ລະເບີດລູກໃຫຍ່! ເອັບປັບເປ້ ຂຽນຈົດໝາຍ ບອກສະໂມສອນວ່າຈະບໍ່ຕໍ່ສັນຍາອອກໄປ

ຄີລຽນ ເອັບປັບເປ້ ກອງໜ້າຂອງ ປາຣີ ແຊັງ-ແຊັກແມັງ ຍື່ນຈົດໝາຍເຖິງຕົ້ນສັງວ່າລາວຈະບໍ່ຂໍໃຊ້ເງື່ອນໄຂຂອງການຕໍ່ອາຍຸສັນຍາໃນປີຫນ້າ ດັ່ງນັ້ນ, ສົ່ງຜົນໃຫ້ມີແນວໂນ້ມສູງທີ່ຈະຍ້າຍອອກຈາກສະໂມສອນໃນລະດູຮ້ອນນີ້, ອີງຕາມການ L’Equipe.

ສື່ຊື່ດັງໃນແດນນ້ຳຫອມເຜີຍວ່າ ດາວເຕະທີມຊາດຝຣັ່ງໄດ້ສົ່ງຈົດໝາຍແຈ້ງຄວາມຕ້ອງການຂອງຕົນເອງໄປໃຫ້ PSG ໄດ້ຮັບຮູ້ແລ້ວວ່າຈະບໍ່ຕໍ່ສັນຍາອອກໄປ. ໂດຍສັນຍາປັດຈຸບັນຈະໝົດອາຍຸໃນປີ 2024.

ນັ້ນໝາຍຄວາມວ່າ ແຊ້ມລີກ 1 ຈະຕ້ອງຊອກຫາວິທີທີ່ຈະຂາຍເຂົາໃນລະດູຮ້ອນນີ້. ຖ້າບໍ່ຢາກເສຍເຂົາໄປແບບຟຣີໆເມື່ອສິ້ນສຸດລະດູການໜ້າ.

ທາງດ້ານ PSG ຊື້ ເອັບປັບເປ້ ມາໃນລາຄາ 180 ລ້ານເອີໂຣ ໃນປີ 2018, ແລະ ພວກເຂົາຫວັງວ່າຈະໄດ້ເງິນຄ່າໂຕຄືນຢ່າງຫນ້ອຍບາງສ່ວນໃນຈຳນວນດັ່ງກ່າວ. ເຊິ່ງໃນເວລານີ້ມີພຽງ ເຣອັລ ມາດຣິດ ທີ່ເປັນຂ່າວຢ່າງຕໍ່ເນື່ອງ ແລະ ສະແດງອອກຢ່າງຊັດເຈນວ່າຕ້ອງການໄດ້ເຂົາມາຮ່ວມທີມ.

ໃນຂະນະດຽວກັນ, ເຣອັລ ມາດຣິດ ທີ່ຫາກໍ່ເສຍ ຄາຣິມ ເບນເຊມ່າ ໄປໃຫ້ ອັລ ອິຕິຮັດ, ເຮັດໃຫ້ພວກເຂົາຕ້ອງຊອກຫາກອງຫນ້າໃຫມ່. ໂດຍນອກຈາກ ເອັບປັບເປ້ ແລ້ວພວກເຂົາເຈົ້າຍັງມີຂ່າວກັບ ໄຄ ຮາແວດ ກອງໜ້າຂອງເຊວຊີໃນເວລານີ້.