ຮອງລັດຖະມົນຕີກະຊວງສາທາ ເນັ້ນໃຫ້ຂະແໜງສາທາແຂວງອຸດົມໄຊສຸມໃສ່ຄວບຄຸມ ປ້ອງກັນການລະບາດພະຍາດຕາມລະດູການ ໃຫ້ນັບມື້ຫລຸດລົງ

ໃນລະຫວ່າງວັນທີ 3-4 ມິຖຸນານີ້ ທ່ານ  ໄພວັນ ແກ້ວປະເສີດ ຮອງລັດຖະມົນຕີ ກະຊວງສາທາລະນະສຸກ ພ້ອມດ້ວຍຄະນະ ໄດ້ເດີນທາງມາເຄື່ອນໄຫວ ຕິດຕາມ ຊຸກຍູ້ ວຽກງານສາທາລະນະສຸກ ຢູ່ແຂວງອຸດົມໄຊ ໂດຍສະເພາະແມ່ນ ການສຳຫຼວດ ດັດສະນີໝາຍສັງຄົມລາວ ຄັ້ງທີ III ແລະ ຂະບວນການເຝົ້າລະວັງ, ປ້ອງກັນ, ຕອບໂຕ້ ແລະ ຄວບຄຸມພະຍາດທີ່ລະບາດຕາມລະດູການ (ພະຍາດໄຂ້ເລືອດອອກ).

ໂອກາດນີ້ ທ່ານໄດ້ເຂົ້າຮັບຟັງລາຍງານການເຄື່ອນໄຫວວຽກງານສາທາລະນະສຸກ ໂດຍສະເພາະ ແມ່ນການຈັດຕັ້ງປະຕິບັດຄວບຄຸມການລະບາດພະຍາດຕາມລະດູການ ຈາກ ທ່ານ ດຣ ຫຸມພັນ ອິນທະມຸງຄຸນ ຫົວໜ້າພະແນກສາທາລະນະສຸກ. ຈາກນັ້ນ ທ່ານຮອງລັດຖະມົນຕີໄດ້ໂອ້ລົມມີຄຳເຫັນຊີ້ນຳບາງດ້ານ ເຊິ່ງທ່ານໄດ້ເນັ້ນໃຫ້ ຄະນະພັກ, ຄະນະພະແນກ ແລະ ບັນດາຂະແໜງການຕ່າງໆອ້ອມຂ້າງພະແນກສາທາລະນະສຸກ ສືບຕໍ່ຈັດຕັ້ງປະຕິບັດວຽກງານວິຊາສະເພາະຂອງຕົນເອງໃຫ້ສຳເລັດ, ມີການປະສານສົມທົບກັບຂະແໜງການທີ່ກ່ຽວຂ້ອງຈາກກະຊວງ ແລະ ບັນດາໂຮງໝໍຂັ້ນສູນກາງ ເພື່ອພັດທະນາທາງດ້ານວິຊາການໃຫ້ນັບມື້ສູງຂຶ້ນ, ສຸມໃສ່ຄວບຄຸມ ແລະ ປ້ອງກັນ ການລະບາດຂອງພະຍາດຕາມລະດູການ (ໄຂ້ເລືອດອອກ) ໃຫ້ນັບມື້ຫລຸດລົງ ແລະ ໝົດໄປເທື່ອລະກ້າວ, ປະສານສົມທົບກັບບັນດາກິດຈະການບໍລິການປິ່ນປົວສຸຂະພາບ ພາກເອກະຊົນ ໃຫ້ມີສ່ວນຮ່ວມໃນການລາຍງານສະພາບ ແລະ ແກ້ໄຂຊ່ວຍກັນ, ສືບຕໍ່ພັດທະນາຍົກລະດັບຂີດຄວາມສາມາດຂອງພະນັກງານ, ແພດ-ໝໍ ລວມທັງອຸປະກອນການແພດຢູ່ແຕ່ລະຈຸດ ໃຫ້ມີຄວາມເຂັ້ມແຂງ ແລະ ທັນສະໄໝຂຶ້ນເລື້ອຍໆ ແນໃສ່ແກ້ໄຂໃຫ້ທັນກັບສະພາບການ, ພ້ອມກັນຕ້ານບັນດາປາກົດການຫຍໍ້ທໍ້ທີ່ຈະເກີດຂຶ້ນກັບຖັນແຖວວຽກງານສາທາລະນະສຸກ ພ້ອມກັນຈັດຕັ້ງປະຕິບັດວຽກງານສາທາລະນະສຸກ ໃຫ້ບັນລຸ 11 ຕົວຊີ້ບອກ.

