ຈະປັບປຸງດຳລັດວ່າດ້ວຍການປະຕິບັດນະໂຍບາຍຕໍ່ຜູ້ມີຜົນງານ ແລະ ຄຸນງາມຄວາມດີ ຍ້ອນບາງມາດຕາບໍ່ສອດຄ່ອງ ແລະ ປະຕິບັດບໍ່ໄດ້

ວັນທີ 27 ພຶດສະພາ 2023 ຜ່ານມານີ້ ກະຊວງແຮງງານ ແລະ ແລະ ກະຊວງຍຕິທຳ ຮ່ວມກັນກວດກາຄວາມສອດຄ່ອງ ທາງດ້ານກົດໝາຍ ຂອງ ຮ່າງດຳລັດວ່າດ້ວຍການປະຕິບັດນະໂຍບາຍຕໍ່ຜູ້ມີຜົນງານ ແລະ ຄຸນງາມຄວາມດີ ໃນພາລະກິດຮັບໃຊ້ການປະຕິວັດຊາດ ປະຊາທິປະໄຕ ສະບັບເລກທີ 272/ລບ,  ໂດຍເປັນປະທານຮ່ວມ ຂອງ ທ່ານ ລີປາວ ຢ່າງ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຮສສ ) ແລະ ທ່ານ ກົງຈີ ຢາງຈື່ ຮອງລັດຖະມົນຕີກະຊວງຍຸຕິທຳ.

ຈຸດປະສົງ ການປັບປຸງ ຮ່າງດຳລັດວ່າດ້ວຍການປະຕິບັດນະໂຍບາຍຕໍ່ຜູ້ມີຜົນງານ ແລະ ຄຸນງາມຄວາມດີ ໃນພາລະກິດຮັບໃຊ້ການປະຕິວັດຊາດ ປະຊາທິປະໄຕ ສະບັບເລກທີ 272/ລບ ຄັ້ງນີ້; ແມ່ນເພື່ອເຮັດໃຫ້ການຈັດຕັ້ງປະຕິບັດ ນະໂຍບາຍສະແດງຄວາມກະຕັນຍູຕໍ່ຜູ້ມີຜົນງານ ແລະ ຄຸນງາມຄວາມດີໃນພາລະກິດຮັບໃຊ້ການປະຕິວັດຊາດ ປະຊາທິປະໄຕ ເຫັນວ່າມີຜົນສໍາເລັດໃນລະດັບໃດໜຶ່ງ, ແຕ່ໄປຄຽງຄູ່ກັນນັ້ນ ຍັງມີສິ່ງທາຍບາງດ້ານ ດັ່ງນີ້: ປັບປຸງບາງ ເນື້ອໃນ, ບາງມາດຕາ ຂອງດຳລັດ 272/ລບ ທີ່ຍັງເຫັນວ່າບໍ່ສອດຄ່ອງກັບເນື້ອໃນຂອງກົດໝາຍ ແລະ ດໍາລັດທີ່ກ່ຽວຂ້ອງ ໄດ້ມີການປັບປຸງ ຫຼື ສ້າງໃໝ່ ເຊັ່ນ: ຈໍານວນເນື້ອທີ່ດິນປຸກສ້າງ ແລະ ນະໂຍບາຍໂກຕ່າລົດ; ງົບປະມານແຕ່ລະປີ ບໍ່ສາມາດສະໜອງ ໃຫ້ແກ່ການປະຕິບັດນະໂຍບາຍໃຫ້ເປົ້າໝາຍ ໃນແຕ່ລະໄລຍະ ຂອງການປະຕິວັດ ເຮັດໃຫ້ການແກ້ໄຂນະໂຍບາຍຕໍ່ຜູ້ມີຜົນງານ ບໍ່ສໍາເລັດຕາມແຜນການທີ່ກຳນົດໄວ້; ການຄຸ້ມຄອງນາຍ ແລະ ພົນທະຫານ, ນາຍ ແລະ ພົນຕໍາຫຼວດທີ່ໄດ້ຮັບນະໂຍບາຍອອກພັກການ-ຮັບອຸດໜູນບໍານານ, ເສຍອົງຄະຍ້ອນການສູ້ຮົບ ແລະ ຮັັບໃຊ້ການສູ້ຮົບ ໄດ້ມີການແບ່ງຄວາມຮັບຜິດຊອບໃນການເບີ່ງແຍງດູແລໄປຕາມພາລະບົດບາດ ຂອງແຕ່ລະຂະແໜງການ.; ສະນັ້ນ ຂະບວນການປັບປຸງຮ່າງກົໝາຍດັ່ງກ່າວ, ກະຊວງແຮງງານ ແລະ ສະຫວັດດີການສັງຄົມ ໄດ້ອອກຂໍ້ຕົກລົງແຕ່ງຕັ້ງຄະນະຮັບຜິດຊອບ ໂດຍໄດ້ມີການຄົ້ນຄວ້າ, ປັບປຸງ, ປັບປ່ຽນ, ເພີ່ມເຕີມ, ຕັດອອກບາງເນື້ອໃນ, ບາງມາດຕາ ແລະ ດຳເນີນການຈັດກອງປະຊຸມທາບທາມຄໍາເຫັນຕໍ່ຮ່າງດໍາລັດ ສະບັບປັບປຸງ ຢູ່ຂັ້ນສູນກາງ ແລະ ທ້ອງຖິ່ນ 3 ຈຸດ (ແຂວງສະຫວັນນະເຂດ, ຊຽງຂວາງ ແລະ ນະຄອນຫຼວງວຽງຈັນ) ແລະ ຂັ້ນການນຳກະຊວງນອກຈາກນີ້ ກໍໄດ້ແຈ້ງການຄືນເຖິງ ພະແນກແຮງງານແຮງງານ ແລະ ສະຫວັດດີການສັງຄົມ ນະຄອນຫຼວງວຽງຈັນ ແລະ ບັນດາແຂວງ ເພື່ອຄົ້ນຄວ້າ ແລະ ປະກອບຄໍາເຫັນຄືນໃສ່ຮ່າງດຳລັດ ເພື່ອຄວາມເປັນເອກະພາບຕື່ມອີກ.