ລັດຖະມົນຕີ ກະຊວງສຶກສາທິການ ແລະ ກິລາ ເນັ້ນໃຫ້ຜູ້ບໍລິຫານການສຶກສາແຂວງຫລວງນໍ້າທາ ເອົາໃຈໃສ່ພັດທະນາການສຶກສາໃຫ້ມີຄຸນນະພາບ

ໃນໂອກາດທີ່ ທ່ານ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ (ສສກ) ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຫລວງນ້ຳທາ ພ້ອມໄດ້ໂອ້ລົມຜູ້ບໍລິຫານການສຶກສາ ແລະ ກິລາແຂວງຫລວງນໍ້າທາ ໃນວັນທີ 29 ພຶດສະພາ 2023 ທີ່ສະໂມສອນໂຮງຮຽນ ມສ ກິນນອນຊົນເຜົ່າແຂວງ.

ທ່ານ ແກ້ວ ເຊືອຍສົມບັດ ຮອງຫົວໜ້າພະແນກສຶກສາທິການ ແລະ ກິລາແຂວງ ລາຍງານວ່າ: ປັດຈຸບັນທົ່ວແຂວງ ມີລັດຖະກອນສຶກສາ 2.986 ຄົນ, ຍິງ 1.606 ຄົນ, ມີອາສາສະໝັກ 147 ຄົນ, ຍິງ 83 ຄົນ, ມີໂຮງຮຽນອະນຸບານ 193 ແຫ່ງ, ໂຮງຮຽນສາມັນສຶກສາ 409 ແຫ່ງ, ມີຄູອາຈານ 2.404 ຄົນ, ຍິງ 1.242 ຄົນ, ມີນັກຮຽນ 40.610 ຄົນ, ຍິງ 19.215 ຄົນ. ການຈັດຕັ້ງປະຕິບັດ 12 ຄາດໝາຍຂອງຂະແໜງການສຶກສາ ແລະ ກິລາ ທີ່ສະພາແຫ່ງຊາດ ວາງອອກ ສາມາດບັນລຸໄດ້ 9 ຄາດໝາຍ ຄື: ເຂົ້າຮຽນສຸດທິໃໝ່ ປ.1 ປະຕິບັດໄດ້ 95,9% ຄາດໝາຍແມ່ນ 95,5%; ເລື່ອນຂັ້ນ ແລະ ຈົບຊັ້ນປະຖົມປະຕິບັດໄດ້ 95,6% ຄາດໝາຍແມ່ນ 95,5%; ດັດຊະນີສະເໝີພາບ ຍິງ-ຊາຍ ເລື່ອນຊັ້ນ ແຕ່ ປ.1-ມ.1 ປະຕິບັດໄດ້ 0,99% ຄາດໝາຍແມ່ນ 0,97%-1,03%; ເຂົ້າຮຽນໃໝ່ ມ.4 ປະຕິບັດໄດ້ 72,6% ຄາດໝາຍ 71,5%; ປະລະຊັ້ນປະຖົມ ປະຕິບັດໄດ້ 1,8% ຄາດໝາຍແມ່ນ 2,3%; ເລື່ອນຂັ້ນ ປ.5 ຂຶ້ນ ມ.1 ປະຕິບັດໄດ້ 87,9% ຄາດໝາຍແມ່ນ 86,5%; ປະລະ ມ.ຕົ້ນ ປະຕິບັດໄດ້ 8,2% ຄາດໝາຍແມ່ນ 9%; ປະຊາກອນໜຸ່ມ ແລະ ຜູ້ປະລະໄດ້ບໍາລຸງຜ່ານການສຶກສານອກໂຮງຮຽນ ແລະ ຝຶກອົບຮົມວິຊາຊີບ ປະຕິບັດໄດ້ 1.242 ຄົນ ຄາດໝາຍ 936 ຄົນ; ສົ່ງເສີມມວນຊົນທຸກເພດໄວເຂົ້າຮ່ວມການອອກກຳລັງກາຍ ແລະ ຫລິ້ນກິລາເພື່ອສຸຂະພາບ ປະຕິບັດໄດ້ 21,16% ຄາດໝາຍແມ່ນ 19%. ສຳລັບຄາດໝາຍທີ່ໃກ້ຈະບັນລຸ 1 ຄາດໝາຍແມ່ນການປະລະຂອງນັກຮຽນ ປ.1 ປະຕິບັດໄດ້ 2,6% ຄາດໝາຍແມ່ນ 2,5%; ຄາດໝາຍທີ່ບໍ່ບັນລຸ 2 ຄາດໝາຍແມ່ນອັດຕາເຂົ້າຮຽນເດັກໃນຊັ້ນການສຶກສາກ່ອນໄວຮຽນ 5 ປີ ປະຕິບັດໄດ້ 83,8% ຄາດໝາຍແມ່ນ 85%; ເຂົ້າຮຽນໃໝ່ ປ.5 ປະຕິບັດໄດ້ 98,4% ຄາດໝາຍແມ່ນ 100%.

ໂອກາດນີ້, ທ່ານ ລັດຖະມົນຕີ  ສສກ ສະແດງຄວາມຍ້ອງຍໍຊົມເຊີຍຕໍ່ຜົນງານຂອງຄູອາຈານ ທີ່ຍາດໄດ້ໃນໄລຍະຜ່ານກໍຄືປັດຈຸບັນ, ພ້ອມທັງເນັ້ນໃຫ້ຜູ້ບໍລິຫານການສຶກສາ ແລະ ກິລາແຂວງ ໃຫ້ເອົາໃຈໃສ່ຫລາຍບັນຫາເປັນຕົ້ນແມ່ນໃຫ້ມີຄວາມອົດທົນຕັດສິນໃຈຜ່ານຜ່າບັນຫາອຸປະສັກຕ່າງໆເຫັນໄດ້ ແລະ ເຂົ້າໃຈສະພາບລວມຂອງໂລກ ທັງເພີ່ມຄວາມຮັບຜິດຊອບການບໍລິຫານການຄຸ້ມຄອງ, ສ້າງຄວາມເຂັ້ມແຂງປັບປຸງນິຕິກຳ, ເຂົ້າຮ່ວມປັບປຸງກໍ່ສ້າງຄູໃຫ້ໄດ້ຄຸນນະພາບມາດຕະຖານ, ເພີ່ມຄວາມຮັບຜິດຊອບຕໍ່ການສິດສອນໃຫ້ໄປຕາມຫລັກການ, ມີຫລາຍຮູບແບບ, ຫລາຍວິທີສິດສອນ, ປະເມີນຄູແມ່ນໃຫ້ເບິ່ງຄຸນນະພາບຂອງນັກຮຽນ. ພ້ອມນີ້ກໍໃຫ້ເອົາໃຈໃສ່ເລື່ອງສະພາບແວດລ້ອມຂອງແຕ່ລະໂຮງຮຽນ ເພື່ອໃຫ້ໂຮງຮຽນຕ້ອງເປັນໂຮງຮຽນສີຂຽວ ທັງຮັບປະກັນບ້ານ- ເມືອງຕ້ອງມີສູນອອກກໍາລັງກາຍ ເພາະຄົນເຮົາສະຕິປັນຍາຈະດີ ສຸຂະພາບຈະແຂງແຮງ ຕ້ອງມີສະພາບແວດລ້ອມສະອາດ ແລະ ຕ້ອງໄດ້ອອກກຳລັງກາຍຢ່າງສະໝ່ຳສະເໝີ.

ຂ່າວ: ສກຂ ຫລວງນ້ຳທາ