ນ້ອງສາວຜູ້ນໍາ ສປປ ເກົາຫລີ ໃຫ້ຄຳໝັ້ນ ຈະສົ່ງດາວທຽມສອດແນມທາງທະຫານສູ່ອະວະກາດອີກໃນມໍ່ໆນີ້

ສໍານັກຂ່າວກາງເກົາຫລີ (KCNA) ລາຍງານໃນວັນທີ 1 ມິຖຸນາວ່າ: ນາງ ກິມໂຢຈອງ ນ້ອງສາວຂອງທ່ານ ກິມຈອງອຸນ ຜູ້ນໍາສູງສຸດຂອງ ສປປ ເກົາຫລີ ໄດ້ປະກາດວ່າ: ດາວທຽມສອດແນມທາງທະຫານຂອງ ສປປ ເກົາຫລີ ຈະຖືກປ່ອຍຂຶ້ນສູ່ວົງໂຄຈອນໂລກໃນມໍ່ໆນີ້. ພ້ອມທັງໃຫ້ຄຳໝັ້ນວ່າ: ລັດຖະບານພຽງຢາງຈະເພີ່ມການເຝົ້າລະວັງທາງທະຫານ ແລະ “ພ້ອມຈະເຮັດທຸກວິທີທາງເພື່ອປົກປ້ອງສິດອະທິປະໄຕ ແລະ ຜົນປະໂຫຍດຂອງຕົນ”.

ທ່າທີຂອງນາງ ກິມໂຢຈອງ ມີຂຶ້ນຫລັງຈາກ ສປປ ເກົາຫລີ ປະສົບຄວາມລົ້ມເຫລວໃນການສົ່ງດາວທຽມສອດແນມທາງທະຫານສູ່ອະວະກາດໃນວັນທີ 31 ພຶດສະພາ ໂດຍ KCNA ລາຍງານກ່ອນໜ້ານີ້ວ່າ: ຈະຫລວດທີ່ບັນທຸກດາວທຽມສອດແນມທາງທະຫານ Malligyong-1 ຕົກລົງໃນທະເລຫລັງຈາກເກີດອຸບັດຕິເຫດ.

ນອກຈາກນີ້, ໃນລາຍງານຫລ້າສຸດຂອງ KCNA ຍັງມີການເຜີຍແຜ່ພາບຂອງຈະຫລວດລຸ້ນໃໝ່ຊື່ວ່າ: Chollima-1 ທີ່ຖືກປ່ອຍອອກຈາກຖານປ່ອຍຈະຫລວດຢູ່ບໍລິເວນຊາຍຝັ່ງ ເຊິ່ງເຮັດໃຫ້ເກີດເປວໄຟ ແລະ ຄວັນຈໍານວນຫລາຍ. ຂະນະທີ່ລັກສະນະຂອງຈະຫລວດນັ້ນຊັດເຈນວ່າເປັນຈະຫລວດສໍາລັບສົ່ງດາວທຽມສູ່ອະວະກາດ.

ເຖິງຢ່າງໃດກໍຕາມ, ທ່ານ ອັນໂຕນິໂອ ກູເຕເຣສ ເລຂາທິການອົງການສະຫະປະຊາຊາດ (UN) ໄດ້ສະແດງທ່າທີຕໍ່ການສົ່ງດາວທຽມຂອງພຽງຢາງ ໂດຍໃຊ້ເຕັກໂນໂລຊີລູກສອນໄຟ ຖືເປັນການລະເມີດມະຕິຂອງສະພາຄວາມໝັ້ນຄົງແຫ່ງສະຫະປະຊາຊາດ (UNSC).

ອ້າງອີງ:

http://www.channelnewsasia.com/…/north-korea-kim-yo…