ຕົກລົງກຳນົດຂອບເຂດປ່າປ້ອງກັນແຫ່ງຊາດ ຊາຍແດນ ລາວ-ໄທ-ກໍາປູເຈຍ ມີເນື້ອທີ່ຫລາຍກວ່າ 1 ແສນ ເຮັກຕາ

ວັນທີ 5 ມິຖຸນາ 2023 ຜ່ານມາ, ພະແນກຄຸ້ມຄອງປ່າປ້ອງກັນ, ກົມປ່າໄມ້ ກະຊວງກະ ສິກຳ ແລະ ປ່າໄມ້ ໄດ້ສົມທົບກັບພະແນກກະສິກຳ ແລະ ປ່າໄມ້ແຂວງຈຳປາສັກ ຈັດກອງປະຊຸມປືກສາຫາລື ລາຍງານຜົນການລົງເກັບກຳຂໍ້ມູນ ທົບທວນຄືນຂອບເຂດເນື້ອທີ່ປ່າປ້ອງກັນແຫ່ງຊາດ ຊາຍແດນ ລາວ-ໄທ ແລະ ກຳປູເຈຍ  ແລະ ປ່າປ້ອງກກັນແຫ່ງຊາດ ຍອດນ້ຳພູພຽງບໍລິເວນ ທີ່ນອນຢູ່ໃນຂອບເຂດແຂວງຈຳປາສັກ. ໂດຍ ເປັນປະທານຂອງ ທ່ານ ສີຮອງ ຄໍາສະເດັດ ຮອງຫົວໜ້າພະແນກກະສິກໍາ ແລະ ປ່າໄມ້, ເຊິ່ງມີ ທ່ານ ບຸນຊູ ໂສວັນ ຮອງຫົວໜ້າພະແນກຄຸ້ມຄອງປ່າປ້ອງ ກັນ, ກົມປ່າໄມ້, ກະຊວງກະສິກໍາ  ແລະ ປ່າໄມ້ ພ້ອມດ້ວຍວິຊາການ.

ຈຸດປະສົງຂອງການປະຊຸມຄັ້ງນີ້: ເພື່ອລາຍງານຜົນການລົງເກັບກຳຂໍ້ມຸນ ການທົບທວນຄືນຂອບເຂດ, ເນື້ອທີ່ປ່າປ້ອງກັນແຫ່ງຊາດ ຊາຍແດນ ລາວ-ໄທ-ກຳປູເຈຍ ແລະ ປ່າປ້ອງກັນຍອດນ້ຳພູພຽງບໍລິເວນ ເພື່ອຄວາມເປັນເອກະພາບຂອງທ້ອງຖີ່ນດ້ານຂອບເຂດເນື້ອທີ່ການເພີ່ມ ຫຼື ຫຼຸດເນື້ອທີ່ດິນປ່າໄມ້ ແລະ ການຕັດເນື້ອທີ່ດິນນາ, ເນື້ອທີ່ດິນທຳການຜະລິດອອກ ເພື່ຶອໃຫ້ສອດຄ່ອງກັບກົດໝາຍວ່າດ້ວຍທີ່ດິນ ສະບັບເລກທີ 70/ສພຊ, ລົງວັນທີ 21 ມີຖຸນາ 2019 ເພື່ອສະເໜີທ່ານເຈົ້າແຂວງອອກຂໍ້ຕົກລົງ ວ່າດ້ວຍການກໍານົດຂອບເຂດ, ການຄຸ້ມຄອງ, ປົກປັກຮັກສາ ແລະ ນຳໃຊ້ປ່າປ້ອງກັນແຫ່ງຊາດ ກ້າວໄປສູ່ການສະເໜີດຳ ລັດສ້າງຕັ້ງປ່າປ້ອງກັນແຫ່ງຊາດ ຊາຍແດນ ລາວ-ໄທ-ກຳປູເຈຍ  ແລະ ປ່າປ້ອງກັນແຫ່ງຊາດຍອດນ້ຳພູພຽງບໍລິເວນ ຕາມຂັ້ນຕອນ.

