ກຳລັງເສີມສຳຄັນ! ແມນຢູ ບໍ່ມີແຜນ ປ່ອຍໂຕ ລິນເດລອຟ ອອກຈາກທີມ

ແມນເຊັສເຕີ ຢູໄນເຕັດ ທີມດັງແຫ່ງ ພຣີເມຍລີກອັງກິດ ບໍ່ມີແຜນການທີ່ຈະປ່ອຍໂຕ ວິກຕໍ ລິນເດລອຟ ກອງຫລັງຊາວສະວີເດນອອກຈາກທີມໃນລະດູຮ້ອນນີ້.

ກອງຫລັງໄວ 28 ປີ ກາຍເປັນຕົວສຳຮອງຂອງ ຣາຟາເອລ ວາຣານ ແລະ ລິຊານໂດຣ ມາຕິນເນສ ເມື່ອລະດູການທີ່ຜ່ານມາ. ລວມເຖິງຜີສາດແດງຍັງມີຂ່າວຕິດພັນກັບ Kim Min-Jae ກອງຫລັງຊາວເກົາຫລີໃຕ້ຂອງ ນາໂປລີ ໃນລະດູຮ້ອນນີ້.

ຢ່າງໃດກໍ່ຕາມ ເຖິງວ່າມີຂ່າວວ່າ ໄອທັດ ແຟຣງເຟີດ, ແອັດເລຕິໂກ ມາດຣິດ ແລະ ອິນເຕີ ມິລານ ຕ້ອງການດຶງຕົວກອງຫລັງຄົນນີ້ໄປຮ່ວມທີມກໍ່ຕາມ, ແຕ່ ຟາບຣິຊິໂອ ໂຣມາໂນ ສື່ຊື່ດັງຂອງວົງການບານເຕະ ອອກມາເປີດເຜີຍວ່າ ເອຣິກ ເທນຮາກ ຜູ້ຈັດການທີມຂອງ ຢູໄນເຕັດ ຕ້ອງການຈະຮັກສາໄວ້ໃນລະດູການໜ້າ. ແລະ ໄດ້ແຈ້ງໃຫ້ສະໂມສອນຮູ້ວ່ານີ້ແມ່ນນັກເຕະທີ່ຫ້າມຂາຍ.

ທັງນີ້ ລິນເດລອຟ ກໍາລັງເຂົ້າສູ່ສັນຍາປີສຸດທ້າຍຂອງລາວກັບ ແມນເຊັສເຕີ ຢູໄນເຕັດ.