ຄະນະນັກກິລາລອຍນໍ້າຄົນພິການລາວ ພ້ອມຈະສ້າງຜົນງານໃຫ້ປະເທດຊາດ ໃນອາຊຽນ ພາຣາເກມ

ຄະນະນັກກິລາລອຍນໍ້າຄົນພິການທີມຊາດລາວ ພ້ອມແລ້ວທີ່ຈະເຂົ້າຮ່ວມສ້າງຜົນງານໃຫ້ແກ່ປະເທດຊາດ ໃນການແຂ່ງຂັນກິລາລອຍນ້ຳ ງານມະຫະກຳກິລາຄົນພິການອາຊຽນ ຄັ້ງທີ 12 ຫຼື ອາຊຽນ ພາຣາເກມ ທີ່ປະເທດກຳປູເຈຍ ລະຫວ່າງວັນທີ 3-9 ພຶດສະພາ 2023 ຊຶ່ງກິລາລອຍນໍ້າ ຈະມີການຊີງໄຊທັງໝົດ 200 ກວ່າລາຍການ ສຳລັບລອຍນໍ້າຄົນພິການລາວ ສົ່ງນັກກິລາ 7 ຄົນ, ຍິງ 2 ຄົນ ຮ່ວມຊີງໄຊ 35 ລາຍການ.

ໃນການແຂ່ງຂັນງານກິລາອາຊຽນ ພາຣາເກມ ຄັ້ງທີ 12, ປີນີ້ ສປປ ລາວ ສົ່ງທັບນັກກິລາຄົນພິການທີມຊາດລາວ ຈຳນວນ 89 ຄົນ, ຍິງ 36 ຄົນ ຈາກ 7 ປະເພດກິລາ ໃນນີ້ສະເພາະນັກກິລາລອຍນໍ້າຄົນພິການທີມຊາດລາວ ສົ່ງເຂົ້າຮ່ວມ ທັງໝົດ 11 ຄົນ, ຄະນະນຳ 1 ຄົນ, ຄະນະຄູຝຶກ 3 ຄົນ ແລະ ນັກກິລາ 7 ຄົນ, ຍິງ 2 ຄົນ ຊຶ່ງທັງໝົດໄດ້ມີິການເກັບຕົວຝຶກຊ້ອມ ຕັ້ງແຕ່ສຳເລັດການແຂ່ງຂັນງານກິລາ ຊຽງຂວາງ ພາຣາເກມ ຈັດຂຶ້ນເມື່ອເດືອນມີນາ 2023 ຜ່ານມາ.

ໂອກາດນີ້, ທ່ານ ວອນລະຈິດ ລັດດາໄຊ ຜູ້ຊ່ວຍຄູຝຶກລອຍນໍ້າຄົນພິການທີມຊາດລາວ ໃຫ້ສຳພາດວ່າ: ພາຍຫຼັງທີ່ໄດ້ມີການແຂ່ງຂັນສຳເລັດ ໃນງານກິລາ ຊຽງຂວາງ ພາຣາເກມ ຜ່ານມາ ພວກເຮົາກໍໄດ້ມີການຄັດລືອກເອົານັກກິລາໃນຈຳນວນ 7 ຄົນ, ຍິງ 2 ຄົນ ທີ່ມີຜົນງານພົ້ນເດັ່ນໃນການຄວ້າຫຼຽນຄຳ ໃນງານກິລາດັ່ງກ່າວ ມາຮັບໃຊ້ທີມຊາດ ເພື່ອກຽມເຂົ້າຮ່ວມ ອາຊຽນ ພາຣາເກມ ທີ່ປະເທດກຳປູເຈຍ ມີການເກັບຕົວຝຶກຊ້ອມຢ່າງເປັນປົກກະຕິຈົນມາຮອດປັດຈຸບັນ ສາມາດເວົ້າໄດ້ວ່ານັກກິລາມີການພັດທະນາດີຂຶ້ນຫຼາຍ ໂດຍມາເບິ່ງສະຖິຕິຂອງເຂົາເຈົ້າແມ່ນດີຂຶ້ນຫຼາຍ ແລະ ມີໂອກາດທີ່ຈະສ້າງຜົນງານໃຫ້ແກ່ປະເທດຊາດໃນການຄວ້າຫຼຽນໃດຫຼຽນໜຶ່ງ. ແນວໃດເກໍຕາມ, ກິລາລອຍນໍ້າ ອາຊຽນ ພາຣາເກມ ຈະມີການຊີງໄຊກັນເຖິງ 200 ກວ່າລາຍການ ສະເພາະ ລອຍນໍ້າຄົນພິການລາວ ແມ່ນສົ່ງເຂົ້າຮ່ວມ 7 ຄົນ ຈາກ 35 ລາຍການ ກໍຄື ນັກກິລາຄົນໜຶ່ງຈະໄດ້ລົງແຂ່ງຂັນຄົນລະ 5 ລາຍການ ສະນັ້ນ ຂໍຝາກເຖິງບັນດາພໍ່ແມ່ປະຊາຊົນຊາວລາວ ສົ່ງກຳລັງໃຈມາເຊຍພວກເຮົາດ້ວຍ ຂໍໃຫ້ຄຳໝັ້ນສັນຍາວ່າຈະພະຍາຍາມເຮັດໃຫ້ດີທີ່ສຸດເພື່ອຜົນງານທີ່ດີໃຫ້ແກ່ປະເທດຊາດ.