ໃນຕອນທ້າຍຂອງກອງປະຊຸມ ທ່ານປະທານໄດ້ສະຫຼຸບເນື້ອໃນກອງປະຊຸມ ແລະ ມີຄໍາເຫັນດັ່ງນີ້:

1. ເຫັນດີເປັນເອກະພາບດ້ານ ຂອບເຂດ, ເນື້ຶອທີ່ດິນ ແລະ ຕັດເນື້ອທີ່ນາເຟືອງ, ເນື້ອທີ່ທໍາການຜະລິດຂອງປະຊາຊົນ ແລະ ຂອບເຂດເນື້ອທີ່ຂອງບ້ານອອກ;
2. ເຫັນດີເປັນເອກະພາບ ດ້ານຂອບເຂດ, ເນື້ອທີ່ດິນປ່າປ້ອງກັນແຫ່ງຊາດ ຍອດນໍ້າພູພຽງບໍລິເວນ ທີ່ກຳນົດໃໝ່ ເນື້ອທີ່ທັງໝົດ 201.277 ເຮັກຕາ, ຊຶ່ງກວມເອົາເມືອງປາກຊ່ອງ ເນື້ອທີ່ 187.448 ເຮັກຕາ ແລະ ເມືອງບາຈຽງຈະເລີນສຸກ ເນື້ອ ທີ່ 13.829 ເຮັກຕາ ທີ່ນອນໃນເຂດຄຸ້ມຄອງຂອງແຂວງຈໍາປາສັກ;
3. ເຫັນດີເປັນເອກະພາບ ດ້ານຂອບເຂດ, ເນື້ອທີ່ປ່າປ້ອງກັນແຫ່ງຊາດ ຊາຍ ແດນ ລາວ-ໄທ-ກໍາປູເຈຍ ທີ່ກຳນົດໃໝ່ ທີ່ຢູ່ໃນເຂດຄຸ້ມຄອງຂອງແຂວງຈໍາປາສັກ ມີເນື້ອທີ່ທັງໝົດ 134.325 ເຮັກຕາ, ໃນນັ້ນໄດ້ກວມເອົາ 04 ເມືອງຄື: 1.) ເມືອງມູນລະປະໂມກ ເນື້ອທີ່ 97.198 ເຮັກຕາ, 2.) ເມືອງສຸຂຸມາ ເນື້ອທີ່ 19.286 ເຮັກຕາ, 3.) ເມືອງຈໍາປາສັກ ເນື້ອທີ່ 7.543 ເຮັກຕາ, 4.) ເມືອງໂພນທອງ 10.298 ເຮັກຕາ.
4. ມອບໃຫ້ ພະແນກກະສິກຳ ແລະ ປ່າໄມ້ ເປັນເຈົ້າການສົບທົບກັບພະແນກຊັບ ພະຍາກອນທຳມະຊາດ ແລະ ສິ່ງແວດລ້ອມ ກະກຽມບົດລາຍງານການນຳແຂວງ ແລະ ສະເໜີທ່ານເຈົ້າແຂວງ ອອກຂໍ້ຕົກລົງ ວ່າດ້ວຍການກໍານົດຂອບເຂດ, ການຄຸ້ມຄອງປົກປັກຮັກສາ ແລະ ນໍາໃຊ້ປ່າປ້ອງກັນແຫ່ງຊາດ ຊາຍແດນ ລາວ-ໄທ-ກຳ ປູເຈຍ ແລະ ປ່າປ້ອງກັນແຫ່ງຊາດ ຍອດນ້ຳພູພຽງບໍລິເວນສະບັບໃໝ່ ເພື່ອເປັນບ່ອນອີງໃນການຈັດຕັ້ງປະຕິບັດ.