ຫລວງພະບາງ ສົ່ງອອກແຮ່ເຫລັກ ແລະ ແຮ່ຫາຍາກ ໄປ ສປ ຈີນ 3 ແສນກວ່າໂຕນ

ທ່ານ ຄຳຂັນ ຈັນທະວີສຸກ ເຈົ້າແຂວງ ຫລວງພະບາງ ລາຍງານການຈັດຕັ້ງປະຕີບັດ ແຜນເສດຖະກິດ ແລະ ສັງຄົມ ທີ່ຕິດພັນກັບວຽກງານ ຂະແໜງ ພະລັງງານ ແລະ ບໍ່ແຮ່ ໂອກາດທີ່ ທ່ານ ໂພໄຊ ໄຊຍະສອນ ລັດຖະມົນຕີ ກະຊວງ ພະລັງງານ ແລະ ບໍ່ແຮ່ ໄດ້ເຄື່ອນໄຫວເຮັດວຽກ  ແລະ ພົບປະໂອ້ລົມກັບການນຳຫລັກແຫລ່ງແຂວງຫລວງພະບາງ ໃນວັນທີ 29 ພຶດສະພາ 2023 ຜ່ານມາ, ເຊິ່ງທ່ານໄດ້ລາຍງານວ່າ: ປັດຈຸບັນມີບັນດາໂຄງການທີ່ໄດ້ຮັບອະນຸຍາດຈາກລັດຖະບານ ໃນການດໍາເນີນກິດຈະການດ້ານແຮ່ທາດ ຈໍານວນ 13 ບໍລິສັດ, 16 ກິດຈະການ, ມີເນື້ອທີ່ສໍາປະທານທັງໝົດ 1.347,77 ກມ2 ຄື: ຊອກຄົ້ນແຮ່ທາດ 3 ກິດຈະການ; ສໍາຫລວດແຮ່ທາດ 7 ກິດຈະການ; ຂຽນບົດວິພາກເສດຖະກິດ-ເຕັກນິກ 3 ກິດຈະການ; ຂຸດຄົ້ນ-ປຸງແຕ່ງແຮ່ທາດ 3 ກິດຈະການ.

– ຂຸດຄົ້ນແຮ່ຄໍາໄດ້ 101.609 ໂຕນ, ທຽບໃສ່ແຜນການປະຕິບັດໄດ້ 99,39%;  ປຸງແຕ່ງແຮ່ຄໍາໄດ້  106.331,06 ໂຕນ, ທຽບໃສ່ແຜນການເຫັນວ່າປະຕິບັດໄດ້ລື່ນແຜນການ 4% ເນື່ອງຈາກວ່າໄດ້ເອົາແຮ່ທີ່ຄ້າງສະໜາມມາປຸງແຕ່ງເພີ່ມ; ໃນນີ້ມີແຮ່ຄໍາສະເລ່ຍ 3 ກຼາມ/ໂຕນ ແລະ ຫລອມໂລຫະຄໍາໄດ້ 28 ແທ່ງ, ນໍ້າໜັກ 273.500 ກຼາມ;

– ຜະລິດແຮ່ອະໂລຫະໄດ້ຈໍານວນ 366.061 ແມັດກ້ອນ, ປະຕິບັດໄດ້ 78,55% ຂອງແຜນການ, ແລະ ຈໍາໜ່າຍໄດ້ 207.645 ແມັດກ້ອນ, ປະຕິບັດໄດ້ 30,41% ຂອງແຜນການ, ສາເຫດທີ່ການຜະລິດ ແລະ ການຈໍາໜ່າຍ ບໍ່ໄດ້ຕາມແຜນການ ເນື່ອງຈາກວ່າມີບາງບໍລິສັດໄດ້ສະເໜີຂໍຢຸດກິດຈະການຊົ່ວຄາວ ແລະ ບໍ່ໄດ້ດໍາເນີນການຂຸດຄົ້ນ.

ສິ່ງທີ່ພົ້ນເດັ່ນ ແມ່ນໄດ້ເອົາໃຈໃສ່ໃນການຕິດຕາມກວດກາ ແລະ ຊຸກຍູ້ບັນດາໂຄງການຂຸດຄົ້ນແຮ່ທາດ (ແບບທົດລອງ) ຕາມນະໂຍບາຍໃໝ່ຂອງລັດຖະບານ, ເຊິ່ງມີທັງໝົດ 11 ບໍລິສັດ, ມີເນື້ອທີ່ 428,35 ເຮັກຕາ. ໃນນີ້ຂຸດຄົ້ນແຮ່ເຫລັກ ມີ 1 ບໍລິສັດ ໄດ້ຈໍານວນ 2.000 ກວ່າໂຕນ (ບໍ່ທັນໄດ້ສົ່ງອອກເທື່ອ); ຂຸດຄົ້ນຫີນມາໂບ້ 1 ບໍລິສັດ (ຍັງບໍ່ທັນໄດ້ຂຸດຄົ້ນເທື່ອ) ແລະ ຂຸດຄົ້ນຄໍາຕົກຂ້ອນ 9 ບໍລິສັດ ໄດ້ຈໍານວນ 5.884,80 ກຼາມ.

ນອກຈາກນີ້, ໄດ້ເອົາໃຈໃສ່ໃນການຕິດຕາມກວດກາ ການສົ່ງອອກແຮ່ເຫລັກ ເພື່ອໄປຈໍາໜ່າຍຢູ່ຕ່າງປະເທດ (ສປ ຈີນ) ຂອງບັນດາບໍລິສັດຕ່າງໆ, ໂດຍຜ່ານສະຖານີລົດໄຟຫລວງພະບາງ ໄດ້ຈໍານວນທັງໝົດ 344.793,90 ໂຕນ, ໃນນີ້ມີແຮ່ເຫລັກ 341.787,09 ໂຕນ ແລະ ແຮ່ຫາຍາກ  3.006,81 ໂຕນ.