ການແກ້ໄຂຄວາມທຸກຍາກຂອງປະຊາຊົນ ຢູ່ແຂວງອັດຕະປື ມີຜົນສໍາເລັດຫລາຍດ້ານ ເຊິ່ງມີຄອບຄົວພົ້ນທຸກ 18.962 ຄອບຄົວ
ທ່ານ ທະນູໄຊ ບັນຊາລິດ ຄະນະປະຈໍາພັກແຂວງ ຮອງເຈົ້າແຂວງອັດຕະປື ໄດ້ລາຍງານຕໍ່ກອງປະຊຸມຄົບຄະນະບໍລິຫານງານພັກແຂວງ ກາງສະໄໝທີ XI ເມື່ອບໍ່ດົນມານີ້ ວ່າ: ໃນໄລຍະ 2 ປີເຄິ່ງຜ່ານມາຄະນະບໍລິຫານງານພັກແຂວງອັດຕະປື ໄດ້ສຸມໃສ່ຈັດຕັັ້ງປະຕິບັດຄໍາສັ່ງ ຂອງກົມການເມືອງສູນກາງພັກ ວ່າດ້ວຍການເພີ່ມທະວີການນໍາພາ-ຊີ້ນໍາ ຕໍ່ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ ໂດຍການລົງຊຸກຍູ້ ແລະ ຕິດຕາມການຈັດຕັັ້ງປະຕິບັດວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ຊຶ່ງໄດ້ຮັບຮອງເອົາຈຸດສຸມໜອງຫີນເຂົ້າເປັນຈຸດສຸມພັດທະນາຊົນນະບົດ ແລະ ລຶບລ້າງຄວາມທຸກຍາກ ຂອງແຂວງປະກອບ ມີ 4 ບ້ານ ຄື: ບ້ານໄຊດອນໂຂງ, ໜອງຫີນ, ໜອງມ່ວງ-ມັດກາ, ຮັບຮອງເອົາຈຸດສຸມສົ້ມປ່ອຍ ເຂົ້າເປັນຈຸດສຸມຈັດສັນພູມລໍາເນົາ ແລະ ບ່ອນທໍາມາຫາກິນໃຫ້ປະຊາຊົນ ປະກອບ ມີ 7 ບ້ານ ຄື: ບ້ານສົ້ມປ່ອຍ, ຫາດອຸດົມໄຊ, ຕະເງົາ, ນໍ້າກົງ, ຫາດຊາຍສູງ, ຄັນໝາກນາວ ແລະ ບ້ານບຸ່ງແກ້ວ, ຮັບຮອງເອົາຈຸດສຸມຫີນລາດ ເຂົ້າເປັນຈຸດສຸມ ຈັດສັນພູມລໍາເນົາ ແລະ ບ່ອນທໍາມາຫາກິນໃຫ້ປະຊາຊົນ ປະກອບ ມີ 7 ບ້ານຄື: ບ້ານຫີນລາດ, ບ້ານໃໝ່, ບ້ານທ່າຫີນ, ບ້ານທ່າແສງຈັນ, ບ້ານທ່າສະໜອງໃຕ້, ບ້ານຕະມໍຢອດ ແລະ ບ້ານປິນດົງ, ຮັບຮອງເອົາຈຸດສຸມສະແຄະ ເມືອງໄຊເສດຖາ ເປັນຈຸດສຸມຕົວແບບໃນພັດທະນາຂອງແຂວງ ໄລຍະປີ 2021-2025 ມີ 3 ບ້ານຄື: ບ້ານສະແຄະ, ບ້ານຫາດສະຕີ ແລະ ບ້ານທ່າລານ, ສ່ວນວຽກງານການປະເມີນຜົນຄວາມທຸກຍາກ ແລະ ການພັດທະນາ ຕາມດໍາລັດ 348/ລບ ໃນທົົ່ວແຂວງ ມີ 5 ເມືອງ, ມີ 141 ບ້ານ, ມີ 30.707 ຄອບຄົວ, ພົນລະເມືອງ 147.564 ຄົນ, ຍິງ 74.378 ຄົນ, ໃນນັ້ນ ຄອບຄົວທຸກຍາກ ຍັງເຫລືອ 11.745 ຄອບຄົວ, ຄອບຄົວພົ້ນທຸກ ມີ 18.962 ຄອບຄົວ, ຄອບຄົວພັດທະນາ ມີ 7.530 ຄອບຄົວ, ບ້ານທຸກຍາກ ຍັງເຫລືອ 77 ບ້ານ, ບ້ານພົ້ນທຸກ ມີ 64 ບ້ານ, ເມືອງພົ້ນທຸກມີ 2 ເມືອງ.
ມາຮອດປັດຈຸບັນທົົ່ວແຂວງ ມີ 59 ກຸ່ມ, ໃນນັັ້ນ ກຸ່ມ ປູກຝັງ ມີ 23 ກຸ່ມ, ກຸ່ມລ້ຽງສັດ ມີ 15 ກຸ່ມ, ກຸ່ມບໍລິການກົນຈັກ 2 ກຸ່ມ, ກຸ່ມຂະຫຍາຍພັນເຂົ້າ 18 ກຸ່ມ ແລະ ກຸ່ມປຸງແຕ່ງເຫລົ້າຂາວ 1 ກຸ່ມ, ມີ 1 ສະຫະກອນ ຄື: ສະຫະກອນສະໜາມໄຊ ຊຶ່ງໄດ້ອອກໃບອະນຸຍາດ ແລະ ໃບທະບຽນວິສາຫະກິດລວມໝູ່.
ການສ້າງຄອບຄົວຕົວແບບໃນທົົ່ວແຂວງມີ 7 ບ້ານ, ມີ 97 ຄອບຄົວ, ໃນນີ້ ຄອບຄົວຕົວແບບດ້ານການປູກຝັງມີ 30 ຄອບຄົວ, ຄອບຄົວຕົວແບບດ້ານການລ້ຽງສັດມີ 53 ຄອບຄົວ.
ຂ່າວ-ພາບ: ແຂວງອັດຕະປື
