ທາບທາມຄວາມໄວ້ວາງໃຈຕໍ່ການນໍາພາລວມ ແລະ ບຸກຄົນ ໃນຄະນະບໍລິຫານງານພັກ ນວ ກາງສະໄໝທີ VII
ວັນທີ 12-15 ມິຖຸນາ 2023, ກອງປະຊຸມຄົບຄະນະກາງສະໄໝຂອງຄະນະບໍລິຫານງານພັກນະຄອນຫລວງວຽງຈັນ (ນວ) ສະໄໝທີ VII ໄດ້ຈັດຂຶ້ນຢູ່ກອງບັນຊາການທະຫານ ນວ, ໂດຍການເຂົ້າຮ່ວມຂອງ ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດ ແລະ ເປັນປະທານຂອງ ສະຫາຍ ອານຸພາບ ຕຸນາລົມ ຄະນະເລຂາທິການສູນກາງພັກ ເລຂາຄະນະພັກ ປະທານສະພາປະຊາຊົນ ນວ.
ສະຫາຍ ອານຸພາບ ຕຸນາລົມ ໄດ້ກ່າວວ່າ: ຕະຫລອດໄລຍະກາງສະໄໝຜ່ານມາ ຄະນະບໍລິຫານງານພັກ ນວ ໄດ້ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ຄັ້ງທີ VII ຂອງອົງຄະນະພັກ ນວ ດ້ວຍຫລາຍວິທີການຕາມພາລະບົດບາດ, ໜ້າທີ່, ຂອບເຂດສິດຂອງຕົນ ອັນພົ້ນເດັ່ນໄດ້ນຳພາສຶກສາອົບຮົມການເມືອງ-ແນວຄິດພະນັກງານ-ລັດຖະກອນ, ທະຫານ, ຕຳຫລວດ ແລະ ປະຊາຊົນບັນດາເຜົ່າຊາວ ນວ ທີ່ຢູ່ໃນຂອບເຂດຄວາມຮັບຜິດຊອບຂອງຕົນ ໃຫ້ມີຄວາມເຂົ້າໃຈແຈ້ງຕໍ່ແນວທາງນະໂຍບາຍຂອງພັກ, ກົດໝາຍ, ລະບຽບການຕ່າງໆຂອງລັດ; ເອົາໃຈໃສ່ຄຸ້ມຄອງກໍ່ສ້າງ-ບໍາລຸງພະນັກງານຢ່າງຕໍ່ເນື່ອງ, ເຕົ້າໂຮມຄວາມສາມັກຄີພາຍໃນພັກ, ພະນັກງານ-ລັດຖະກອນ, ທະຫານ, ຕຳຫລວດ ແລະ ປະຊາຊົນຊາວ ນວ ໃຫ້ມີຄວາມເປັນປຶກແຜ່ນ ແລະ ປັບປຸງການຈັດຕັ້ງພັກ-ລັດ, ພາຍໃນນະຄອນຫລວງວຽງຈັນ ບັນດາພະແນກການ, ອົງການທຽບເທົ່າ ແລະ ບັນດາເມືອງຢ່າງເປັນລະບົບຄົບຊຸດ ຕໍ່ເນື່ອງ ດ້ວຍຄວາມພະຍາຍາມດັ່ງກ່າວ ນວ ຈຶ່ງມີສະຖຽນລະພາບທາງດ້ານການເມືອງ, ມີຄວາມເປັນລະບຽບຮຽບຮ້ອຍດີ, ປະຊາຊົນມີຄວາມສາມັກຄີປອງດອງ, ມີແນວຄິດອຸ່ນອ່ຽນທຸ່ນທ່ຽງ, ມີຄວາມເຊື່ອໝັ້ນຕໍ່ແນວທາງປ່ຽນແປງໃໝ່ທີ່ມີຫລັກການຂອງພັກ, ປົວແປງ ຍົກລະດັບຊີວິດການເປັນຢູ່ຂອງປະຊາຊົນໃຫ້ດີຂຶ້ນເປັນກ້າວໆດ້ວຍຈິດໃຈເພິ່ງຕົນເອງ ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ບໍລິການຮັບໃຊ້ປະຊາຊົນດ້ວຍຄວາມບໍລິສຸດສັດຊື່ ລະບົບການຈັດຕັ້ງໄດ້ຮັບການປັບປຸງໃຫ້ມີຄວາມໜັກແໜ້ນເຂັ້ມແຂງຂຶ້ນເປັນກ້າວໆ ຖັນແຖວພະນັກງານ-ສະມາຊິກພັກ ມີທັດສະນະຫຼັກໝັ້ນທາງດ້ານການເມືອງໜັກແໜ້ນ ແລະ ສາມາດເຮັດ ຫຼ້ອນໜ້າທີ່ການເມືອງທີ່ຂັ້ນເທິງມອບໝາຍໃຫ້ໃນລະດັບດີສົມຄວນ.
ໂອກາດນີ້, ສະຫາຍ ທອງລຸນ ສີສຸລິດ ໄດ້ມີຄໍາເຫັນຊີ້ນໍາວ່າ: ການທາບທາມຄວາມໄວ້ວາງໃຈຕໍ່ການນໍາພາລວມ ແລະ ບຸກຄົນ ໃນຄະນະບໍລິຫານງານພັກ ນວ ກາງສະໄໝທີ VII ມີຄວາມສໍາຄັນຫລາຍ, ເປັນການເປີດກວ້າງປະຊາທິປະໄຕພາຍໃນພັກ ທັງເປັນໂຕຊີ້ວັດອັນໜຶ່ງຂອງການຊີ້ນໍາ-ນຳພາ ທົ່ວ ນວ ເພື່ອພ້ອມກັນທົບທວນຄືນການນໍາພາ-ຊີ້ນຳຂອງຄະນະບໍລິຫານງານພັກ ນວ. ພ້ອມນັ້ນການລົງຄະແນນສຽງທາບທາມໃຫ້ເອົາໃຈໃສ່ຫລີກເວັ້ນແນວຄິດອັກຄະຕິຕໍ່ບຸກຄົນ, ການພົວພັນສ່ວນຕົວ ໃຫ້ລົງເລິກປະກອບຄຳເຫັນໃນຄະນະພັກດ້ວຍຄວາມຈິງໃຈ ເພື່ອຊ່ວຍປັບປຸງກໍ່ສ້າງພະນັກງານນຳພາ-ຄຸ້ມຄອງຂັ້ນຂອງຕົນ ແລະ ເຊື່ອໝັ້ນວ່າ ບັນດາສະຫາຍ ຜູ້ແທນກອງປະຊຸມຈະໃຊ້ສິດຂອງຕົນຢ່າງຖືກຕ້ອງ ແລະ ມີຄວາມຮັບຜິດຊອບສູງຕໍ່ພັກຕໍ່ການ ຈັດຕັ້ງ ແລະ ຕໍ່ຜົນປະໂຫຍດລວມຂອງພັກ ຂອງປະຊາຊົນ.
