ນ້ຳກ້ອນລະລາຍ ຫລາຍກວ່າປົກກະຕິ ອາດເປັນໄພຂົ່ມຂູ່ທົ່ວໂລກ

ສຳນັກຂ່າວຕ່າງປະເທດ ລາຍງານຈາກ ເມືອງເຈນີວ່າ ປະເທດ ສະວິດເຊີແລນ ໃນວັນທີ 31 ພຶດສະພາ 2023 ຜ່ານມາວ່າ: ອົງການ ອຸຕຸນິຍົມໂລກ (WMO) ປະກາດ ການກຳນົດໃຫ້ສ່ວນຂອງໂລກທີ່ປົກຄຸມດ້ວຍ ນ້ຳກ້ອນ ຫລື ຫິມະ ເປັນຄວາມສຳຄັນ ສູງສຸດອັນໃໝ່ ເນື່ອງຈາກນ້ຳກ້ອນໃນທະເລ,  ເກີດປາກົດການລະລາຍຫລາຍກວ່າ ປົກກະຕິອາດເປັນໄພຂົ່ມຂູ່ທົ່ວໂລກ ສົ່ງຜົນໃຫ້ ລະດັບນ້ຳທະເລ ເພີ່ມຂຶ້ນ, ລະບົບນິເວດ ແລະ ເສດຖະກິດ ລວມທັງ ປະເທດໃນພາກພື້ນ ທີ່ຢູ່ຫ່າງໄກ ຈາກບໍລິເວນ ຂົ້ວໂລກເຊັ່ນ: ຄາຣິບຽນ(Caribbean) ແລະ ອາຟຣິກາ ກໍເປັນຫ່ວງ ເຊັ່ນກັນວ່າ ການປ່ຽນແປງຂອງການລະລາຍນ້ຳກ້ອນໄວຂຶ້ນຈະສົ່ງຜົນກະທົບທົ່ວໂລກບໍ່ພຽງແຕ່ຂົ້ວໂລກເໜືອ ແລະ ຂົ້ວໂລກໃຕ້ ເທົ່ານັ້ນ ກາຍເປັນບັນຫາໃຫຍ່ ທົ່ວໂລກທີ່ຕ້ອງໄດ້ຮັບການແກ້ໄຂຢ່າງຮີບດ່ວນ.
ການລະລາຍ ຂອງພູເຂົານ້ຳກ້ອນກັບແຜ່ນນ້ຳກ້ອນ ບໍລິເວນ ກຣີນແລນ ແລະ ແອນຕາກຕິກາ ມີອັດຕາສ່ວນປະມານ 50% ຂອງການເພີ່ມຂຶ້ນ ຢ່າງວ່ອງໄວຂອງລະດັບນ້ຳທະເລ ຈະສົ່ງຜົນກະທົບຫລາຍຂຶ້ນຕໍ່ປະເທດກຳລັງພັດທະນາ ທີ່ເປັນເກາະຂະໜາດນ້ອຍ ແລະ ພື້ນທີ່ແຄມຝັ່ງ ທີ່ມີປະຊາກອນໜາແໜ້ນ. ຂະນະດຽວກັນການລະລາຍຂອງຊັ້ນດິນແຊ່ແຂງບໍລິເວນ ອາກຕິກຍັງເຮັດໃຫ້ເກີດ ການປ່ອຍອາຍແກັສ ເຮືອນແກ້ວ ປະລິມານຫລາຍຂຶ້ນ ເນື່ອງຈາກການກັກເກັບ ຄາບອນ ຫລາຍຍກວ່າ 2 ເທົ່າ ຂອງປະລິມານ ທີ່ມີຢູ່ ໃນຊັ້ນບັນຍາກາດໂລກໃນທຸກວັນນີ້.