ມີທາງດີທາງງາມ ຕ້ອງຮູ້ຮັກສາບົວລະບັດ ໃຫ້ສົມກັບຄຳວ່າ: ລັດກັບປະຊາຊົນຊ່ວຍ ກັນເຮັດ ຊ່ວຍກັນສ້າງສາພັດທະນາໃຫ້ຈະເລີນ

ໂດຍ: ຜາຕຸງ

ພາຍຫລັງທີ່ບໍລິສັດເໝົາປູຢາງ ອັດສະຟ່ານຢຽບແໜ້ນ ເສັ້ນທາງແຕ່ໄຟແດງ ດົງປ່າແຫລບ ຫາ ບ້ານດອນແດງ ເມືອງຈັນທະບູລີ ນະຄອນຫລວງວຽງຈັນ ມີຄວາມຍາວ 720 ແມັດ, ປູຢາງໜາ 5 ຊັງຕີແມັດ, ມູນຄ່າ 2,8 ຕື້ກີບ, ໄດ້ສຳເລັດ ແລະ ເປີດການນຳໃຊ້ແລ້ວ ຫລາຍຄົນທີ່ໄດ້ທຽວໄປທຽວມາກ່າວວ່າມີຄວາມສະດວກສະບາຍຂຶ້ນກ່ວາເກົ່າຫລາຍເພາະເປັນຫົນທາງທີ່ຮາບພຽງດີ ບໍ່ມີບວກບໍ່ມີຂຸມທີ່ສ່ຽງຕໍ່ການເກີດອຸປະຕິເຫດເໝືອນດັ່ງຜ່ານມາ.

ເກືອບເວລາໜຶ່ງເດືອນທີ່ໄດ້ເປີດນຳໃຊ້ເສັ້ນທາງປູຢາງ ອັດສະຟ່ານ ແຕ່ໄຟແດງດົງປາແຫລບ-ບ້ານດອນແດງມານີ້ເຮັດໃຫ້ການສັນຈອນຕາມທາງສາຍນີ້ລົ່ງລຽ່ນຂຶ້ນອີກບາດກ້າວໜຶ່ງ ເປັນເສັ້ນທາງເຊື່ອມຈອດລະຫວ່າງທາງເບຕົງກັບເສັ້ນທາງປູຢາງທີ່ເຂົ້າກັນໄດ້ດີ ແລະ ມັນໄດ້ກາຍ ເປັນໃບໜ້າໃໝ່ໃຫ້ເມືອງຈັນທະບູລີ, ສ້າງຄວາມສະດວກສະບາຍແກ່ຜູ້ໃຊ້ລົດໃຊ້ຖະໜົນໃນເສັ້ນທາງສາຍນີ້.

ພາຍຫລັງເປີດການນຳໃຊ້ມາບໍ່ຮອດເດືອນ, ສັງເກດເຫັນວ່າຕາມຕະແກງເຫລັກອັດຝາທໍ່ລະບາຍນ້ຳຢູ່ສອງຝາກທາງບາງບ່ອນບາງຝາເລີ່ມມີກວດນ້ຳດື່ມ,ຖົງຢາງປລາສະຕິກ, ຕົ້ນໄມ້ໃບຫຍ້າອັດຕັນຫລາຍຂຶ້ນ ໂດຍທີ່ບໍ່ມີຜູ້ໃດຜູ້ຮັບຜິດຊອບເລີຍ ຖ້າຫາກມີການປ່ອຍປະລະເລີຍໄປຄືແນວນີ້ອາດຈະເຮັດໃຫ້ທາງດີກາຍເປັນທາງຂີ້ຮ້າຍເຕັມໄປດ້ວຍບວກດ້ວຍຂຸມໃນອະນາຄົດ. ການທີ່ຈະມອບໝາຍໃຫ້ແຕ່ພະແນກກ່ຽວຂ້ອງລົງກວດກາຕິດຕາມເປັນປະຈຳນັ້ນກໍຫາກໄດ້ແຕ່ມັນເປັນການຍາກຫລາຍເພາະມີທາງຫລາຍເສັ້ນໃນນະຄອນຫລວງວຽງຈັນຢູ່ໃນຄວາມຮັບຜິດຊອບທີ່ຕ້ອງໄດ້ປັບປຸງສ້ອມແປງຍົກລະດັບໃຫ້ດີຂຶ້ນ, ທາງຫລວງແມ່ນຊັບສົມບັດຂອງຊາດດັ່ງນັ້ນຈຶ່ງອີງໃສ່ຜູ້ທີ່ຢູ່ໃກ້ຊິດເປັນຜູ້ດູແລຊ່ວຍ.

