ການຖິ້ມຂີ້ເຫຍື້ອຊະຊາຍ ເປັນບັນຫາທີ່ຍັງແພ່ຫລາຍໃນສັງຄົມລາວ
ໂດຍ: ພູຊ້າງນ້ອຍ
ການຮັກສາຄວາມສະອາດພາຍໃນສຳນັກງານງານ, ອົງການ, ບໍລິສັດ, ຫ້າງຮ້ານ ຕະຫລອດຮອດທັງເຮືອນຊານບ້ານຊ່ອງຂອງປະຊາຊົນແຕ່ລະຄຸ້ມບ້ານນັ້ນແມ່ນມີຄວາມສຳຄັນຫລາຍ, ນອກຈາກເປັນການຮັກສາສະພາບແວດລ້ອມທີ່ດີແລ້ວຍັງເປັນການຮັກສາອະນາໄມໃຫ້ຫ່າງຈາກພະຍາດໂລຄານຳອີກ ຜ່ານມາທຸກພາກສ່ວນໃນສັງຄົມເປັນເຈົ້າການຈັດຕັ້ງປະຕິບັດໄດ້ດີຕະຫລອດມາ.
ການເກັບມ້ຽນຂີ້ເຫຍື້ອຢູ່ໃນຕົວເມືອງສັງເກດເຫັນວ່າປະຕິບັດໄດ້ດີ ເພາະມີພາກສ່ວນກ່ຽວຂ້ອງໂດຍສະເພາະແມ່ນອົງການພັດທະນາຕົວເມືອງ ແລະ ຜູ້ປະກອບການທຸລະກິດບໍລິການໄດ້ນຳໃຊ້ພາຫະນະເຖິງວ່າບໍ່ທັນສະໄໝປານໃດ ແຕ່ກໍເປັນເງື່ອນໄຂທີ່ດີໃນການເກັບມ້ຽນຂີ້ເຫຍື້ອໄດ້ວ່ອງໄວແລ້ວເອົາໄປຖິ້ມຖືກບ່ອນຖືກທີ່ ເຮັດໃຫ້ຂີ້ເຫຍື້ອ ຫລື ສິ່ງເສດເຫລືອຈາກການນຳໃຊ້ຂອງສັງຄົມບໍ່ຮົກເຮື້ອຕາມອາຄານບ້ານເຮືອນ.
ປັດຈຸບັນແມ່ນຢູ່ໃນໄລຍະລະດູຝົນ ການເກັບມ້ຽນຂີ້ເຫຍື້ອຂອງພາກສ່ວນກ່ຽວຂ້ອງກໍອາດຊັກຊ້າບໍ່ຕົງໂມງບໍ່ຕົງມື້ແດ່ ກໍຫາກມີເປັນບາງຄັ້ງຄາວ ຍ້ອນສະພາບຝົນຕົກ, ພາຫະນະເປ່ເພ ຫລື ອາດເປັນຍ້ອນການສ້າງຂີ້ເຫຍື້ອຈາກສັງຄົມຫລາຍຂຶ້ນກໍເປັນໄດ້, ແຕ່ສິ່ງທີ່ຢາກເວົ້າເຖິງນີ້ແມ່ນການນຳເອົາຂີ້ເຫຍື້ອ ແລະ ສິ່ງເສດເຫລືອຈາກຄົວເຮືອນ, ຫ້ອງການ, ສຳນັກງານອອກມາປະໄວ້ຂ້າງນອກ ເພື່ອລໍຖ້າໃຫ້ລົດເກັບມ້ຽນຂີ້ເຫຍື້ອມາຂົນເອົາໄປຖິ້ມ ເຫັນຫລາຍຄົນຍັງປະຕິບັດບໍ່ທັນໄດ້ດີເທົ່າທີ່ຄວນ ຊຶ່ງເຫັນໄດ້ຈາກເຈົ້າຂອງເຮືອນບາງຄົນຍັງບໍ່ທັນສາມາດແຍກສິ່ງເສດເຫລືອນັ້ນອອກຢ່າງລະອຽດຍັງຖິ້ມສັບປົນຄົນເລໃສ່ນຳກັນທັງເປັນຂີ້ເຫຍື້ອມີນ້ຳຂັງອັນກໍ່ໃຫ້ເກີດນ້ຳເນົ່າເໝັນ, ບາງພາກສ່ວນພັດນຳເອົາອອກມາປະໄວ້ກ່ອນກຳນົດທີ່ລົດເກັບມ້ຽນຈະມາເຖິງເປັນເວລາຫລາຍມື້ໂດຍທີ່ບໍ່ມ້ຽນມັດອັດໃຫ້ລະອຽດຖີ່ຖ້ວນ, ເວລາຝົນຕົກລົງມາກໍຈະເຮັດໃຫ້ນ້ຳຂັງຢູ່ຂີ້ເຫຍື້ອສ້າງກິ່ນເໝັນໃຫ້ສັງຄົມບໍລິເວນໃກ້ຄຽງ ທັງສ້າງຄວາມຫຍຸ້ງຍາກເປິເປື້ອນກວ່າທີ່ຄວນໃຫ້ພະນັກງານເກັບມ້ຽນຂີ້ເຫຍື້ອ.
