5 ເດືອນ ຜ່ານມາ ສປປ ລາວ ມີຜູ້ຕິດເຊື້ອພະຍາດໄຂ້ຍຸງລາຍແລ້ວ 3.478 ຄົນ
ອີງຕາມຂໍ້ມູນຈາກສູນຂ່າວສານການແພດສຸຂະສຶກສາ ກະຊວງສາທາລະນະສຸກໃຫ້ຮູ້ໃນວັນທີ 7 ມິຖຸນາ 2023 ຜ່ານມາວ່າ: ທົ່ວປະເທດ ມີຜູ້ຕິດເຊື້ອພະຍາດໄຂ້ຍຸງລາຍ ສະສົມແລ້ວ 3.685 ກໍລະນີ (5 ເດືອນ ຕົ້ນປີ 2023) ໃນນັ້ນ, ແຂວງອຸດົມໄຊເປັນອັນດັບໜຶ່ງ ທີ່ມີຜູ້ປ່ວຍໄຂ້ຍຸງລາຍຫຼາຍເຖິງ 713 ກໍລະນີ, ຮອງລົງມາແມ່ນແຂວງຄໍາມ່ວນ 594 ກໍລະນີ, ນະຄອນຫຼວງວຽງຈັນ 338 ກໍລະນີ ແລະ ແຂວງອື່ນໆ, ສະເພາະແຂວງຫົວພັນຍັງບໍ່ພົບກໍລະນີຜູ້ປ່ວຍໄຂ້ຍຸງລາຍເທື່ອ. ປັດຈຸບັນ, ຍອດຜູ້ຕິດເຊື້ອພະຍາດໄຂ້ຍຸງລາຍໃນທົ່ວປະເທດ ຍັງເພີ່ມຂຶ້ນຢ່າງຕໍ່ເນື່ອງ ແລະ ເຫັນວ່າການລະບາດຂອງພະຍາດໄຂ້ຍຸງລາຍ ຍັງບໍ່ມີທີທ່າວ່າຈະຫຼຸດລົງ, ແຕ່ຍັງບໍ່ທັນມີກໍລະນີເສຍຊີວິດ ຍ້ອນໄຂ້ຍຸງລາຍເທື່ອ.
ເພື່ອຫຼຸດຜ່ອນ ແລະ ຢຸດການຕິດເຊື້ອພະຍາດໄຂ້ຍຸງລາຍ, ກະຊວງສາທະລະນະສຸກໃຫ້ຮູ້ວ່າ: ທຸກຄົນຕ້ອງເອົາໃຈໃສ່ກໍາຈັດແຫຼ່ງເພາະພັນຍຸງລາຍໃຫ້ໝົດ, ເຊິ່ງມີຫຼາຍວິທີຄວນດໍາເນີນການ, ກ່ອນຍັງບໍ່ທັນເປັນໜອນນໍ້າ ທໍາລາຍແຫຼ່ງນໍ້າຂັງພາຍໃນເຮືອນ ແລະ ນອກເຮືອນ ທີ່ເປັນແຫຼ່ງກໍາເນີດຂອງຍຸງ, ພ້ອມອະນາໄມພາຊະນະທີ່ໃຊ້, ພຽງເທົ່ານີ້ຍຸງລາຍກໍຈະໝົດໄປ ແລະ ຄອບຄົວກໍຈະມີຄວາມປອດໄພ ຈາກການຕິດເຊື້ອດັ່ງກ່າວ.
