ເທນ ຮາກ ຫມັ້ນໃຈຄວ້າ ເມສັນ ເມົ້າ ຮ່ວມທີມໄດ້ແນ່ນອນ

ສື່ລາຍງານວ່າ ເອຣິກ ເທນ ຮາກ ຜູ້ຈັດການທີມ ແມນເຊສເຕີ ຢູໄນເຕັດ ສະແດງຄວາມຫມັ້ນໃຈວ່າລາວຈະສາມາດໂນ້ມນ້າວໃຫ້ ເມສັນ ກອງກາງ ເຊລຊີ ຍ້າຍມາຮ່ວມທີມ ແມນເຊສເຕີ ຢູໄນເຕັດ ແລະ ເອົາຊະນະຄູ່ແຂ່ງທີ່ຢາກໄດ້ນັກເຕະນີ້ໄປຮ່ວມທີມເຊັ່ນດຽວກັນກັບ ລີເວີພູລ ແລະ ອາເຊນອລ ໄດ້.

ສຳລັບ ເມົ້າ ຕົກເປັນເປົ້າໝາຍເສີມທີມພຣີເມຍລີກ ທັງ ແມນເຊສເຕີ ຢູໄນເຕັດ, ລີເວີພູລ ແລະ ອາເຊນອລ ຫລັງສັນຍາຂອງລາວກັບເຊລຊີ ນັ້ນເຫລືອເຖິງລະດູການ 2024 ແລະ ຍັງບໍ່ມີການຂະຫຍາຍອອກໄປແຕ່ຢ່າງໃດ.

ກ່ອນໜ້ານີ້ The Athletic ເປີດເຜີຍວ່າ ດາວເຕະອາຍຸ 24 ປີລາຍນີ້ມີທ່າທີໃນການເລືອກທີ່ຈະຍ້າຍໄປຫລິ້ນໃຫ້ກັບ ແມນຢູ ຫລາຍທີ່ສຸດ ຫາກ ເຊລຊີ ຕົກລົງທີ່ປ່ອຍຕົວລາວ.

ຫລ້າສຸດ ເທເລກຣາຟ ລະບຸວ່າ ເທນ ຮາກ ເຊິ່ງຕ້ອງການນັກເຕະຕຳແໜ່ງກອງໜ້າ ແລະ ກອງກາງຫມາຍເກ 8 ມາເສີມທີມໃນຕະຫລາດນັກເຕະໜ້າຮ້ອນນີ້ ເບິ່ງວ່າ ເມົ້າ ຄືຜູ້ຫລິ້ນທີ່ເຫມາະສົມທີ່ສຸດຂອງລາວສຳລັບການເສີມແດນກາງດັ່ງກ່າວ.

ແລະ ຜູ້ຈັດການທີມອາຍຸ 53 ປີກໍສະແດງຄວາມຫມັ້ນໃຈວ່າຈະສາມາດກ່ອມໃຫ້ກອງກາງທີມຊາດອັງກິດລາຍນີ້ມາຢູ່ກັບ ແມນຢູ ແລະ ເອົາຊະນະຄູ່ແຂ່ງໃນການຊື້ຂາຍດັ່ງກ່າວຢ່າງ ລີເວີພູລ ແລະ ອາເຊນອລ.