ເຫດການເຊັ່ນນີ້ມີໃຫ້ເຫັນຢ່າງຫລວງຫລາຍ ໂດຍທີ່ເຈົ້າຂອງຖົງຂີ້ເຫຍື້ອຂາດຄວາມຮັບຜິດຮັບຊອບຢ່າງຈິງຈັງ ໄດ້ນຳເອົາຖົງຂີ້ເຫຍື້ອມາປະໄວ້ກ່ອນກຳນົດຫລາຍວັນໂດຍທີ່ບໍ່ຮັບປະກັນ, ເມື່ອນ້ຳຝົນຮຳໃສ່ເຮັດໃຫ້ຂີ້ເຫຍື້ອເນົ່າເປື່ອຍ, ຍິ່ງໄປກວ່ານັ້ນພັດມີສັດໄປກັດໄປແຫ້ນເຮັດໃຫ້ຖົງຂາດ ຂີ້ເຫຍື້ອຟົ້ງກະຈາຍໄປທົ່ວບໍລິເວນ ສ້າງຄວາມລຳຄານ, ສົ່ງກິ່ນເໝັນກາຍເປັນມົນລະພິດທາງອາກາດ ແລະ ມີຜົນສະທ້ອນເຖິງລະບົບທາງເດີນຫາຍໃຈຂອງຄົນຢູ່ຂົງເຂດນັ້ນ, ສ່ວນລົດທີ່ເອີ້ນງ່າຍໆສັ້ນໆວ່າລົດອະນາໄມກໍເຊັ່ນດຽວກັນ ມີບາງຄັ້ງກໍສວຍໂອກາດບໍ່ມາເກັບມ້ຽນຕາມກຳນົດ ປະໄວ້ຫລາຍມື້ຈຶ່ງມາບາດດຽວແຕ່ເມື່ອມາແລ້ວພັດເກັບໄປບໍ່ໝົດປະໃຫ້ສົ່ງກິ່ນເນົ່າເໜັນຢູ່ຕໍ່ໄປຈົນຮອດຮອບວຽນໃໝ່ຈຶ່ງມາແນວນີ້ກໍຫາກມີ, ເຈົ້າຖິ້ມໃສ່ຂ້ອຍ, ຂ້ອຍຖິ້ມໃສ່ເຈົ້າ ໂດຍທີ່ຕ່າງຝ່າຍຕ່າງກໍບໍ່ສາມາດເວົ້າວ່າຫຍັງໃຫ້ກັນໄດ້ເລີຍ ນີ້ມັນບໍ່ຕ່າງຫຍັງກັບການເພີ່ມຄວາມເປິະເປື້ອນໃຫ້ສັງຄົມຕື່ມອີກ,
ເຖິງຈະເປັນຍາມຝົນກໍຕາມ ການກຳຈັດ ແລະ ເກັບມ້ຽນຂີ້ເຫຍື້ອໃຫ້ຖືກບ່ອນທີ່ຖືກທາງມັນກໍຍັງເປັນຄວາມຮັບຜິດຊອບຂອງທຸກພາກສ່ວນ, ຕົ້ນຕໍແມ່ນຄອບຄົວປະຊາຊົນຜູ້ສ້າງຂີ້ເຫຍື້ອນັ້ນລະຕ້ອງເປັນເຈົ້າການໃນການເກັບມ້ຽນບໍ່ແມ່ນຈະເອື່ອຍອີງໃສ່ແຕ່ເຈົ້າໜ້າທີ່ທີ່ມາເກັບມ້ຽນພຽງຝ່າຍດຽວ ແລະ ຝ່າຍຜູ້ບໍລິການເກັບມ້ຽນຂີ້ເຫຍື່ອກໍເຊັ່ນດຽວກັນໃນເມື່ອເຮັດໜ້າທີ່ບໍລິການກໍຕ້ອງເພີ່ມຄວາມຮັບຜິດຮັບຊອບໃຫ້ຫລາຍຂຶ້ນກວ່າເກົ່າ ທຸກຄົນທຸກຝ່າຍຕ້ອງຮ່ວມແຮງສາມັກຄີກັນເປັນນ້ຳໜຶ່ງໃຈດຽວກັນເພື່ອອະນາຄົດທີ່ສົດໃສ, ມີອາກາດປອດໂປ່ງ, ປະຊາຊົນມີສຸຂະພາບແຂງແຮງດ້ວຍການກຳຈັດຂີ້ເຫຍື້ອໃຫ້ຖືກທິ່ຖືກບ່ອນ ພ້ອມກັນຮັກສາສິ່ງແວດລ້ອມທີ່ດີໃຫ້ສົມກັບຄຳທີ່ວ່າ: ຄົນມີ ມາລະຍາດດີ ບໍ່ຄວນຖິ້ມຂີ້ເຫຍື້ອຊະຊາຍ.
