ສະເປີ ບັນລຸຂໍ້ຕົກລົງ ຕັ້ງ ອັງເກ ປອສເຕໂຄກລູ ນັ່ງຜູ້ຈັດການທີມໃຫມ່

ຟາບຣີຊີໂອ ໂຣມາໂນ ນັກວິເຄາະຊື່ດັງດ້ານຕະຫລາດຊື້-ຂາຍ ນັກເຕະ ອອກມາເປີດເຜີຍວ່າ ທີມ ສະເປີ ສະໂມສອນຈາກພຣີເມຍລີກ ລີກ ອັງກິດ ໄດ້ບັນລຸຂໍ້ຕົກລົງທາງວາຈາ ໃນການຄວ້າຕົວ ອັງເກ ປອສເຕໂຄກລູ ມາຮັບໜ້າທີ່ຜູ້ຈັດການທີມໃຫມ່ແລ້ວ.

ສະເປີ ເດີນໜ້າຄົ້ນຫາຜູ້ຈັດການທີມຄົນໃຫມ່ຂອງພວກເຂົາຢ່າງຕໍ່ເນື່ອງ ນັບຕັ້ງແຕ່ແຍກທາງກັບ ອັນໂຕນີໂອ ຄອນເຕ ຜູ້ຈັດການທີມຊາວອິຕາລີ ໃນໄລຍະລະຫວ່າງລະດູການຫລ້າສຸດ ແລະ ເຄີຍມີກະແສເຊື່ອມໂຍງກັບຜູ້ຈັດການຫລາຍຄົນ.

ແນວໃດກໍຕາມຫລ້າສຸດ ໂຣມາໂນ ອອກມາເປີດເຜີຍວ່າ ສະເປີໄດ້ບັນລຸຂໍ້ຕົກລົງໃນການດຶງຕົວ ອັງເກ ປອສເຕໂຄກລູ ເຂົ້າມາເປັນຜູ້ຈັດການທີມຄົນໃຫມ່ ໂດຍລາຍງານລະບຸວ່າລາວຈະເຂົ້າມາຄຸມທີມສະເປີດ້ວຍສັນຍາ 2 ປີ ພ້ອມກັບເງື່ອນໄຂໃນການຂະຫຍາຍສັນຍາເພີ່ມໄດ້ອີກ 1 ລະດູການ.

ສຳລັບ ອັງເກ ປອສເຕໂຄກລູ ປັດຈຸບັນເປັນຜູ້ຈັດການທີມກລາສໂກ ເຊລຕິກ ສະໂມສອນໃນລີກ ສະກັອດແລນ ເຊິ່ງລາວພາທີມ ເຊລຕິກ ປະສົບຄວາມສຳເລັດຢ່າງຫລາຍ ກວາດໄປເຖິງ 5 ແຊ໊ມ ພາຍໃນໄລຍະເວລາການພາທີມພຽງ 2 ລະດູການ ໂດຍສະເພາະລະດູການນີ້ ທີ່ລາວພາທີມກວາດ 3 ແຊ໊ມ ໄດ້ແຊ໊ມທັງ ສະກັອດຕິດ ພຣີເມຍຊິບ, ສະກັອດຕິດ ຄັບ ແລະ ສະກັອດຕິດ ລີກ ຄັບ.