ຜູ້ວ່າການທະນາຄານແຫ່ງ ສປປ ລາວ ຕ້ອນຮັບຄະນະປະເມີນເສດຖະກິດມະຫາພາກຂອງອົງການຄົ້ນຄວ້າເສດຖະກິດມະຫາພາກອາຊຽນ+3 (AMRO)
June 8, 2023 - 3:39 PM
ວັນທີ 1 ມິຖຸນາ 2023 ຜ່ານມາ, ທີ່ ທະນາຄານແຫ່ງ ສປປ ລາວ, ທ່ານ ບຸນເຫຼືອ ສິນໄຊວໍຣະວົງ, ຜູ້ວ່າການທະນາຄານແຫ່ງ ສປປ ລາວ (ທຫລ) ພ້ອມດ້ວຍຄະນະກົມພາຍໃນ ທຫລ ໄດ້ຮັບຕ້ອນ ທ່ານ Dr. Li Kouqing ຫົວໜ້າອົງການຄົ້ນຄວ້າເສດຖະກິດມະຫາພາກອາຊຽນ+3 ພ້ອມດ້ວຍຄະນະ ໃນໂອກາດທີ່ເດີນທາງມາເຮັດວຽກປະເມີນ ແລະ ຕິດຕາມສະພາບເສດຖະກິດມະຫາພາກຂອງ ສປປ ລາວ ປະຈໍາປີ 2023.
ເຊິ່ງຈຸດປະສົງຫຼັກໃນການເຂົ້າພົບປະການນໍາ ທຫລ ໃນຄັ້ງນີ້ ແມ່ນເປັນການແນະນໍາຕົວ, ລາຍງານຄວາມຄືບໜ້າຂອງວຽກງານອາຊຽນ+3 ແລະ ວຽກງານອົງການຄົ້ນຄວ້າເສດຖະກິດມະຫາພາກອາຊຽນ+3 ແລະ ລາຍງານໜ້າວຽກຕ່າງໆທີ່ຄະນະໄດ້ມີການເຄື່ອນໄຫວໃນ ສປປ ລາວ ໃນໄລຍະການມາເຮັດວຽກ.
ການພົບປະດັ່ງກ່າວແມ່ນແນໃສ່ການຮ່ວມມື-ປະສານງານທີ່ດີ, ແລະ ໄດ້ມີການແລກປ່ຽນຄໍາຄິດຄໍາເຫັນຕໍ່ໂອກາດ ແລະ ສິ່ງທ້າທາຍທີ່ ສປປ ລາວ ກຳລັງພົບພໍ້ໃນປະຈຸບັນ ແລະ ສະແດງຄວາມຂອບໃຈຕໍ່ຄວາມເປັນຫ່ວງເປັນໃຍຂອງຄະນະຄົ້ນຄວ້າເສດຖະກິດມະຫາພາກອາຊຽນ+3. ພ້ອມນີ້, ກໍໄດ້ແຈ້ງໃຫ້ທາງຄະນະຊາບວ່າ ລັດຖະບານແມ່ນຮັບຊາບຕໍ່ກັບບັນຫາດັ່ງກ່າວ ແລະ ກໍາລັງສຸມໃສ່ແກ້ໄຂບັນຫາດ້ວຍຫຼາກຫຼາຍມາດຕະການ. ໃນຕອນທ້າຍຂອງການພົບປະ ທ່ານຜູ້ວ່າການ ທຫລ ໄດ້ອວຍພອນໃຫ້ການມາເຮັດວຽກຢູ່ ສປປ ລາວ ຂອງຄະນະຄົ້ນຄວ້າເສດຖະກິດມະຫາພາກອາຊຽນ+3 ໃນຄັ້ງນີ້ ດໍາເນີນໄປດ້ວຍຄວາມລ່ຽນໄຫຼ ແລະ ປະສົບຜົນສໍາເລັດຕາມລະດັບຄາດໝາຍທີ່ກຳນົດໄວ້.
ພາບຂ່າວ: ກົມຮ່ວມມືສາກົນ ທຫລ.
