ການເຕີບໂຕຂອງບໍລິສັດຫັດຖະກຳແພງໄໝ

ບໍລິສັດຫັດຖະກໍາແພງໄໝ ຕັ້ງຢູ່ບ້ານໜອງບົວທອງໃຕ້, ເມືອງສີໂຄດຕະບອງ, ນະຄອນ ຫຼວງວຽງຈັນ ເຊິ່ງເປັນບໍລິສັດ ທີ່ໄດ້ເລີ່ມຕົ້ນຈາກທຸລະກິດຂະ ໜາດນ້ອຍແບບຄອບຄົວ, ແລ້ວ ຄອຍໆເຕີບໂຕຂຶ້ນມາຕາມຍຸກສະໄໝ  ແລະ ກົນໄກເສດຖະກິດໃໝ່ເພື່ອສາມາດຕອບສະໜອງ ຄວາມຮຽກຮ້ອງຕ້ອງການຂອງຕະຫຼາດທີ່ນັບມື້ເພີ່ມຂຶ້ນ.

ທ່ານ ໃຈຍະສອນ ຜູ້ຈັດ ການຝ່າຍບໍລິຫານຂອງບໍລິສັດ ດັ່ງກ່າວໃຫ້ຮູ້ວ່າ: ຫັດຖະກໍາແພງ ໄໝໄດ້ເລີ່ມສ້າງຕັ້ງເປັນ ບໍລິສັດ ຂຶ້ນໃນປີ 1993 ໂດຍສອງເອື້ອຍນ້ອງໄດ້ຮ່ວມກັນດຳເນີນກິດ    ຈະການຄື: ນ. ກົງທອງ ນັນທະ ວົງດວງສີ ແລະ ທ່ານ ນ. ວຽງຄໍາ ນັນທະ ວົງດວງສີ ໂດຍມີຊ່າງຕໍ່າ ຫູກປະຈໍາຢູ່  9 ຄົນ ເຊິ່ງນັບແຕ່ ສ້າງຕັ້ງເປັນບໍລິສັດມາຮອດປັດ ຈຸບັນໄດ້ 20 ກວ່າ ປີແລ້ວເຫັນວ່າສາມາດຝຶກອົບຮົມວິຊາຊ່າງ ຕໍ່າຫູກໄດ້ປະມານ 200 ກວ່າຄົນ. ເພື່ອຕອບສະໜອງຊ່າງຕໍ່າຫູກປະຈໍາຢູ່ບໍລິສັດ.ທາງບໍລິສັດ ກໍຍັງໄດ້ເອົາຫູກໄປໃຫ້ຊ່າງຕໍ່າ ຫູກຕໍ່າແບບມອບເໝົາ, ຕໍ່າເປັນ ງວດ-ເປັນລະດູການຢູ່ເຂດເມືອງ ວັງວຽງ ແລະ ເຂດອື່ນໆບັນດາ ແຂວງພາກເໜືອເພື່ອເປັນການ ຊຸກຍູ້-ສົ່ງເສີມວິຊາອາຊີບ ແລະ ການສ້າງລາຍຮັບໃຫ້ເຂົາເຈົ້າ ໄດ້ມີຢູ່ມີກິນ. ຜະລິດຕະພັນຂອງ ບໍລິສັດຫັດຖະກໍາແພງໄໝມີ: ຜ້າ ພັນຄໍ, ຜ້າຕູ້ມ, ແພຕັດເສື້ອ , ເສື້ອ ຜ້າໄໝ ຍິງ-ຊາຍ, ສິ້ນໄໝ, ຜ້າກັ້ງ, ຜ້່າປູໂຕະ, ຜ້າຮອງຈານ, ຜ້າ ຂອບຮູບ,  ກະເປົາ ແລະ ເຄື່ອງ ທີ່ລະນຶກອື່ນໆອີກຫຼາຍຢ່າງ,     ຜະລິດຕະພັນດັ່ງ ກ່າວນັ້ນ, ນອກ ຈາກຈໍາໜ່າຍພາຍໃນປະເທດ ແລ້ວ ຍັງໄດ້ສົ່ງໄປຂາຍຢູ່ຕ່າງ ປະເທດນໍາອີກເຊັ່ນ: ຍີ່ປຸ່ນ, ອາເມລິກາ, ສິງກະໂປ, ຝຣັ່ງເສດ, ສະວິດເຊີແລນ ແລະ ໄທ, ພ້ອມ ດຽວກັນນັ້ນ, ຍັງໄດ້ລົງໂຄສະ ນາທາງວາລະສານ, ອິນເຕີເນັດ, ແຜ່ນພັບ, ໃນວາລະກອງ ປະຊຸມສໍາມະນາ-ປາຖະກະຖາ ແລະໃນງານວາງສະແດງສິນ ຄ້າຕ່າງໆ.

