ການພັດທະນາຊີວິດການເປັນຢູ່ຂອງຜູ້ຖືກເຄາະຮ້າຍກັບຄືນສູ່ສັງຄົມຍັງເປັນສິ່ງທ້າທາຍ ໃນການແກ້ໄຂບັນຫາລະເບີດບໍ່ທັນໃຫ້ ບັນລຸເປົ້າໝາຍ

ໃນກອງປະຊຸມມີທ່ານ ປະເດີມພອນ ສົນທະນີ ຮອງລົດຖະມົນຕີ ກະຊວງແຮງານ ແລະ ສະຫວັດ ດີການສັງຄົມ(ຮສສ), ຮອງປະທານຄະນະກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ (ຄຊກລ) ແລະ ທ່ານ ນາງ ແຄັດເທີລີນ ເຟືອງ ຮອງຜູ້ຕາໜ້າງໜ້າອົງການສະຫະປະຊາຊາດ ເພື່ອການພັດທະນາ (UNDP) ປະຈໍາ ສປປ ລາວ, ທ່ານ ປີເຕີ ເຮມອນ ເອກອັກຄະລັດຖະທູດ ສະຫະລັດອາເມລິກາ ປະຈຳລາວ ແລະ  ຕາງໜ້າບັນດາກະຊວງຂະແໜງການ ກ່ຽວຂ້ອງເຂົ້າຮ່ວມ.

ທ່ານ ປະເດີມພອນ ສົນທະນີ ໄດ້ໃຫ້ຮູ້ວ່າ: ປັດຈຸບັນລັດຖະບານ ສປປ ລາວ ໄດ້ມີການທົບທວນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ ສະບັບທີ 9 ກາງສະໄໝ. ໃນນັ້ນ, ວຽກງານແກ້ໄຂບັນຫາ ລບຕ ໄດ້ຖືເປັນບັນຫາສຳຄັນໃນການປະກອບສ່ວນຕໍ່ການພັດທະນາເສດຖະກິດ-ສັງຄົມ ແລະ ການຫລຸດຜ່ອນຄວາມທຸກຍາກ ຂອງປະຊາຊົນບັນດາເຜົ່າໃນ ຂອບເຂດທົ່ວປະເທດ. ຄະນະກຳມະການຄຸ້ມຄອງ ແຫ່ງຊາດເພື່ອແກ້ໄຂບັນຫາ ລບຕ ໄດ້ສັງເກດຕີລາຄາຄືນໃນການນຳພາ-ຊີ້ນຳ ໃນໄລຍະ 1 ປີ ຜ່ານມາ ແລະ ກຳນົດທິດທາງແຜນການໃນຕໍ່ໜ້າ ເຊິ່ງໃນໄລຍະຜ່ານມາ ໄດ້ເອົາໃຈໃສ່ຊີ້ນຳ ແລະ ຄຸ້ມຄອງການເຄື່ອນໄຫວວຽກງານແກ້ໄຂບັນຫາ ລບຕ ຢູ່ ສປປ ລາວ ໃນການຈັດຕັ້ງປະຕິບັດແຜນຍຸດທະສາດແຫ່ງຊາດ ເພື່ອແກ້ໄຂບັນຫາ ລບຕ “ເສັ້ນທາງກ້າວສູ່ຄວາມປອດໄພ III” ໄລຍະ 2021-2030 ໂດຍເຊື່ອມສານເຂົ້າໃນຂະແໜງການສຶກສາທິການ ແລະ ກິລາ, ຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ສາທາລະນະສຸກ ແລະ ຂະແໜງການອື່ນໆທີ່ກ່ຽວຂ້ອງ. ພ້ອມນັ້ນ, ກໍໄດ້ປັບປຸງ ແລະ ສ້າງຄວາມເຂັ້ມແຂງການປະສານງານກັບຂະແໜງການ, ອົງ ການ, ພາກສ່ວນກ່ຽວຂ້ອງຂັ້ນສູນກາງ ແລະ ທ້ອງຖິ່ນ ເພື່ອເປັນການຈັດຕັ້ງປະຕິບັດ ດຳລັດຂອງລັດຖະບານ ວ່າດ້ວຍການຄຸ້ມຄອງການແກ້ໄຂບັນຫາ ລບຕ ເຊິ່ງເປັນພື້ນຖານໃນການກຳນົດແຜນບູລິມະສິດຂອງການສຳຫລວດ-ກວດກູ້ ແລະ ທຳລາຍ ລບຕ ເພື່ອຕອບສະໜອງກັບຄວາມຕ້ອງການ ນໍາໃຊ້ທີ່ດິນຂອງປະຊາຊົນ, ໂຄງການພັດທະນາ ແລະ ໂຄງການຊ່ວຍເຫລືອຕ່າງໆເຊັ່ນ: ການກໍ່ສ້າງນໍ້າລິນ, ໂຮງຮຽນ ແລະ ອື່ນໆ.