ຣຽວ ມາດຣິດ ບັນລຸຂໍ້ຕົກລົງຄວ້າ ຈູດ ເບລລິງແຮມ ຄ່າຕົວ 100 ລ້ານຢູໂຣ

ຣຽວ ມາດຣິດ ບັນລຸຂໍ້ຕົກລົງໃນການຄວ້າ ຈູດ ເບລລິງແຮມ ກອງກາງພອນສະຫວັນ ໂບຣຸສເຊຍ ດອດມຸນ ດ້ວຍຄ່າຕົວ 100 ລ້ານຢູໂຣ ຍັງບໍ່ລວມເງິນສ່ວນເສີມອີກ.

ກ່ອນໜ້ານີ້ມີລາຍງານວ່າ ຣຽວ ມາດຣິດ ບັນລຸຂໍ້ຕົກສ່ວນຕົວກັບ ເບລລິງແຮມ ໄດ້ແລ້ວຕັ້ງແຕ່ເດືອນເມສາ ໂດຍເຫລືອພຽງການເປີດສາກເຈລະຈາຢ່າງເປັນທາງການກັບ ດອດມຸນ ເລື່ອງຄ່າຕົວຂອງນັກເຕະເທົ່ານັ້ນ.

ຫລ້າສຸດ ຟາບຣີຊີໂອ ໂຣມາໂນ ນັກຂ່າວຄົນດັງຢືນຢັນວ່າ ຣຽວ ມາດຣິດ ບັນລຸຂໍ້ຕົກລົງແບບເຕັມຮູບແບບໃນການເຊັນສັນຍາກັບ ເບລລິງແຮມ ມາຮ່ວມທີມດ້ວຍຄ່າຕົວທີ່ 100 ລ້ານຢູໂຣ ບວກກັບເງິນສ່ວນເສີມໃຫ້ກັບ ດອດມຸນ ອີກ 20 ລ້ານຢູໂຣ.

ໂດຍ ເບລລິງແຮມ ຈະເຊັນສັນຍາກັບ ຣຽວ ມາດຣິດ 6 ປີ ຫລື ເຖິງປີ 2029 ເຊິ່ງນັກເຕະຈະເດີນທາງໄປກວດຮ່າງກາຍທີ່ປະເທດສະເປນໃນສອງສາມມື້ຂ້າງໜ້ານີ້ ເຊິ່ງ ຣຽວ ມາດຣິດ ຕ້ອງການໃຫ້ການຊື້ຂາຍດັ່ງກ່າວສຳເລັດພາຍໃນອາທິດນີ້.

ສຳລັບ ເບລລິງແຮມ ສ້າງຜົນງານໄດ້ຢ່າງສຸດຍອດກັບ ດອດມຸນ ລວມເຖິງທີມຊາດອັງກິດໃນບານໂລກ 2022 ທີ່ຜ່ານມາ ເຮັດໃຫ້ມີຂ່າວວ່າຫລາຍທີມຕ້ອງເຊັນສັນຍາລາວໄປຮ່ວມທີມ ທັງ ລີເວີພູລ, ແມນເຊສເຕີ ຊິຕີ ແລະ ແມນເຊສເຕີ ຢູໄນເຕັດ ແຕ່ສຸດທ້າຍແລ້ວນັກເຕະເລືອກທີ່ຈະຍ້າຍມາຢູ່ກັບ ຣຽວ ມາດຣິດ.