ສະເໜີ ໃຫ້ພິຈາລະນາການອະນຸຍາດຂຸດຄົ້ນແຮ່ຄຳ ແລະ ການຕັດໄມ້ປ່ອງ ຢາກໂຈະ ໂກຕາປີຕໍ່ໄປເພື່ອຮັກສາໄວ້ແຫລ່ງວັດຖຸດິບ

ລາວເປັນປະເທດທີ່ອຸດົມສົມບູນໄປດ້ວຍຊັບໃນດິນ ສິນໃນນ້ຳ ມີຄຳຂຽວເຕັມແຜ່ນດິນ ແຕ່ມາຮອດເວລານີ້ ຊັບສົມບັດເຫລົ່ານັ້ນພວມໄດ້ຮັບການຂຸດຄົ້ນອອກມານຳໃຊ້ພັດທະນາເສດຖະກິດຂອງຊາດຫລາຍພໍສົມຄວນ, ທັງໜ້າດິນ ແລະ ພື້ນດິນ ເຮັດໃຫ້ວັດຖຸສິ່ງຂອງເຫລົ່ານັ້ນໂດຍສະເພາະແມ່ນຕົ້ນໄມ້ ທັງໄມ້ຈິງ ແລະ ໄມ້ປ່ອງ ໄດ້ບົກແຫ້ງລົງ ເປັນຜົນສະທ້ອນເຮັດໃຫ້ດິນຟ້າອາກາດປ່ຽນແປງ ເກີດລົມພາຍຸພັດຮຸນແຮງ, ຝົນຕົກນ້ຳຖ້ວມກະທັນຫັນ ແລະ ອື່ນໆ,

ເພື່ອແກ້ໄຂບັນຫາສະເພາະໜ້າ ແລະ ຍາວນານ ຫລາຍພາກສ່ວນທັງພາກລັດ ແລະ ເອກະຊົນໄດ້ເລີ່ມຊອກຫາທຸກວິທີທາງໃນການຟື້ນຟູຄວາມບົກແຫ້ງຂອງຊັບພະຍາກອນທຳມະຊາດໃຫ້ກັບຄືນເຂົ້າສູ່ສະພາບປົກກະຕິໂດຍໄວ, ຮັກສາໄດ້ຄວາມຄົງຕົວ, ສົມດູນຂອງສະພາບແວດລ້ອມ ແລະ ດິນຟ້າອາກາດດ້ວຍການປູກທົດແທນ, ສັ່ງໂຈະ ຫລື ຢຸດການຂຸດຄົ້ນ ຕາມຄວາມເປັນຈິງຂອງແຕ່ລະທ້ອງຖິ່ນ, ຊຶ່ງເມືອງສັງທອງ ນະຄອນຫລວງວຽງຈັນ ກໍ ມີບັນຫາ ແລະ ພວມເລັ່ງດຳເນີນການແກ້ໄຂວຽກງານນີ້,

ທ່ານ ພົງສະຫວັນ ສິລິພັນ ເຈົ້າເມືອໆສັງທອງໄດ້ສະເໜີຕໍ່ ທ່ານ ອານຸພາບ ຕຸນາລົມ ປະທານສະພາປະຊາຊົນນະຄອນຫຼວງວຽງຈັນ ໃນເວລາທີ່ໄດ້ລົງກວດກາ ຊຸກຍູ້ວຽກງານກໍ່ສ້າງຮາກຖານການເມືອງ, ພັດທະນາຊົນນະບົດແກ້ໄຂຄວາມທຸກຍາກ ຢູ່ເມືອງສັງທອງໃນ ວັນທີ 25 ພຶດສະພາ 2023 ນີ້ ໂດຍທີ່ ທ່ານໄດ້ສະເໜີໃຫ້ຂັ້ນເທິງພິຈາລະນາການອະນຸຍາດໃຫ້ມີການຂຸດຄົ້ນແຮ່ຄຳຕາມຂໍ້ຕົກລົງເລກທີ141/ນຍ ຊຶ່ງມີ 3 ບໍລິສັດ ເຂົ້າຂຸດຄົ້ນ, ປັດຈຸບັນແມ່ນໄດ້ຢຸດການຂຸດຄົ້ນແລ້ວ 2 ບໍລິສັດ ແລະ ຍັງສືບຕໍ່ 1 ບໍລິສັດ, ລວມທັງສະເໜີສະພາບນ້ຳສັງຂຸ່ນ ທີ່ມາຈາກສາຍນ້ຳສັງເບື້ອງເທິງແມ່ນຍັງຂຸ່ນຢູ່ ເນື່ອງຈາກເຂດດັ່ງກ່າວແມ່ນຢູ່ໃນການຄຸ້ມຄອງຂອງເມືອງຫີນເຫີບ ຊຶ່ງປັດຈຸບັນຍັງມີຫຼາຍບໍລິສັດຊອກສຳຫຼວດ ແລະ ຂຸດຄົ້ນຢູ່ ໂດຍບໍ່ມີມາດຕະການຄຸ້ມຄອງລະອຽດ ຈຶ່ງເຮັດໃຫ້ມີຜົນກະທົບຕໍ່ປະຊາຊົນທີ່ຢູ່ນ້ຳສັງຕອນລຸ່ມ.