ວັນທີ 4 ມິຖຸນາ ທ່ານ ດຣ ໄພວັນ ແກ້ວປະເສີດ ຮອງລັດຖະມົນຕີກະຊວງສາທາລະນະສຸກ  ພ້ອມຄະນະ ໄດ້ລົງເຄື່ອນໄຫວເບິ່ງການບໍລິການສຸຂະພາບຢູ່ໂຮງຫມໍເມືອງແບງ ລົງພົບປະໂອ້ລົມກັບປະຊາຊົນ ບ້ານ ນ້ຳດໍ້ ບ້ານເປົ້າໝາຍໃນການສຳຫລວດດັດສະນີ ຄັ້ງທີ3, ໄປຢ້ຽມຢາມ ປະຊາຊົນ ບ້ານປາງເດື່ອ ເຊິ່ງເປັນບ້ານທີ່ມີການລະບາດຂອງພະຍາດໄຂ້ຍຸງລາຍເປັນຈຳນວນຫລາຍກວ່າໝູ່ຢູ່ ເມືອງແບງ ຮັບຟັງສະພາບການລະບາດພະຍາດໄຂ້ຍຸງລາຍຈາກອົງການປົກຄອງບ້ານ ແລະ ທ່ານຮອງລັດຖະມົນຕີໄດ້ເນັ້ນໃຫ້ ປະຊາຊົນ ຮັບຮູ້ ແລະ ເຂົ້າໃຈ ຕໍ່ກັບຜົນຮ້າຍຂອງພະຍາດໄຂ້ຍຸງ, ຫລັກການປີ່ນປົວທີ່ຖຶກຕ້ອງ, ເປັນເຈົ້າການປ້ອງກັນໄຂ້ຍຸງ ໂດຍການປະຕິບັດ 5ປ ຕາມຫລັກການຂອງກະຊວງສາທາລະນະສຸກ ສຳຄັນຕ້ອງໃຫ້ການຮ່ວມມືກັບວິຊາການຂອງແຂວງ ແລະ ເມືອງ ພ້ອມກັນຄວບຄຸມ ແລະ ປ້ອງກັນ ພະຍາດໄຂ້ຍຸງລາຍຢ່າງຈິງຈັງ, ກໍລະນີມີອາການເຈັບເປັນແມ່ນໃຫ້ໄປພົບແພດເພື່ອຈະໄດ້ປີ່ນປົວໃຫ້ທັນການ.

ປັດຈຸບັນ ທົ່ວແຂວງອຸດົມໄຊ ມີການຕິດເຊື້ອພະຍາດໄຂ້ຍຸງລາຍ ຈຳນວນ 669 ກໍລະນີ ໃນນັ້ນ ເມືອງແບງ 241 ກໍລະນີ, ເມືອງຮຸນ 210 ກໍລະນີ, ນາໝໍ້ 103 ກໍລະນີ, ເມືອງໄຊ 83 ກໍລະນີ, ປາກແບງ 28 ກໍລະນີ ສ່ວນ ເມືອງຫຼາ ແລະ ເມືອງນາງາ ເມືອງລະ 2 ກໍລະນີ.