ພາກລັດ ແລະ ພາກທຸລະກິດທ່ອງທ່ຽວ ກະກຽມເປີດບັ້ນໂຄສະນາປີທ່ອງທ່ຽວລາວ 2024 ເພື່ອດຶງດູດນັກທ່ອງທ່ຽວເຂົ້າມາ ສປປ ລາວ ນັບມື້ເພີ່ມຂຶ້ນ
ກົມໂຄສະນາການທ່ອງທ່ຽວ ແລະ ກົມພັດທະນາການທ່ອງທ່ຽວ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ຈັດກອງປະຊຸມວິຊາການ ເພື່ອປຶກສາຫາລືການກະກຽມເປີດບັ້ນໂຄສະນາປີທ່ອງທ່ຽວລາວ 2024 ຂຶ້ນໃນວັນທີ 8 ມິຖຸນາ 2023 ທີ່ນະຄອນຫລວງວຽງຈັນ, ໃນຮູບແບບເຊິ່ງໜ້າ ແລະ ທາງໄກ (ໂດຍການສະໜັບສະໜູນຈາກ ໂຄງການພັດທະນາໂຄງລ່າງພື້ນຖານ ເພື່ອສົ່ງເສີມການທ່ອງທ່ຽວ ໄລຍະ 2 ADB) ພາຍໃຕ້ການເປັນປະທານຮ່ວມຂອງ ທ່ານ ຄົມ ດວງຈັນທາ ຫົວໜ້າກົມໂຄສະນາການທ່ອງທ່ຽວ, ທ່ານ ນາງ ພອນມະລີ ອິນທະພົມ ຫົວໜ້າກົມພັດທະນາການທ່ອງທ່ຽວ, ປະທານເຄືອຂ່າຍພັດທະນາສົ່ງເສີມ ແລະ ຄຸ້ມຄອງຈຸດໝາຍປາຍທາງການທ່ອງທ່ຽວ ຂັ້ນສູນກາງ.
ທ່ານ ຫົວໜ້າກົມໂຄສະນາການທ່ອງທ່ຽວ ໃຫ້ຮູ້ວ່າ: ກອງປະຊຸມວິຊາການປຶກສາຫາລືກ່ຽວກັບການກະກຽມໃຫ້ແກ່ການເປີດບັ້ນໂຄສະນາປີທ່ອງທ່ຽວລາວ 2024 ເປັນກອງປະຊຸມໜຶ່ງທີ່ມີຄວາມສຳຄັນຂອງຂະແໜງການທ່ອງທ່ຽວລາວ ເພື່ອເປີດກວ້າງລະດົມແນວຄວາມຄິດຂອງທຸກພາກສ່ວນໃນການສົ່ງເສີມ, ໂຄສະນາຜະລິດຕະພັນທ່ອງທ່ຽວທີ່ເປັນທ່າແຮງ, ສົ່ງເສີມກິດຈະກໍາທີ່ເປັນທ່າແຮງຂອງແຕ່ລະທ້ອງຖິ່ນ ແລະ ບຸນປະເພນີອັນດີງາມຂອງປະຊາຊົນລາວບັນດາເຜົ່າໃນທົ່ວປະເທດ ເພື່ອກຳນົດກິດຈະກຳບັນຈຸເຂົ້າໃນປະຕິທິນປີທ່ອງທ່ຽວລາວ 2024 ໃຫ້ມີຂະບວນການຟົດຟື້ນ. ພ້ອມນີ້, ຍັງເປັນການເປີດໂອກາດໃຫ້ແກ່ຜູ້ເຂົ້າຮ່ວມທັງພາກລັດ, ພາກທຸລະກິດທ່ອງທ່ຽວ ແລະ ທ້ອງຖິ່ນ ໄດ້ສົ່ງເສີມຜະລິດຕະພັນທ່ອງທ່ຽວ ທີ່ມີຢູ່ແລ້ວໃຫ້ຂະຫຍາຍຫລາຍຂຶ້ນ ແລະ ທ່າແຮງບົ່ມຊ້ອນດ້ານການທ່ອງທ່ຽວທີ່ມີຢູ່ໃນທ້ອງຖິ່ນຂອງຕົນ ເພື່ອສະເໜີເຂົ້າໃນລາຍການທ່ອງທ່ຽວ, ສ້າງລາຍການທ່ອງທ່ຽວໃຫ້ມີຄວາມຫລາກຫລາຍ ແລະ ນຳໃຊ້ເສັ້ນທາງລົດໄຟລາວ-ຈີນ ທີ່ເປັນທ່າແຮງສຳຄັນເຂົ້າໃນວຽກງານທ່ອງທ່ຽວໃຫ້ມີປະສິດທິພາບ ແລະ ປະສິດທິຜົນ ເພື່ອເປັນການດຶງດູດນັກທ່ອງທ່ຽວພາຍໃນ ແລະ ສາກົນ ເຂົ້າມາທ່ອງ ທ່ຽວໃນ ສປປ ລາວ ນັບມື້ເພີ່ມຂຶ້ນ.
ໂອກາດນີ້, ທ່ານ ນາງ ພອນມະລີ ອິນທະພົມ ໃຫ້ຮູ້ກ່ຽວກັບທ່າອ່ຽງຂອງການທ່ອງທ່ຽວປີ 2023 ເຊິ່ງເປັນການທ່ອງທ່ຽວແບບຍືນຍົງ ທັງນີ້ ກໍເພື່ອໃຫ້ບັນດາຜູ້ເຂົ້າຮ່ວມໄດ້ຮ່ວມກັນກຳນົດບັນດາໜ້າວຽກສໍາລັບການໂຄສະນາການທ່ອງທ່ຽວລາວ ໃນປີ 2024 ຄືແນວໃດ, ຈະດຶງຈຸດຂາຍທີ່ເປັນເອກະລັກຂອງແຕ່ລະທ້ອງຖິ່ນມາໂຄສະນາດ້ວຍຮູບແບບໃດ. ຂະນະທີ່ ປີ 2023 ຜ່ານມາ ເຫັນໄດ້ວ່າ: ນັກທ່ອງທ່ຽວ ປະມານ 65% ຈະຮູ້ສຶກດີຂຶ້ນເມື່ອເຂົ້າພັກໂຮງແຮມ ທີ່ໄດ້ຮັບການຢັ້ງຢືນ ແລະ ມີກາໝາຍຄວາມຍືນຍົງ, ນັກທ່ອງທ່ຽວ 59% ມີຄວາມຕັ້ງໃຈທີ່ຈະເລືອກ ຜະລິດຕະພັນ ການທ່ອງທ່ຽວແບບຍືນຍົງ ແລະ ເປັນມິດຕໍ່ສິ່ງແວດລ້ອມ, ນັກທ່ອງທ່ຽວ 65% ຄິດວ່າການປົກປ້ອງສິ່ງແວດລ້ອມທາງທຳມະຊາດ ເປັນຮູບແບບການເດີນທາງທີ່ຍືນຍົງ ແລະ 43% ຂອງນັກທ່ອງທ່ຽວ ເລືອກກິດຈະກຳ ແລະ ລາຍການ ທ່ອງທ່ຽວ ທີ່ສົ່ງເສີມເສດຖະກິດທ້ອງຖິ່ນ.
