຂອງເຈົ້າຄອງນະຄອນຫຼວງວຽງຈັນ ເລກທີ 620/ຈນວ ວ່າດ້ວຍການຄວບຄຸມສຽງເນືອງນັນຢູ່ນະຄອນຫຼວງວຽງຈັນ ໃຫັກັບບັນດາຜູ້ປະກອບການຮັບຊາບເປັນຕົ້ນໃຫ້ມີມາດຕະການຄວບຄຸມສຽງເນືອງນັນທີ່ມີຜົນກະທົບທາງລົບຕໍ່ການດຳລົງຊີວິດ ຄວາມເປັນລະບຽບຮຽບຮ້ອຍຂອງ, ສຳລັບມາດຕະການຕໍ່ຜູ້ທີ່ລະເມີດນັ້ນຈະໄດ້ສຶກສາອົບຮົມ ກ່າວເຕືອນ ປັບໃໝຕາມລະບຽບ ໃຫ້ປິດກິດຈະການ ຖອນໃບອະນຸຍາດ ແລະ ດຳເນີນຄະດີຕາມກົດໝາຍຕາມກໍລະນີໜັກເບົາ.