ສຳລັບໂຮງງານທີ່ສົ່ງອອກໄມ້ດີ້ວ, ເມືອງສັງທອງໄດ້ສະເໜີຂໍໂຈະໂກຕາໃນປີຕໍ່ໄປ ເພື່ອຮັກສາວັດຖຸດິບໄວ້ປ້ອນໂຮງງານທີ່ເຮັດເປັນຜະລິດຕະພັນສົ່ງອອກຢູ່ພາຍໃນ ແລະ ຕ່າງປະເທດ, ພ້ອມນີ້ຍັງສະເໜີຕໍ່ຂັ້ນເທິງໃຫ້ມີແຕ່ໂຮງງານດຽວທີ່ມີຢູ່ປັດຈຸບັນ, ເນື່ອງຈາກໄມ້ປ່ອງທີ່ເປັນວັດຖຸດິບປ້ອນໂຮງງານຢູ່ເມືອງສັງທອງຫລຸດລົງຫລາຍແລ້ວ.

ເຖິງວ່າການສະເໜີນີ້ຍັງບໍ່ທັນໄດ້ຮັບການພິຈາລະນາແກ້ໄຂເປັນຮູບປະທຳແທ້ກໍຕາມ, ແຕ່ມັນກໍເປັນຄວາມຄິດລິເລີ່ມທີ່ດີໃນການປົກປັກຮັກສາ ແລະ ຟື້ນຟູແຫລ່ງວັດຖຸດິບທີ່ສູນຫາຍໄປນັ້ນໃຫ້ກັບຄືນມາອຸດົມສົມບູນເຊັ່ນເດີມ ແລະ ເປັນບົດຮຽນອັນດີໃນການປົກປັກຮັກສາຊັບສົມບັດຂອງວົງຄະນາຍາດແຫ່ງຊາດ, ບໍ່ມີວັດຖຸພັນແນວໃດທີ່ນຳໃຊ້ແລ້ວຈະບໍ່ຫລຸ້ຍຫ້ຽນບໍ່ບົກແຫ້ງເປັນ ທຸກວັດຖຸຍ່ອມມີການບົກແຫ້ງໄປຕາມການເວລາ ແລະ ການຊົມໃຊ້ ເຮົາຕ້ອງຮູ້ຈັກຊົມໃຊ້ຊັບພະຍາກອນເຫລົ່ານັ້ນໃຫ້ຖືກຕ້ອງ ຕາມທິດສີຂຽວຍືນຍົງ, ບໍ່ຟຸມເຟືອຍ, ແຕ່ທີ່ສຳຄັນຕ້ອງຮູ້ສະດຸ້ງໄວຮູ້ສັງເກດວັດຖຸຊັບພະຍາກອນທຳມະຊາດທີ່ມີນັ້ນມັນໄປໃນທີດທາງໃດ ເພື່ອນຳໃຊ້ໃຫ້ເໝາະສົມຍາວນານບໍ່ໃຫ້ບົກແຫ້ງ ເພື່ອອະນາຄົດອັນສົດໃສຂອງລູກຫລານຜູ້ເກີດໃໝ່ໃຫຍ່ລຸນ ໄດ້ນຳໃຊ້ຄຳຂຽວຂອງປະເທດຊາດຕໍ່ໄປ .