ກາຕາຕົກລົງຊື້ເຮືອບິນຮົບ ໄຕ້ຝຸ່ນຂອງອັງກິດ 24 ລຳ
ລັດຖະບານກາຕາເຊັນລົງນາມໃນຂໍ້ຕົກລົງຊື້ເຮືອບິນຮົບ “ຢູໂຣໄຟເຕີ ໄຕ້ຝຸ່ນ” ຈຳນວນ 24 ລຳ ຈາກອັງກິດ. ຖືເປັນການສັ່ງຊື້ອາວຸດຄັ້ງໃຫຍ່ເປັນຄັ້ງທີ 2 ຂອງໂດຮາ, ຂະນະທີ່ກຳລັງເກີດຄວາມຂັດແຍ່ງທາງການທູດຍືດເຍື້ອກັບກຸ່ມປະເທດໃກ້ຄຽງ.
ສຳນັກຂ່າວ AFP ລາຍງານຈາກນະຄອນຫຼວງໂດຮາ ປະເທດກາຕາ ໃນວັນທີ 17 ກັນຍາວ່າ: ທ່ານ ກາຫຼິດ ບິນ ໂມຮຳເໝັດ ອັນອັດຕິຍາ ແລະ ທ່ານ ໄມເຄິລ ຟັລລອນ ລັດຖະມົນຕີປ້ອງກັນປະເທດຂອງກາຕາ ແລະ ອັງກິດ ລົງນາມໃນ “ຖະແຫຼງການສະແດງເຈດຈຳນົງ” ສຳລັບອັງກິດທີ່ຈະຂາຍເຮືອບິນຮົບໄຕ້ຝຸ່ນ ຢູ່ນະຄອນຫຼວງໂດຮາ ໃນວັນທີ 17 ກັນຍາ, ແຕ່ບໍ່ມີການລະບຸມູນຄ່າການຊື້ຂາຍ.
ທ່ານ ຟັລລອນ ກ່າວພາຍຫຼັງການລົງນາມວ່າ: ນີ້ເປັນສັນຍາດ້ານປ້ອງກັນປະເທດໃຫຍ່ຄັ້ງທຳອິດກັບກາຕາ, ໜຶ່ງໃນຫຸ້ນສ່ວນທາງຍຸດທະສາດສຳຄັນຂອງສະຫະລາຊະອານາຈັກ. ຂໍ້ຕົກລົງຈະເປັນພື້ນຖານສຳລັບການຮັດແໜ້ນການຮ່ວມມືດ້ານການທະຫານລະຫວ່າງສອງປະເທດ.
ເດືອນມິຖຸນາປີນີ້, ທາງການອາເມລິກາປະກາດວ່າ: ກາຕາຕົກລົງຊື້ເຮືອບິນຮົບ F-15 ຈາກອາເມລິກາ ໃນມູນຄ່າ 12.000 ລ້ານໂດລາສະຫະລັດ ແລະ ໃນປີ 2016 ກາຕາຕົກລົງຊື້ເຮືອບິນຮົບຣາຟາລຂອງຝຣັ່ງ ຈຳນວນ 24 ລຳ ມູນຄ່າ 6.700 ລ້ານເອີໂຣ.
