ອາຊາ ສະເໜ່ແຮງ 3 ທີມໃຫຍ່ ໃນລີກອິຕາລີ ຕາມທາບທາມຄວ້າທີມ

ເອເດນ ອາຊາ ສະເໜ່ແຮງຫລາຍ ເມື່ອຖືກ 3 ທີມໃຫຍ່ ໃນກັລໂຊ ເຊເຣຍອາ ຢ່າງ ໂຣມາ, ຢູເວນຕຸສ ແລະ ເອຊີ ມິລານ ພາກັນລຸມຍາດ ຫລັງຈັດການຍົກເລີກສັນຍາກັບ ຣຽວ ມາດຣິດ ຮຽບຮ້ອຍແລ້ວ.

ອາຊາ ມີບັນຫາບາດເຈັບລົບກວນຢ່າງຕໍ່ເນື່ອງຈົນເກືອບບໍ່ໄດ້ລົງສະໜາມໃຫ້ ຣຽວ ມາດຣິດ ເລີຍ ຕະຫລອດ 6 ປີທີ່ຜ່ານມາ ຈົນຫລ້າສຸດ ຣຽວ ມາດຣິດ ແລະ ດາວເຕະອາຍຸ 32 ປີ ຈຶ່ງບັນລຸຂໍ້ຕົກລົງໃນການຍົກເລີກສັນຍາທີ່ພວມຈະຫມົດລົງໃນໄລຍະລະດູການປີ 2024 ກ່ອນກຳໜົດ ເຊິ່ງເຮັດໃຫ້ ອະດີດດາວເຕະທີມຊາດເບລຢ້ຽມ ສາມາດຈະຍ້າຍສັງກັດໄດ້ແບບບໍ່ມີຄ່າຕົວ.

ຂະນະທີ່ The Athletic ສື່ສຳນັກດັງຂອງອັງກິດລາຍງານວ່າ ຊື່ສຽງເກ່ົາໆຂອງອະດີດດາວເຕະເຊລຊີ ຍັງຂາຍໄດ້ ເມື່ອມີທັງ ໂຣມາ, ຢູເວນຕຸສ ແລະ ເອຊີ ມິລານ ຍື່ນເຂົ້າຄິວຖ້າແຈກຂະໜົມຈີບ ໂດຍເປັນ ໂຣມາ ທີ່ເບິ່ງດູດີກວ່າ ເພາະມີ ໂຈເຊ ມູຣິນໂຟ ເຈົ້ານາຍເກ່ົາຂອງ ອາຊາ ສະໄຫມຍັງຫລິ້ນຢູ່ກັບເຊລຊີ ຄຸມທີມຢູ່ນັ້ນເອງ.