ສ່ວນ ນາງ ປອງສະຫວັນ ຫງົບສະຫວັນ ນັກກິລາລອຍນໍ້າຄົນພິການຂາ ຈາກແຂວງເຊກອງ ທີ່ສາມາດສ້າງຜົນງານຄວ້າ 2 ຫຼຽນຄຳ ຈາກລາຍການ 100 ແມັດຍິງ ແລະ 200 ແມັດຍິງ ແລະ 1 ຫຼຽນເງິນ ລອຍທ່າກົບ 50 ແມັດຍິງ ໃນຊຽງຂວາງ ພາຣາເກມ ກໍໃຫ້ສຳພາດວ່າ: ໂດຍສ່ວນຕົວນ້ອງມີຄວາມຮູ້ສຶກດີໃຈ ແລະ ພາກພູມໃຈຫຼາຍທີ່ໄດ້ຮັບໃຊ້ປະເທດຊາດ ແລະ ກໍໄດ້ຕັ້ງຄວາມຫວັງໄວ້ສູງຢາກຈະສ້າງຜົນງານໃຫ້ແກ່ປະເທດຊາດ ນ້ອງ ແລະ ໝູ່ເພື່ອນອ້າຍເອື້ອຍໃນນາມທີມຊາດທຸກຄົນແມ່ນໄດ້ມີຄວາມມຸ່ງໝັ້ນ ແລະ ເປັນຈິດໜຶ່ງໃຈດຽວຕັ້ງໜ້າຝຶກຝົນຫຼໍ່ຫຼອມ ເພື່ອພັດທະນາຕົນເອງໃຫ້ມີສະຖິຕິທີ່ດີຂຶ້ນໄປທີ່ລະຂັ້ນ ເວລານີ້ ສາມາດເວົ້າໄດ້ວ່ານັກກິລາທຸກຄົນແມ່ນພ້ອມທີ່ຈະລົງສະ ເພື່ອໄລ່ຫຼຽນເປັນຜົນງານໃຫ້ແກ່ປະເທດຊາດ.

ສຳລັບທັບນັກກິລາຄົນພິການລາວ ໃນຈຳນວນ 7 ປະເພດ ທີ່ຈະເຂົ້າຮ່ວມ ອາຊຽນ ພາຣາເກມ ຄັ້ງນີ້ ປະກອບມີ ຄື: ແລ່ນ-ລານ ລວມ 11 ຄົນ, ນັກກິລາ 7 ຄົນ, ຍິງ 2 ຄົນ; ລອຍນ້ຳ ລວມ 11 ຄົນ, ນັກກິລາ 7 ຄົນ, ຍິງ 2 ຄົນ; ຍົກນ້ຳໜັກ ລວມ 6 ຄົນ, ນັກກິລາ 3 ຄົນ, ຍິງ 1 ຄົນ; ໂກນບານຍິງ ລວມ 10 ຄົນ, ນັກກິລາ 6 ຄົນ; ບັອດເຊຍ ລວມ 7 ຄົນ, ນັກກິລາ 3 ຄົນ, ຍິງ 1 ຄົນ; ບານບ້ວງລໍ້ເລື່ອນຍິງ ລວມ 13 ຄົນ, ນັກກິລາ 9 ຄົນ ແລະ ກິລາບານເຕະຄົນພິການຕາ ລວມ 15 ຄົນ, ນັກກິລາ 10 ຄົນ ລວມຜູ້ເຂົ້າຮ່ວມທັງໝົດ 89 ທ່ານ, ຍິງ 36 ທ່ານ, ໃນນັ້ນ ຄະນະນຳ 11 ທ່ານ, ຍິງ 6 ທ່ານ, ແພດ-ນັກຂ່າວ 5 ທ່ານ, ຍິງ 2 ທ່ານ, ຄູຝຶກ-ຜູ້ຊ່ວຍຄູຝຶກ 28 ທ່ານ, ຍິງ 7 ທ່ານ ແລະ ນັກກິລາທັງໝົດ 45 ຄົນ, ຍິງ 21 ຄົນ.

ຂໍ້ມູນ-ຮູບພາບ: ໜັງສືພິມສຶກສາ-ກິລາລາຍວັນ