ຣຽວ ມາດຣິດ ເປີດໂຕະເຈລະຈາ ຟີມີໂນ ຫລັງອາດຈະເສຍ ເບນເຊມາ

ຣຽວ ມາດຣິດ ເດີນໜ້າເປີດການເຈລະຈາກັບ ໂຣແບໂຕ ຟີມີໂນ ອະດີດດາວຍິງ ລີເວີພູລ ແລ້ວ ທ່າມກາງກະແສຂ່າວວ່າພວກເຂົາອາດຕ້ອງເສຍ ຄາຣິມ ເບນເຊມາ  ຍອດດາວຍິງຊາວຝຣັ່ງຍ້າຍອອກຢ່າງສຸດຊ໊ອກໃນລະດູການນີ້.

ທີມຊຸດຂາວຂອງ ຄາໂລ ອັນເຊລັອດຕິ ມີລະດູການທີ່ບໍ່ຄ່ອຍດ່ ໂດຍເຖິງຈະຄອງແຊ໊ມ 3 ລາຍການເຊັ່ນ ຢູຟາ ຊຸບເປີ ຄັບ, ສະໂມສອນໂລກ ແລະ ໂກປາ ເດລ ເຣ ແຕ່ກໍຕ້ອງພາດແຊ໊ມ ລາ ລີກາ ລວມເຖິງ ຢູຟາ ແຊ໊ມປຽນ ລີກ ໂດຍສະເພາະໃນລີກທີ່ຍັງບໍ່ແນ່ນອນວ່າຈະຈົບອັນດັບ 2 ຫລື 3.

ຂ່າວຮ້າຍຂອງ ຣຽວ ມາດຣິດ ຍັງຕາມຕິດຕໍ່ເນື່ອງ ດ້ວຍປະເດັນ ເບນເຊມາ ດາວຍິງຕົວເປົ້າເບີ 1 ຂອງທີມອາດຕັດສິນໃຈອຳລາທີມ ປິດຕຳນານລ່າຕາໜ່າງໃນ ຊານຕີອາໂກ ເບນາເບວ ໄວ້ທີ່ 14 ປີ ເມື່ອສິ້ນສຸດສັນຍາ ສະບັບປັດຈຸບັນໃນວັນທີ 30 ມິຖຸນາ ພາຍຫລັງໄດ້ຮັບຂໍ້ສະເໜີຄ່າຈ້າງມະຫາສານ 200 ລ້ານຢູໂລ ຈາກສະໂມສອນທີ່ບໍ່ເປີດເຜີຍຊື່ໃນຊາອຸດິອາຣະເບຍ.

ກໍລະນີ ເຮັດໃຫ້ ຣຽວ ມາດຣິດ ຕ້ອງອອກລ່າສູນໜ້າຕົວເປົ້າລາຍໃຫມ່ມາເສີມທີມໃຫ້ໄດ້ໃນລະດູການນີ້ ຫລັງຈາກລະດູການຜ່ານມາ ຕ້ອງເລື່ອນເອົາຕົວແຄມເສັ້ນຢ່າງ ໂຣດຣີໂກ ໂກເອສ ເຂົ້າມາຢືນໜ້າເປົ້າຈຳເປັນໃນຕອນທີ່ ເບນເຊມາ ບໍ່ພ້ອມລົງສະໜາມ.

ສຳລັບ ກອງໜ້າຊາວບຣາຊິລ ອາຍຸ 31 ປີ ເຊິ່ງຖືກເຊື່ອມໂຍງກັບບາເຊໂລນາ ນຳອີກ ລົງຫລິ້ນກັບ ລີເວີພູລ ທັງຫມົດ 362 ນັດ ຍິງໄປ 111 ປະຕູດ້ວຍກັນ ແລະ ເຖິງຈະປະກາດອຳລາລີເວີພູລເມື່ອສັນຍາຫມົດ ເອົາໄວ້ແຕ່ດົນໆ ລາວກໍບໍ່ໄດ້ຕົກລົງຈະເຊັນຍ້າຍເຂົ້າທີມໃດຈະເຖິງຕອນນີ້.