ນະຄອນຫລວງວຽງຈັນປັບຫລຸດລາຄາຊີ້ນໝູ
ພະແນກອຸດສາຫະກຳ ແລະ ການຄ້າ ນະຄອນຫລວງວຽງຈັນ, ໄດ້ອອກແຈ້ງການເຖິງຜູ້ດຳເນີນທຸລະກິດການຜະລິດຜູ້ຊື້-ຜູ້ຂາຍຊີ້ນໝູໃຫ້ປະຕິບັດລາຄາຂາຍຍົກ-ຂາຍຍ່ອຍຊີ້ນໝູດັ່ງນີ້: ລາຄາໝູເປັນໜ້າຟາມຊື້-ຂາຍບໍ່ໃຫ້ເກີນ 18 ພັນກີບຕໍ່ກິໂລ, ລາຄາຂາຍຍົກໝູທັງຕົວທີ່ໄດ້ຂ້າຄົວ ແລະ ເປັນຊີ້ນລວມຂາຍສູງສຸດບໍ່ໃຫ້ເກີນ 21 ພັນກີບຕໍ່ກິໂລ ແລະ ສຳລັບລາຄາຂາຍຍ່ອຍໃຫ້ຜູ້ບໍລິໂພກຢູ່ຕະຫລາດ: ຊີ້ນໝູປະເພດໜຶ່ງ (ຊີ້ນກ້ອນ, ດູກຂ້າງ, ຊີ້ນສາມຊັ້ນ) ສູງສຸດ 33 ພັນກີບຕໍ່ກິໂລ ແລະ ຊີ້ນໝູປະເພດສອງລາຄາສູງສຸດບໍ່ໃຫ້ເກີນ 30 ພັນກີບຕໍ່ກິໂລ, ໃນຂະນະທີ່ກ່ອນໜ້ານີ້, ຊີ້ນໝູປະເພດ 1 ຢູ່ໃນລາຄາ 35-40 ພັນກີບຕໍ່ກິໂລ. ຕາມດຳລັດວ່າດ້ວຍການຄຸ້ມຄອງລາຄາສິນຄ້າ ແລະ ຄ່າບໍລິການ ແລະ ອີງຕາມຄຳເຫັນດີເປັນເອກະພາບຂອງກອງປະຊຸມກ່ຽວກັບລາຄາຂາຍຍົກ-ຂາຍຍ່ອຍຊີ້ນໝູ ແລະ ແຈ້ງການຂອງກະຊວງອຸດສາຫະກຳ ແລະ ການຄ້າ ວ່າດ້ວຍການກຳນົດໂຄງປະກອບລາຄາສິນຄ້າຄວບຄຸມ ເພື່ອແນໃສ່ຊຸກຍູ້ສົ່ງເສີມຜູ້ດຳເນີນທຸລະກິດການຜະລິດ ແລະ ການປົກປ້ອງສິດຜົນປະໂຫຍດຜູ້ຊົມໃຊ້ ໃຫ້ມີຄວາມຍຸຕິທຳ ບົນພື້ນຖານກົນໄກຕະຫລາດຫລີກລ່ຽງການເອົາລັດເອົາປຽບກັນລະຫວ່າງຜູ້ຊື້ ແລະ ຜູ້ຂາຍ ທັງຮັບປະກັນໃຫ້ສັງຄົມມີຄວາມສະຫງົບ.
