ສຳມະນາຄວາມສຳຄັນຂອງໜັງສືໃບລານ ແລະການປົກປັກຮັກສາໃຫ້ຍືນຍົງ

ກອງປະຊຸມສຳມະນາຄວາມສຳຄັນຂອງໜັງສືໃບລານ ແລະການປົກປັກຮັກສາໃຫ້ຍືນຍົງ ໄດ້ຈັດຂື້ນໃນ ວັນທີ 12 ມິຖຸນາ 2023 ທີ່ວັດປ່າຜາໂອ ນະຄອນ ຫຼວງພະບາງ ໂດຍເປັນປະທານຂອງ ສາທຸ ອ່ອນແກ້ວ ກິດຕິພັດໂທ ປະທານອົງການພຸດທະສາດສະໜາສຳພັນລາວ ແຂວງຫຼວງພະບາງ, ມີພະເຖຣານຸເຖຣະ, ພ້ອມດ້ວຍຜູ້ຕາງໜ້າຂະແໜງການກ່ຽວຂ້ອງ, ວິທະຍາກອນ ແລະສຳມະນາກອນເຂົ້າຮ່ວມ. ສາທຸ ອ່ອນແກ້ວ ກິດຕິພັດໂທ ກ່າວເປີດກອງປະຊຸມວວ່າ: ໜັງສືຜູກໃບລານເປັນເອກະສານສຳຄັນ, ເປັນມູນມໍລະດົກທາງພູມປັນຍາອັນຊົງຄຸນຄ່າທີ່ບັນພະບູລຸດ ຂອງເຮົາໄດ້ສັນສ້າງໄວ້ຕັ້ງແຕ່ສະຕະວັດທີ 16 ໃນໄລຍະປີ 1992 ເຖິງ 2002 ໜັງສືຜູກໃບລານຢູ່ບັນດາວັດ ໃນແຂວງຫຼວງພະບາງ ໄດ້ຮັບການສໍາຫຼວດ, ຂຶ້ນທະບຽນ, ທຳຄວາມສະອາດ, ປ່ຽນສາຍໜອງ ແລະປ່ຽນຜ້າໂດຍໂຄງການປົກປັກ ຮັກສາໜັງສືໃບລານລາວຂອງຫໍສະໝຸດແຫ່ງຊາດ ພາຍໃຕ້ການຮ່ວມມືທາງດ້ານວັດທະນະລາວ-ເຢຍລະມັນ ໄດ້ຮັບທຶນສະໜັບສະໜຸນ ລັດຖະບານເຢຍລະມັນ, ແຕ່ມາເຖິງປັດຈຸບັນ ເຫັນວ່າ ໜັງສືໃບລານເຖິງວ່າຈະເກັບໄວ້ໃນຕູ້ ໃນຫີບ ແຕ່ກໍຖືກປ່ອຍປະລະເລີຍ ຂາດການເອົາໃຈໃສ່ເບິ່ງແຍງຢ່າງເປັນປົກກະຕິ ເຮັດໃຫ້ໜັງສືໃບລານຕົກຢູ່ໃນອັນຕະລາຍ ເຊັ່ນ ຖືກນ້ຳ, ຖືກໜູກັດ, ຖືກປວກກິນ ແລະອື່ນໆ ໜັງສືໃບລານທີ່ຢູ່ໃນບາງວັດ ຖືກນໍ້າແຕ່ບໍ່ໄດ້ຮັບການເບິ່ງແຍງ ເຮັດໃຫ້ໃບລານຕິດກັນຈົນໃຊ້ການບໍ່ໄດ້, ຢູ່ບາງວັດ ໜັງສືໃບລານຖືກນ້ຳແລ້ວປ່ອຍໃຫ້ເນົ່າ ແລ້ວເອົາໄປຖິ້ມ. ດ້ວຍເຫດນີ້ ອົງການພຸດທະສາສະໜາສຳພັນລາວແຂວງຫຼວງພະບາງ ຈຶ່ງເຫັນວ່າ ຄວນຈັດການ ສຳມະນາວິຊາການຄັ້ງນີ້ ຈະເຮັດໃຫ້ການມີສ່ວນຮ່ວມຂອງສັງຄົມ ຕໍ່ການອານຸລັກໜັງສືໃບລານ ປະສົບຜົນສຳເລັດຫຼາຍຂື້ນ ທັງມີຄວາມຍືນຍົງ.

ກອງປະຊຊຸມຄັ້ງນີ້ ໄດ້ຮັບທຶນສະໜັບສະໜູນຈາກຫໍສະໝຸດອັງກິດ, ເຊີ່ງຜູ້ເຂົ້າຮ່ວມໄດ້ຮຽນຮູ້ ລັກສະນະສະເພາະຕົວ ຂອງວັດທະນະທຳ, ເອກະສານຕົວຂຽນຂອງລາວ ແລະໄທ, ການອານຸລັກ ແລະການອັດສຳເນົາໜັງສືໃບລານ, ການອານຸລັກໜັງສືໃບລານແບບຊຸມຊົນມີສ່ວນຮ່ວມ ທີ່ວັດສູງເມ້ນ ແຂວງແພຼ່ ປະເທດໄທ, ຄວາມສຳຄັນ ແລະການນຳໃຊ້ເອກະສານໜັງສືໃບລານ, ສະພາບໜັງສືໃບລານໃນປະເທດລາວປັດຈຸບັນ ແລະແນວທາງການອານຸລັກ-ປົກປັກຮັກສາ, ການອານຸລັກ ແລະຟື້ນຟູໜັງສືຄຳພີໃບລານ ທີ່ແຂວງນ່ານປະເທດໄທ ແລະສີ່ງທີ່ຄວນປົກປັກ-ຮັກສາ ໜັງສືໃບລານອັນຂົງຄຸນຄ່າ ຈາກບັນພະຊົນ, ໂດຍມີວິທະຍາກອນຈາກສະຖາບັນອາຊີ-ອາຟະລິກາ ມະຫາວິທະຍາໄລຮຳບວກ ປະເທດເຢຍລະມັນ ພ້ອມດ້ວຍພາກສ່ວນກ່ຽວຂອງຈາກປະເທດໄທ ແລະລາວ ເປັນຜູ້ຂື້ນບັນຍາຍ ທັງມີການສົນທະນາ ແລກປ່ຽນບົດຮຽນຮ່ວມກັນເພື່ອເຮັດໃຫ້ການອານຸລັກໜັງສືໃບລານໄດ້ຮັບຜົນດີໃນຕໍ່ໜ້າ ໂດຍໃຊ້ເວລາ 1 ຈຶ່ງສຳເລັດ.

ຂ່າວ: ອາພຸດເດດ ບຸບຜາ. ພາບ: ອພສ ແຂວງ