ນາຍົກລັດຖະມົນຕີຍີ່ປຸ່ນເປີດເຜີຍແຜນທຸ້ມງົບ 2,5 ໝື່ນລ້ານໂດລາ ຮັບມືວິກິດອັດຕາເກີດຕໍ່າ
ນາຍົກລັດຖະມົນຕີ ຟູມິໂອະ ຄິຊິດະ ຂອງຍີ່ປຸ່ນ ເປີດເຜີຍແຜນທຸ້ມງົບປະມານ 2,5 ໝື່ນລ້ານໂດລາສະຫະລັດ ເພື່ອຂະຫຍາຍນະໂຍບາຍສະໜັບສະໜູນປະຊາຊົນໄວໜຸ່ມ ແລະ ຄອບຄົວຕ່າງໆ ໃນຄວາມພະຍາຍາມເພື່ອເພີ່ມອັດຕາການເກີດຂອງປະເທດໃນໄລຍະ 3 ປີຕໍ່ໜ້າ ຫລັງຈາກອັດຕາການເກີດຫລຸດຕໍ່າເປັນປະຫວັດສາດໃນໄລຍະຜ່ານມາ.
ທ່າທີຂອງທ່ານ ຄິຊິດະ ມີຂຶ້ນລະຫວ່າງກອງປະຊຸມຮ່ວມນໍາຄະນະລັດຖະບານ, ຜູ້ຊ່ຽວຊານ ແລະ ຜູ້ນຳຂະແໜງທຸລະກິດ ໃນວັນທີ 1 ມິຖຸນາ ເພື່ອຫາລືກ່ຽວກັບບັນຫາດັ່ງກ່າວ ໂດຍຜູ້ນໍາຍີ່ປຸ່ນກ່າວວ່າ: ກໍາລັງສະເໜີນະໂຍບາຍເພື່ອແກ້ໄຂບັນຫາອັດຕາການເກີດທີ່ຫລຸດລົງໃນລະດັບບໍ່ເຄີຍເກີດຂຶ້ນມາກ່ອນ ລວມທັງເດີນໜ້າເພີ່ມລາຍໄດ້ໃຫ້ປະຊາຊົນໃນການລ້ຽງລູກ.
ທັງນີ້, ງົບປະມານສ່ວນໜຶ່ງຕາມແຜນດັ່ງກ່າວຈະຖືກໃຊ້ສະໜັບສະໜູນໂດຍກົງສໍາລັບຜູ້ທີ່ມີລູກ ແລະ ເພີ່ມການຊ່ວຍເຫລືອທາງການເງິນສໍາລັບການສຶກສາ ແລະ ການເບິ່ງແຍງກ່ອນເກີດ ຕະຫລອດຈົນສົ່ງເສີມການເຮັດວຽກ ແລະ ການລາພັກເພື່ອລ້ຽງລູກ.
ເຖິງຢ່າງໃດກໍຕາມ, ການຂັບເຄື່ອນແຜນຮັບມືອັດຕາການເກີດຕໍ່າດັ່ງກ່າວຂອງທ່ານ ຄິຊິດະ ຍັງຜະເຊີນສຽງວິພາກວິຈານ ເນື່ອງຈາກບໍ່ສາມາດລະບຸແຫລ່ງເງິນທຶນທີ່ຈະແຈ້ງ ນອກຈາກການຕັດຄ່າໃຊ້ຈ່າຍງົບປະມານໃນພູດອື່ນ ແລະ ເພີ່ມການພັດທະນາເສດຖະກິດ.
ສໍາລັບຍີ່ປຸ່ນທີ່ມີປະຊາກອນ 125 ລ້ານຄົນ ຖືເປັນປະເທດພັດທະນາແລ້ວທີ່ຜະເຊີນບັນຫາອັດຕາການເກີດຕໍ່າຮຸນແຮງເປັນອັນດັບຕົ້ນໆຂອງໂລກ ໂດຍມີອັດຕາການເກີດໃໝ່ໜ້ອຍກວ່າ 8 ແສນຄົນໃນປີຜ່ານມາ ເຊິ່ງຕໍ່າທີ່ສຸດນັບແຕ່ເລີ່ມມີການບັນທຶກ. ຂະນະທີ່ຄ່າໃຊ້ຈ່າຍໃນການເບິ່ງແຍງປະຊາກອນສູງອາຍຸກໍາລັງເພີ່ມສູງຂຶ້ນ.
ຂະນະທີ່ຈໍານວນປະຊາກອນສູງອາຍຸຂອງຍີ່ປຸ່ນມີຫລາຍເປັນອັນດັບ 2 ຮອງຈາກໂມນາໂກ ໂດຍກົດໝາຍກວດຄົນເຂົ້າເມືອງທີ່ຂ້ອນຂ້າງເຂັ້ມງວດຍັງສົ່ງຜົນໃຫ້ຜະເຊີນບັນຫາການຂາດເຂີນແຮງງານເພີ່ມຂຶ້ນນໍາ.
ອ້າງອີງ:
https://www.channelnewsasia.com/…/japan-pm-kishida…