ທ່ານ ໃຈຍະສອນໃຫ້ຮູ້ ວ່າ: ແຕ່ລະປີ ນອກຈາກຈະ ມີການພັດທະນາທາງດ້ານສີ ມືແຮງງານຂອງ ກໍາມະກອນ ແລະ ຊ່າງຕໍ່ຫູກໃຫ້ກ້າວໜ້າໄປຕາມຍຸກຕາມສະໄໝແລ້ວ, ທາງບໍລິສັດຍັງມີການນະໂຍ ບາຍຕ່າງໆຕໍ່ພະນັກງານ- ກໍາມະກອນພາຍໃນບໍລິສັດຄ້າຍຄືກັບການບໍລິຫານວຽກລັດທົ່ວໆໄປເປັນຕົ້ນ:  ກໍາມະກອນ ທີ່ເປັນຊ່າງຕໍ່າຫູກແມ່ນໄດ້ຮັບ ເງິນເດືອນສະເລ່ຍແຕ່ 1-2 ລ້ານກີບ/ຄົນ/ເດືອນ, ພະນັກງານຫ້ອງການຈະໄດ້ຮັບສະ ເລ່ຍແຕ່ 2-3ລ້ານກີບ/ຄົນ/ ເດືອນ. ສ່ວນຜູ້ທີ່ໄດ້ເຂົ້າປະ ກັນສັງຄົມບໍລິສັດຈະຈ່າຍເພີ່ມ ຜູ້ລະ 30.000ກີບ/ເດືອນ, ເງິນ ຂະຫຍັນສໍາລັບພະນັກງານ ຊ່າງຈະໄດ້ຮັບແຕ່ 50.000-100.000ກີບ/ຄົນ/ເດືອນ, ແມ່ ຍິງເກີດລູກມີນະໂຍບາຍລາພັກ 3ເດືອນ ໂດຍບໍ່ໄດ້ຕັດເງິນເດືອນ, ເງິນນະໂຍບາຍແຕ່ງງານຈະ ໄດ້ຮັບ 200.000ກີບ/ຄົນ, ເງິນປະຈໍາປີພະນັກງານທັງໝົດຈະໄດ້ຮັບແຕ່ 30%-50% ຂອງ ເງິນເດືອນຕົນເອງ, ສໍາລັບພະນັກງານທີ່ນອນຫໍພັກມີນະໂຍບາຍລ້ຽງເຂົ້າ-ສາມຄາບ, ສ່ວນຜູ້ທີ່ພັກຢູ່ນອກແມ່ນ 1 ຄາບ.

ມາຮອດປັດຈຸບັນ, ບໍລິສັດ ຫັດຖະກໍາແພງໄໝກາຍເປັນສະຖາບັນສິດສອນວິຊາຊ່າງຫັດຖະກຳອີກແຫ່ງໜຶ່ງທີ່ມີຄວາມຊໍານິຊໍານານ,  ປະສົບການ ແລະ ມີອາຊີບທີ່ໝັ້ນຄົງແນ່ນອນ ເປັນຂອງຕົນເອງ, ສ້າງເງື່ອນໄຂໃຫ້ກໍາມະກອນມີວຽກເຮັດ ງານທໍາທັງເປັນການຫຼຸດຜ່ອນໄພຫວ່າງງານໃຫ້ແກ່ສັງຄົມ, ເປັນການສືບທອດສີໄມ້ລາຍມືອັນປານີດຂອງຄົນລາວຈາກປູ່ຍ່າຕາຍາຍກາຍເປັນມໍລະດົກອັນລໍ້າຄ່າເຮັດໃຫ້ແຂກຕ່າງ ດ້າວທ້າວຕ່າງແດນມີຄວາມສົນໃຈ ແລະ ຍ້ອງຍໍສີມືຂອງຄົນລາວ./.