ຮອງປະທານສະພາ ເນັ້ນໃຫ້ກະຊວງອຸດສາຫະກຳ ແລະ ການຄ້າ ເອົາໃຈໃສ່ບັນຫາພົ້ນເດັ່ນເຄັ່ງຮ້ອນທີ່ສັງຄົມໃຫ້ຄວາມສົນໃຈ

ວັນທີ 29 ພຶດສະພາ 2023 ທີ່ກະຊວງອຸດສາຫະກໍາ ແລະ ການຄ້າ, ທ່ານ ສົມມາດ ພົລເສນາ, ຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ມາເຄື່ອນໄຫວ ຕິດຕາມ ແລະ ຊຸກຍູ້ ການປະຕິບັດມະຕິ ແລະ ຄໍາຊັກຖາມ ຂອງສະມາຊິກສະພາແຫ່ງຊາດ ແລະ ຊີ້ນໍາ ວຽກງານອຸດສາຫະກໍາປຸງແຕ່ງ ແລະ ການຄ້າ ຢູ່ ກະຊວງອຸດສາຫະກໍາ ແລະ ການຄ້າ.

ກອງປະຊຸມໄດ້ຮັບຟັງການລາຍງານໂດຍຫຍໍ້ ກ່ຽວກັບການຈັດຕັ້ງປະຕິບັດວຽກງານສໍາຄັນ ຂອງກະຊວງອຸດສາຫະກໍາ ແລະ ການຄ້າ ຄື: 1. ການສະໜອງສິນເຊື່ອຂອງກອງທຶນ SME, ແລະ ຂໍ້ເຈາະຈິ້ມ ກ່ຽວກັບໂຄງການສິນເຊື່ອດອກເບ້ຍຖົມຂຸມໃຫ້ບັນດາຫົວໜ່ວຍ SME ແລະ ກຸ່ມຜະລິດ; 2. ວຽກງານການຄ້າຊາຍແດນ ແລະ ການນຳເຂົ້າ ແລະ ສົ່ງອອກ; 3. ການຊຸກຍູ້ການຊຳລະສະສາງດ້ານການຄ້າ ຜ່ານລະບົບທະນາຄານ ລວມທັງ ການຊຳລະການຄ້າກັບຕ່າງປະເທດ ແລະ ທິດທາງແຜນການໃນຕໍ່ໜ້າ; 4. ການຄຸ້ມຄອງລາຄາສິນຄ້າ ແລະ ການສະໜອງນໍ້າມັນ; ແລະ 5. ການສົ່ງເສີມການຜະລິດພາຍໃນ. ຊຶ່ງທັງໝົດນີ້ ລ້ວນແລ້ວແຕ່ເປັນບັນຫາພົ້ນເດັ່ນ ແລະ  ເຄັ່ງຮ້ອນ ທີ່ສະພາແຫ່ງຊາດ ກໍຄືສັງຄົມໃຫ້ຄວາມສົນໃຈ.

ຜ່ານການຮັບຟັງການລາຍງານບັນຫາພົ້ນເດັ່ນ ຈາກກະຊວງອຸດສາຫະກໍາ ແລະ ການຄ້າ, ທ່ານຮອງປະທານ ສະພາແຫ່ງຊາດ ໄດ້ເປີດໂອກາດໃຫ້ແກ່ ກະຊວງ ໄດ້ຊີ້ແຈງ-ອະທິບາຍ ຕໍ່ຄໍາຖາມເຈາະຈິ້ມຂອງສະພາແຫ່ງຊາດ ທີ່ຕິດພັນກັບບັນຫາເຄັ່ງຮ້ອນຂອງຂະແໜງການ ທີ່ສະພາແຫ່ງຊາດ ກໍຄືສັງຄົມໄດ້ເລັ່ງທວງໃຫ້ຂະແໜງການຕ້ອງໄດ້ເອົາໃຈໃສ່ແກ້ໄຂ.

ໂອກາດນີ້,  ທ່ານ ຮອງປະທານສະພາແຫ່ງຊາດ ໂອ້ລົມ ແລະ ເນັ້ນໃຫ້ກະຊວງອຸດສາຫະກໍາ ແລະ ການຄ້າ ເອົາໃຈໃສ່ໂຄສະນາເຜີຍແຜ່ນະໂຍບາຍການເຂົ້າເຖິງກອງທຶນສົ່ງເສີມ SME ໃຫ້ກວ້າງຂວາງ ແລະ ເລິກເຊິ່ງກວ່າເກົ່າ; ເພີ່ມທະວີການຊຸກຍູ້ ສົ່ງເສີມຄ່ານິຍົມໃນການຊົມໃຊ້ຜະລິດຕະພັນພາຍໃນ ແລະ ຫລຸດຜ່ອນການນໍາເຂົ້າສິນຄ້າທີ່ບໍ່ຈໍາເປັນ ໂດຍສະເພາະສິນຄ້າຟຸມເຟືອຍ; ສົ່ງເສີມການຜະລິດພາຍໃນໃຫ້ເຂັ້ມແຂງມີຕົ້ນທຶນການຜະລິດ ແລະ ຄຸນນະພາບສາມາດແກ້ງແຍ້ງແຂ່ງຂັນກັບສິນຄ້ານໍາເຂົ້າ ເພື່ອຮັບໃຊ້ພາຍໃນ ແລະ ສົ່ງເສີມການສົ່ງອອກ; ພ້ອມນັ້ນ, ກໍພິຈາລະນາມອບສິດ ແລະ ພາລະບົດບາດ ໃຫ້ແກ່ທ້ອງຖິ່ນຫລາຍຂຶ້ນ ຕາມທິດ 3 ສ້າງ ແລະ ຫັນໄປສູ່ການຄຸ້ມຄອງມະຫາພາກຢ່າງເຕັມສ່ວນ; ແລະ ເອົາໃຈໃສ່ເເກ້ໄຂຜົນການກວດສອບ ຢ່າງເປັນເຈົ້າການ ແລະ ອື່ນໆ.