ອັລ ຮິລາລ ກຳນົດວັນປະກາດຄວ້າ ເມສຊີ ພ້ອມຈ່າຍຄ່າເມື່ອຍ 345 ລ້ານປອນຕໍ່ລະດູການ.

ໂດຍ ເມສຊີ ຕັດສິນໃຈທີ່ຈະຍ້າຍອອກຈາກ ປາຣີສ ແຊັງ ແຊັກແມັງ ຫລັງຈົບລະດູການນີ້ຫລັງຈາກຫມົດສັນຍາ ເຖິງຈະຍັງບໍ່ມີການຢືນຢັນວ່າລາວຈະຍ້າຍໄປຢູ່ກັບທີມໃດ ແຕ່ສື່ຫາຍສຳນັກລາຍງານກົງກັນວ່າ ດາວເຕະອາຍຸ 35 ປີ ຕົກລົງທີ່ຈະໄປຫລິ້ນໃຫ້ກັບ ອັລ ຮິລາລ ໃນຊາອຸດິ ໂປຣ ລີກ ດ້ວຍການມູນຄ່າມະຫາສານ.

ຫລ້າສຸດ ສະປອດ ສື່ຊື່ດັງຂອງສະເປນລະບຸວ່າ ອັລ ຮິລາລ ຍື່ນຂໍ້ສະເໜີໃຫ້ກັບ ເມສຊີ ດ້ວຍຄ່າຕົວລະດັບສະຖິຕິໂລກໃຫມ່ຈຳນວນ 345 ລ້ານປອນ/ລະດູການ ເຊິ່ງຫລາຍກວ່າທີ່ ຄຣິສຕຽນໂນ ໂຣນັລໂດ ເຈົ້າຂອງສະຖິຕິປັດຈຸບັນໄດ້ຮັບຈາກ ອັລ ນາສເຊີ ເຖິງ 170 ລ້ານປອນ.