ຢາສູບໄຟຟ້າ ອັນຕະລາຍຕໍ່ສຸຂະພາບ

ຢາສູບໄຟຟ້າເປັນອຸປະກອນສູບຢາຊະນິດໜຶ່ງ ທີ່ໃຊ້ກົນໄກໄຟຟ້າເຮັດໃຫ້ເກີດຄວາມຮ້ອນ ແລະ ອາຍນໍ້າ ເຊິ່ງຈະເຮັດໃຫ້ບໍ່ມີຄວັນຈາກຂະບວນການເຜົາໄໝ້ຄືກັບຢາສູບທົ່ວໄປ ທີ່ປະກອບດ້ວຍ ສານເຄມີຫລາຍຊະນິດ ເປັນຕົ້ນແມ່ນ ສານນິໂຄຕິນ, ໂພໄພລິນໄກຄໍລ (Propylene Glycol), ກີເຊີລິນ, ສານແຕ່ງກິ່ນ ແລະ ລົດຊາດ
.
ສານນິໂຄຕິນ ທີ່ມີຢູ່ໃນຢາສູບໄຟຟ້າມີຜົນຕໍ່ສຸຂະພາບດັ່ງນີ້:

• ສົ່ງຜົນຕໍ່ລະບົບປະສາດສ່ວນກາງ: ວິນຫົວ, ລະບົບການນອນຜິດປົກກະຕິ, ເຈັບຫົວ ແລະ ສົ່ງຜົນຕໍ່ການໄຫລວຽນຂອງເລືອດ
• ສົ່ງຜົນຕໍ່ລະບົບຍ່ອຍອາຫານ: ເຮັດໃຫ້ເກີດບາດແຜໃນກະເພາະອາຫານ, ທ້ອງລ່ວງ, ປວດຮາກ, ກົດໄຫລຢ້ອນ, ອາຫານບໍ່ຍ່ອຍ ແລະ ມະເຮັງ
• ສົ່ງຜົນຕໍ່ລະບົບກ້າມຊີ້ນ: ການເສື່ອມສະພາບຂອງກະດູກສັນຫລັງ, ເຈັບຕາມຂໍ້ ແລະ ການສັ່ນຂອງຮ່າງກາຍ
• ສົ່ງຜົນຕໍ່ລະບົບຫົວໃຈ ແລະ ເສັ້ນເລືອດ: ພາວະເສັ້ນເລືອດແຂງ ແລະ ເພີ່ມໂອກາດການເກາະຕົວເປັນກ້ອນໃນກະແສເລືອດ, ອັດຕາການເຕັ້ນຂອງຫົວໃຈຜັນແປ, ຄວາມດັນເພີ່ມຂຶ້ນ, ຫົວໃຈເຕັ້ນໄວ-ຜິດຈັງຫວະ
• ສົ່ງຜົນຕໍ່ລະບົບຫາຍໃຈ: ຫາຍໃຈຖີ່, ພະຍາດປອດອັດຕັນຊໍາເຮື້ອ, ຫລອດລົມຫົດ ແລະ ມະເຮັງ