ນ້ຳໄຫລ, ໄຟສະຫວ່າງ, ຫົນທາງດີ ເປັນຄຳເວົ້າທີ່ຊ່າງຄ້ອງຈ່ອງກັນ ມັນໝາຍເຖິງຄວາມມັ່ງຄັ່ງເຂັ້ມແຂງທາງດ້ານເສດຖະກິດຂອງບ່ອນນັ້ນໆ ເຊິ່ງທຸກຄົນໄຝ່ຝັນ ແລະ ພະຍາມຊອກຫາມາໃຫ້ໄດ້ ແຕ່ໃນເມື່ອໄດ້ມາແລ້ວຕ້ອງໄດ້ເອົາໃຈໃສ່ບູລະນະປົວແປງ, ປົກປັກຮັກສາໃຫ້ມັນນຳໃຊ້ໄດ້ຍາວນານ ໂດຍການປັກປັກຮັກສານີ້ບໍ່ແມ່ນພາກສ່ວນໃດໜຶ່ງ, ບໍ່ແມ່ນອົງການຈັດຕັ້ງໃດໜຶ່ງເປັນຜູ້ເຮັດ ມັນຫາກແມ່ນໜ້າທີ່ຂອງໝົດທຸກຄົນໂດຍສະເພາະແມ່ນອາໃສປະຊາຊົນຫລາຍສິບຫລາຍຮ້ອຍຄອບຄົວທີ່ຕັ້ງບ້ານເຮືອນຢູ່ລຽບຕາມສອງຝາກທາງເສັ້ນນີ້ຕົ້ນຕໍແມ່ນເຮືອນທີ່ຢູ່ຕິດແຄມທາງນັ້ນລະໃຫ້ເປັນເຈົ້າການສູງ ບໍ່ເຮັດໃຫ້ເສັ້ນທາງເປິະເປື້ອນ ຍິ່ງໄລຍະນີ້ເປັນຍາມຝົນຍິ່ງບໍ່ຄວນເຮັດໃຫ້ທໍ່ນ້ຳສອງຝາກທາງອັດຕັນດ້ວຍຂີ້ເຫຍື້ອເຊັ່ນ: ກວດນ້ຳປລາສະຕິກ, ເສດຖົງຢາງ, ໃບໄມ້ ບໍ່ຄວນມັກງ່າຍຖອກເສດອາຫານລົງໃສຕະແກງຝາອັດທໍ່ລະບາຍນ້ຳ ແລະ ອື່ນໆ ໃຫ້ສົມກັບຄຳວ່າ: ລັດກັບປະຊາຊົນຊ່ວຍ ກັນເຮັດ ຊ່ວຍກັນສ້າງສາພັດທະນາໃຫ້ຈະເລີນ.

ນອກຈາກເສັ້ນທາງແຕ່ໄຟແດງດົງປ່າແຫລບ-ບ້ານດອນແດງ ເມືອງຈັນທະບູລີແລ້ວ ພາຍຫລັງໝົດລະດູຝົນ ພະແນກ ຍທຂ ນະຄອນຫລວງວຽງຈັນຍັງຈຳເປັນຕ້ອງນຳໃຊ້ທຶນບ້ວງງົບປະມານສ້ອມແປງທາງໃນຕົວເມືອງສືບຕໍ່ ປັບປຸງຍົກລະດັບເສັ້ນທາງອີກຫລາຍສາຍໃນ 9 ເມືອງຂອງນະຄອນຫລວງວຽງຈັນ ໃຫ້ດີຂຶ້ນດ້ວຍການປູຢາງເຊື່ອມຕໍ່ທາງເບຕົງ ຫລື ຈາກທາງແດງມາເປັນທາງປູຢາງຕາມແຜນຂອງນະຄອນຫລວງວຽງຈັນ, ເພື່ອເຮັດໃຫ້ການຄົມມະນາຄົມ ມີຄວາມໂລ່ງລ່ຽນດີຂຶ້ນຫລຸດຜ່ອນຄວາມແອອັດ ແລະ ກຽມພ້ອມການເປັນເຈົ້າພາບກອງປະຊຸມອາຊຽນໃນປີ 2024.