ສາວໄທ ເລົ່າປະສົບການ ເປັນພະຍາດແພ້ພູມຕົນເອງ ຫລັງພັກຜ່ອນບໍ່ພຽງພໍ ກິນອາຫານທີ່ບໍ່ມີປະໂຫຍດ

ວັນທີ 31 ພຶດສະພາ 2023 ຜ່ານມາ, ມີຜູ້ໃຊ້ເຟສບຸກ ໄດ້ໂພສເລື່ອງລາວເຕືອນສະຕິ ໃຜທີ່ມັກອົດນອນ-ພັກຜ່ອນບໍ່ພຽງພໍ , ກິນອາຫານບໍ່ມີປະໂຫຍດ, ບໍ່ອອກກຳລັງກາຍ, ບໍ່ດູແລສຸຂະພາບ ໃຫ້ເບິ່ງເປັນຕົວຢ່າງ ຫລັງພົບວ່າຕົນເອງເປັນພະຍາດພູມຄຸ້ມກັນບົກພ່ອງ, ພູມແພ້ຜິວໜັງອັກເສບ ຫລື ເອີ້ນວ່າ ພະຍາດແພ້ພູມຕົນເອງ ຈົນເຮັດໃຫ້ຮ່າງກາຍເສຍໂສມ ຜິວໜັງອັກເສບ, ມີຜື່ນແດງຕາມຮ່າງກາຍ, ແລະ ມີເລືອດຊຶມອອກມາທາງຜິວໜັງ ຈົນບໍ່ກ້າອອກໄປພົບປະກັບຜູ້ຄົນ.

ຍິງສາວຄົນດັ່ງກ່າວ ມີອາຍຸ 24 ປີ ໃຊ້ຊີວິດຢູ່ກັບແມ່ 2 ຄົນ , ພໍ່ເສຍຊີວິດຕັ້ງແຕ່ອາຍຸ 3 ປີ , ພໍຕົນໄດ້ອາຍຸ 10 ປີ ໄດ້ໄປຂາຍເຄື່ອງຊ່ວຍພີ່ນ້ອງຢູ່ຕາມຕະຫລາດນັດ ເພື່ອຫາເງິນຮຽນ, ຕ້ອງປິດຮ້ານ 12 ໂມງກາງຄືນ ແລະ ຕ້ອງຕື່ນເຊົ້າໄປໂຮງຮຽນ ນອກນັ້ນຍັງກິນອາຫານທີ່ບໍ່ມີປະັໂຫຍດ, ບໍ່ອອກກຳລັງກາຍ.

ຕົນເອງໃຊ້ຊີວິດແບບນີ້ມາຫລາຍປີ ຈົນຮຽນຈົບຈຶ່ງໄປສະໝັກເປັນພະນັກງານ ໄລຍະນັ້ນໂຄວິດ-19 ກຳລັງລະບາດໜັກ ທາງບໍລິສັດໃຫ້ສັກຢາວັກຊີນ ແຕ່ຕົນເອງບໍ່ຂໍສັກເພາະຮູ້ແລ້ວວ່າຕົນເອງເປັນພູມແພ້ ແຕ່ກົດຂອງບໍລິສັດຄືຕ້ອງສັກ ຈຶ່ງຕັດສິນໃຈສັກ 2 ເຂັມທຳອິດ ເປັນວັກຊີນ ຊີໂນຟາມ.

ແຕ່ຫລັງຈາກສັກຢາແລ້ວ ເລີ່ມມີຜື່ນແດງຂຶ້ນເຕັມໂຕ ຕົນເອງຈຶ່ງໄປຫາໝໍຜິວໜັງ ທ່ານໝໍບອກວ່າເປັນພະຍາດແພ້ພູມຕົນເອງ ລັກສະນະພູມແພ້ດ້ານຜິວໜັງອັກເສບ ຕ້ອງໃຊ້ຢາສະເຕຣອນເພື່ອກົດພູມຄຸ້ມກັນ.

ໄລຍະທຳອິດທີ່ໃຊ້ຢາກໍເລີ່ມດີຂຶ້ນ ແຕ່ພໍໄປສັກຢາເຂັມສຸດທ້າຍ ຮ່າງກາຍກໍຊຸດລົງອີກຄັ້ງ ຄັ້ງນີ້ໜັກກວ່າທຸກຄັ້ງ ມີຜື່ນຂຶ້ນເຕັມໂຕ ຂຶ້ນທຸກມຸມຂອງຮ່າງກາຍ, ມີເລືອດໄຫລຊຶມອອກມາຕາມຜິວໜັງ ຕອນນັ້ນເຖິງຂັ້ນນອນຕິດຕຽງຊ່ວຍເຫລືອຕົນເອງບໍ່ໄດ້.

ມາຮອດປັດຈຸບັນອາການເລີ່ມດີຂຶ້ນ ແຕ່ຍັງຕ້ອງໃຊ້ຢາສະເຕຣອຍ ເພື່ອກົດພູມຄຸ້ມກັນໄວ້ ປະກອບກັບຢາແຜນໂບຮານເຂົ້າມາປິ່ນປົວຊ່ວຍ ຈົນອາການເລີ່ມດີຂຶ້ນ ແຕ່ບໍ່ສາມາດກິນໄດ້ຕາມໃຈປາກຄືແຕ່ກ່ອນ, ເຄີຍຄິດຂ້າໂຕຕາຍມາຫລາຍຄັ້ງແຕ່ມີແມ່ຄອຍໃຫ້ກຳລັງໃຈ ຈຶ່ງນຳເອົາປະສົບການນີ້ມາໃຫ້ທຸກຄົນໄດ້ຮູ້ວ່າໃຊ້ຊີວິດຢ່າງມີສະຕິ, ດູແລສຸຂະພາບຕົນເອງ ເລືອກກິນແຕ່ອາຫານທີ່ມີປະໂຫຍດ, ອອກກຳລັງກາຍໃຫ້ສະໝໍ່າສະເໝີ.