ສາລະວັນ ສົ່ງເສີມຄວາມເປັນເຈົ້າການຂອງເດັກນ້ອຍ ແລະ ຊຸມຊົນໃນການປັບປຸງຄຸນນະພາບການສຶກສາ
ພະແນກສຶກສາທິການ ແລະ ກິລາແຂວງສາລະວັນ ແລະ ສະມາຄົມພັດທະນາຊຸມຊົນບ້ານເຮົາ ເຊັນບົດບັນທຶກຄວາມເຂົ້າໃຈ (MOU) ໂຄງການສົ່ງເສີມຄວາມເປັນເຈົ້າການຂອງເດັກນ້ອຍ ແລະ ຊຸມຊົນໃນການປັບປຸງຄຸນນະພາບການສຶກສາ, ຊີວິດການເປັນຢູ່ ແລະ ສິ່ງແວດລ້ອມໄລຍະ II ໃນວັນທີ 31 ພຶດສະພາ 2023 ຜ່ານມາ, ຮ່ວມລົງນາມໂດຍ ທ່ານ ສີລິສັກ ຖະໜອມຮັກ ຫົວໜ້າພະແນກສຶກສາທິການ ແລະ ກິລາແຂວງ ແລະ ທ່ານນາງ ບົວລະເພັດ ຈຸນທະວົງ ຜູ້ອຳນວຍການສະມາຄົມພັດທະນາຊຸມຊົນບ້ານ.
ກອງປະຊຸມຈັດຂຶ້ນເພື່ອປະກອບສ່ວນເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ (2021-2025) ຂອງຂະແໜງການສຶກສາແນໃສ່ປັບປຸງຄຸນນະພາບການສຶກສາຂອງເດັກນ້ອຍ ແລະ ຊີວິດການເປັນຢູ່ຂອງປະຊາຊົນໃນເຂດຊົນນະບົດ ໂດຍຜ່ານຮູບແບບການປະສົມປະສານລະຫວ່າງການສຶກສາໃນ ແລະ ນອກໂຮງຮຽນ. ໂດຍການມີສ່ວນຮ່ວມຂອງເດັກນ້ອຍ ແລະ ໄວໜຸ່ມ ໂດຍສະເພາະການເຂົ້າເຖິງການສຶກສາທີ່ມີຄຸນນະພາບ ມີໂພຊະນາການທີ່ດີ ແລະ ມີຊີວິດການເປັນຢູ່ທີ່ດີຂຶ້ນ, ການປະຕິບັດໂຄງການໃນໄລຍະທີ I ແມ່ນໄດ້ຮັບການຮ່ວມມືຈາກພາກສ່ວນທີ່ກ່ຽວຂ້ອງເປັນຢ່າງດີ ເຮັດໃຫ້ໂຄງການປະສົບຜົນສຳເລັດຕາມແຜນທີ່ໄດ້ກຳນົດໄວ້ ຊຶ່ງໃນໄລຍະ II ໄດ້ມີການປັບປຸງແຜນກິດຈະກຳທີ່ເນັ້ນໜັກໃສ່ການປັບປຸງຄຸນນະພາບການຮຽນ-ການສອນຄື: ການສ້າງຫ້ອງສະໝຸດ, ສົ່ງເສີມວຽກງານການຮັກສາສິ່ງແວດລ້ອມໃນໂຮງຮຽນ ໂດຍຊຸກຍູ້ການມີສ່ວນຮ່ວມຂອງກຸ່ມໄວໜຸ່ມ, ສົ່ງເສີມການສ້າງລາຍຮັບໃຫ້ກັບຄອບຄົວທຸກຍາກ, ສົ່ງເສີມການຄຸ້ມຄອງເຄື່ອງປ່າຂອງດົງ, ປັບປຸງໂພຊະນາການໃນໂຮງຮຽນ ໂດຍການປູກຈິດສຳນຶກໃຫ້ນັກຮຽນໄດ້ຮຽນຮູ້ເລື່ອງໂພຊະນາການ ລວມທັງຮຽນຮູ້ການປຸງແຕ່ງແຜນກິດຈະກຳດັ່ງກ່າວ ໂດຍມີເປົ້າໝາຍສອດຄ່ອງກັບແຜນພັດທະນາຂອງແຂວງ ແລະ ນະໂຍບາຍຂອງລັດ, ໂດຍເລັ່ງໃສ່ 3 ຈຸດປະສົງຫຼັກຂອງໂຄງການຄື: 1. ສົ່ງເສີມປັບປຸງຄຸນນະພາບການສຶກສາ, 2. ສົ່ງເສີມໂພຊະນາການ, 3. ສົ່ງເສີມການວິໄຈສິ່ງແວດລ້ອມໃນໂຮງຮຽນ.
ໂຄງການດັ່ງກ່າວໄດ້ຈັດຕັ້ງປະຕິບັດກິດຈະກຳຢູ່ 4 ເມືອງຂອງແຂວງສາລະວັນຄື: ເມືອງສາລະວັນ, ເມືອງເລົ່າງາມ, ເມືອງຕະໂອ້ຍ ແລະ ເມືອງສະໝ້ວຍ ເປັນເວລາ 3 ປີເລີ່ມແຕ່ປີ 2023-2025 ໂດຍໄດ້ຮັບທຶນສະໜັບສະໜູນຈາກອົງການເຂົ້າຈີ່ເພື່ອປະຊາກອນໂລກມູນຄ່າ 393.700 ໂດລາ, ອົງການຟາດເຕັນເນັກຊັນ (ສະວິດເຊີແລນມູນ) ຄ່າ 343.700 ໂດລາ, ອົງການແຕເດຊອມ (ເຢຍລະມັນ) ມູນຄ່າ 50.000 ໂດລາ ແລະ ສະມາຄົມມິດຕະພາບ ແລະ ການສຶກສາອາຊີ (ຍີ່ປຸ່ນ) ມູນຄ່າ 42.600 ໂດລາ ລວມມູນຄ່າທັງໝົດ 830.000 ໂດລາ.
