ໂກນບານລາວ ເສຍ ໄທ 0-2 ປະຕູ ໄດ້ຫຼຽນເງິນ ຄ້ອງຄໍ ໃນອາຊຽນ ພາຣາເກມ 2023

ສາວນັກກິລາໂກນບານຄົນພິການທີມຊາດລາວ ໄດ້ພຽງຫຼຽນເງິນ ຄ້ອງຄໍ ໃນການແຂ່ງຂັນກິລາໂກນບານຍິງ ງານກິລາຄົນພິການອາຊຽນ ຄັ້ງທີ 12 ຫຼື ອາຊຽນພາຣາເກມ ທີ່ຣາຊະອານາຈັກກຳປູເຈຍ ເປັນເຈົ້າພາບ ຫຼັງເສຍໃຫ້ ສາວໂກນບານໄທ 0-2 ປະຕູ ສົ່ງຜົນໃຫ້ ໄທ ໄດ້ຫຼຽນຄຳ ສ່ວນ ຫຼຽນທອງ ເປັນຂອງ ນັກກິລາໂກນບານ ມາເລເຊຍ.

ການແຂ່ງຂັນນັດຊີງຊະນະເລີດ ຫຼື ຮອບຊີງຫຼຽນຄຳ ງານກິລາໂກນບານຍິງ ອາຊຽນພາຣາເກມ 2023 ໄດ້ມີຂຶ້ນ ໃນຕອນບ່າຍວັນທີ 8 ມິຖຸນາ 2023 ທີ່ສະໜາມກິລາໂອແລມປິກ ຄອມເພັກ ອິນດໍສະເຕດ້ຽມ ກາງນະຄອນຫຼວງ ພະນົມເປັນ ຣາຊະອານາຈັກກຳປູເຈຍ ໃຫ້ກຽດເຂົ້!ຮ່ວມຊົມ ແລະ ເຊຍໂດຍທ່ານ ບົວແກ້ວ ພູມວົງໄຊ ເອກອັກຄະລັດຖະທູດລາວ ປະຈຳກຳປູເຈຍ, ທ່ານ ປອ. ນາງ ດາລາວອນ ກິດຕິພັນ ຫົວໜ້າຫ້ອງການ ກະຊວງສຶກສາທິການ ແລະ ກິລາ ຫຼື ສສກ ທັງເປັນຮອງປະທານຄະນະກຳມະການພາຣາແລມປິກແຫ່ງຊາດລາວ ແລະ ທ່ານ ວິລະວັນ ບຸນສຸກໄທ ຫົວໜ້າກົມກິລາມວນຊົນ, ພະລະ ແລະ ສິລະປະສຶກສາ ສສກ ທັງເປັນຮອງປະທານ ແລະ ເລຂາທິການ ຄພລ, ຫົວໜ້າຄະນະນຳພານັກກິລາຄົນພິການລາວ ພ້ອມດ້ວຍຄະນະ ແລະ ບັນດາກອງເຊຍຊາວລາວ.

ການແຂ່ງຂັນກິລາໂກນບານຍິງ ອາຊຽນພາຣາເກມ ປີນີ້ ມີການຊີງໄຊທັງໝົດ 2 ຫຼຽນຄຳ ຈາກປະເພດທີມຍິງ ແລະ ທີມຊາຍ ທັງສອງລາຍການດັ່ງກ່າວ ກຳນົດເວລາແຂ່ງຂັນ ຕັ້ງລະ 12 ນາທີ ແຂ່ງຂັນ 2 ຕັ້ງ ທຸກໆທີ່ບານອອກຂ້າງ ເວລາຈະຢຸດການແຂ່ງຂັນທັນທີ່ ສຳລັບ ສປປ ລາວ ແມ່ນໄດ້ສົ່ງພຽງປະເພດທີມຍິງເຂົ້າຮ່ວມແຂ່ງຂັນ ປະກອບມີນັກກິລາຈາກ 5 ຊາດເຂົ້າຮ່ວມ ການແຂ່ງຂັນແມ່ນພົບກັນໝົດຄັດເລືອກເອົາທີມທີ່ມີຄະແນນດີທີ່ສຸດອັນດັບທີ 1 ໄປພົບກັບ ອັຍດັບທີ 4 ແລະ ອັນດັບທີ 2 ພົບອັນດັບທີ 3 ໂດຍ 5 ຊາດເຂົ້າຮ່ວມ ປະກອບມີ ລາວ, ໄທ, ມາເລເຊຍ, ອິນໂດເນເຊຍ ແລະ ຟິລິບປິນ.