ເບນເຊມາ ປິດສາກ 14 ກັບ ຣຽວ ມາດຣິດ ຄາດຍ້າຍໄປໂກຍເງິນໃນຊາອຸດິອາຣະເບຍ
ຄາຣິມ ເບນເຊມາ ດາວຍິງຊາວຝຣັ່ງ ຕັດສິນໃຈປິດສາກໄລຍະເວລາ 14 ປີ ກັບ ຣຽວ ມາດຣິດ ຮຽບຮ້ອຍແລ້ວ ຄາດການວ່າກຽມບິນໄປໂກຍເງິນໃນລີກ ຊາອຸດິ ອາຣະເບຍ.
ຣຽວ ມາດຣິດ ຖະແຫລງການຢືນຢັນເມື່ອວັນອາທິດທີ່ຜ່ານມາວ່າ ພວກເຂົາບັນລຸຂໍ້ຕົກລົງໃນການຍົກເລີກສັນຍາກັບ ຄາຣິມ ເບນເຊມາ ທີ່ຫາກໍຂະຫຍາຍສັນຍາໄປຈົນເຖິງລະດູການ 2024 ຫລັງດາວຍິງອາຍຸ 35 ປີ ແຈ້ງວ່າ ຕ້ອງການຍ້າຍທີມໄປສະແຫວງຫາຄວາມທ້າທາຍຄັ້ງໃຫມ່ໃນອາຊີບນັກເຕະ.
ຂະນະທີ່ The Sun ສື່ໃນອັງກິດລາຍງານວ່າ ເບນເຊມາ ອາດຈະຍ້າຍໄປໂກຍເງິນໃນລີກຊາອຸດິ ອາຣະເບຍ ຫລັງໄດ້ຮັບຂໍ້ສະເໜີຈາກ ອັລ ອິດຕິຮັດ ທີ່ພ້ອມມອບສັນຍາ 2 ປີ ພ້ອມຄ່າເມື່ອຍສູງເຖິງ 342 ລ້ານປອນໃຫ້ກັບລາວ.
ສຳລັບ ເບນເຊມາ ຍ້າຍຈາກ ໂອລິມປິກ ລີຢົງ ມາຢູ່ກັບ ຣຽວ ມາດຣິດ ຕັ້ງແຕ່ປີ 2009 ໂດຍລົງຫລິ້ນໄປແລ້ວ 647 ນັດ ຍິງໄປ 353 ປະຕູ ເຊິ່ງເປັນສະຖິຕິສູງສຸດເປັນອັນດັບ 2 ຕະຫລອດການຂອງສະໂມສອນເປັນຮອງພຽງ ຄຣິສຕຽນໂນ ໂຣນັລໂດ ທີ່ຍິງໄປເຖິງ 450 ປະຕູຈາກ 438 ນັດຄົນດຽວເທົ່ານັ້ນ.
ນອກຈາກນີ້ ອະດີດດາວຍິງທີມຊາດຝຣ່ັງ ຍັງຄວ້າແຊ໊ມກັບ ຣຽວ ມາດຣິດ ໄດ້ຢ່າງຫລວງຫລາຍເຖິງ 24 ລາຍການ ເຊິ່ງລວມໄປເຖິງແຊ໊ມ ລາ ລີ 4 ສະໄຫມ ແລະ ແຊ໊ມປຽນ ລີກ ອີກ 5 ສະໄຫມດ້ວຍກັນ ແລະ ຍັງຄວ້າລາງວັນບັນລົງດໍມານອນກອດໄດ້ອີກຄັ້ງເມື່ອປີກ່ອນ.
