ດັບເບິນຢູໄອຈີ ນາຄາ ຄອງແຊ໋ມບານເຕະ ຢູ-10 ແລະ ຢູ-12 ມັດສະດາ ຊາເລັນ ຄັບ 2023

ສະໂມສອນ ເຍົາວະຊົນ ດັບເບິນຢູໄອຈີ ນາຄາ ສາມາດແຈ້ງເກີດ ຄວ້າແຊ໋ມການແຂ່ງຂັນເຕະບານ ມັດສະດາ ຊາເລັນ ຄັບ 2023 ເຖິງ 2 ລາຍການ ໃນຮຸ່ນອາຍຸບໍ່ເກີນ 10 ປີ ຫຼື ຢູ-10 ແລະ ຢູ-12 ຂະນະທີ່ແຊ໋ມ ຢູ-14 ແຊ໋ມ ຕົກເປັນຂອງສະໂມສອນ ຄຳໃສ.

ການແຂ່ງຂັນເຕະບານເຍົາວະຊົນ ລາຍການ Mazda Challenge Cup 2023 ຈັດຂຶ້ນ ລະຫວ່າງວັນທີ 27-28 ພຶດສະພາ 2023 ທີ່ສະໜາມກິລາແຫ່ງຊາດ (ຫຼັກ16) ນະຄອນຫຼວງວຽງຈັນ, ເປັນກຽດເຂົ້າຮ່ວມມີ ທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີ ກະຊວງສຶກສາທິການ ແລະ ກິລາ, ທ່ານ ຈັນທະວົງ ປັນຍາສີລິ ຮອງຫົວໜ້າກົມກິລາລະດັບສູງ ກະຊວງສຶກສາທິການ ແລະ ກິລາ ແລະ ທ່ານ ທິບພະເນດ ແກ້ວມະນິວົງ ປະທານບໍລິສັດ ແກ້ວໂອໂຕ ກຣຸບ ຈຳກັດ ຕົວແທນຈຳໜ່າຍລົດ Mazda ພຽງຜູ້ດຽວໃນສປປ ລາວ ທັງເປັນປະທານຈັດງານ ພ້ອມດ້ວຍຜູ້ຕາງໜ້າມາຈາກກົມກິລາມວນຊົນ, ພະລະ ແລະ ສິລະປະສຶກສາ ຕະຫຼອດຮອດບັນຄະນະນຳ, ຄູຝຶກ ແລະ ນັກກິລາ, ກອງເຊຍເຂົ້າຮ່ວມຊົມ-ເຊຍຢ່າງຫຼວງຫຼາຍ ແລະ ຄຶກຄື້ນ.

ການແຂ່ງຂັນເຕະບານ Mazda Challenge Cup 2023 ຈັດຂຶ້ນ ກໍເພື່ອເປັນການສົ່ງເສີມຫຼານນ້ອຍເຍົາວະຊົນລາວ ໃຫ້ມີການເຄື່ອນໄຫວພັດທະນາຢ່າງຕໍ່ເນື່ອງ ເພື່ອກ້າວສູ່ການເປັນນັກກິລາອາຊີບ ໃນອະນາຄົດ ຊຶ່ງມີນັກກິລາເຂົ້າຮ່ວມ ຈຳນວນ 1 ພັນກວ່າຄົນ ສະເພາະ ຢູ-10 ປີ ມີ 10 ທີມເຂົ້າຮ່ວມ ແບ່ງເປັນ 2 ກຸ່ມ ກໍຄື ກຸ່ມ A ມີ ເອັບເຮັດແອວ, ພີເຄພີ ຈາກແຂວງຫຼວງພະບາງ, ມັດສະດາ ລາວ ຈີບີ ເອັບຊີ ທີມ ບີ, ວອນທະບິງ ອາຄາເດມີ ຈາກແຂວງຫຼວງພະບາງ ແລະ ທີມ ເດັກພວນ ອາຄາເດມີ ຈາກແຂວງຊຽງຂວາງ; ສ່ວນ ກຸ່ມ B ມີ ມັດສະດາ ລາວ ຈີບີ ເອັບຊີ ທີມ ເອ, ດັບເບິນຢູໄອຈີ ນາຄາ, ບີບີບີ ໂອໂຕ ເອັບຊີ, ມາດເຕີ ເຊເວັນ ເອັບຊີ ແລະ ວຽງຈັນ ເອັບທີ.

ສ່ວນ ຢູ-12 ມີ 16 ທີມ ແບ່ງເປັນ 4 ກຸ່ມ ກໍຄື ກຸ່ມ A ມີ ເອັດແອວ ອາຄາເດມີ ແຂວງອຸດົມໄຊ, ຈະຕຸຣາເທບ ອາຄາເດມີ ຈາກໄທ, ຈຳປາຮັກ ທີມ ເອ ແລະ ໂກເດັນບອຍ ທີມ ບີ ຈາກໄທ; ກຸ່ມ B ພີເຄ ອາຄາເດມີ ຈາກແຂວງໄຊຍະບູລີ, ວອນທະບິງ, ມາດເຕີ ເຊເວັນ ເອັບຊີ, ໂກເດັນບອຍ ທີມ ເອ; ກຸ່ມ ຊີ ຈຳປາຮັກ ທີມ ບີ, ບີບີບີ ໂອໂຕ ເອັບຊີ, ວຽງຈັນ ເອັບທີ, ມັດສະດາ ລາວ ຈີບີ ເອັບຊີ ທີມ ເອ; ກຸ່ມ ດີ ດັບເບິນຢູໄອຈີ ນາຄາ, ດີເຄ ເອັບຊີ, ເດັກພວນ ແລະ ພີເຄພີ ຈາກແຂວງຫຼວງພະບາງ; ຢູ-14 ປີ ມີ 13 ທີມ ແບ່ງເປັນ 4 ກຸ່ມ ກໍຄື ກຸ່ມ A ມີ ວຽງຈັນ ເອັບທີ, ມັດສະດາ ລາວ ຈີບີ ເອັບຊີ ທີມ ບີ ແລະ ຈຳປາຮັກ ເອັບຊີ; ກຸ່ມ ບີ ມັດສະດາ ລາວ ຈີບີ ເອັບຊີ ທີມ ເອ, ເອັບເຮັດແອວ, ຊຸບເປີ ສະຕາ; ກຸ່ມ ຊີ ເອັດແອວ ອາຄາເດມີ ແຂວງອຸດົມໄຊ, ໂກເດັນບອຍ ຈາກໄທ, ຄຳໃສ ເອັບຊີ; ກຸ່ມ ດີ ເອສຣາ, ພີເຄພີ ຈາກແຂວງຫຼວງພະບາງ, ວອນທະບິງ ແລະ ປາກຊັນ ເອັບຊີ ຈາກແຂວງບໍລິຄຳໄຊ.

ຜ່ານການແຂ່ງຂັນໃນໄລຍະສອງວັນດັ່ງກ່າວ ຜົນປະກົດວ່າ: ແຊ໋ມ ຢູ-10 ເປັນຂອງ ດັບເບິນຢູ ໄອຈີ ນາຄາ ໄດ້ຮັບຂັນແຊ໋ມ, ຫຼຽນລາງວັນ ແລະ ເງິນສົດ 5 ລ້ນກີບ, ຮອງຊະນະເລີດ ພີເຄພີ ແຂວງຫຼວງພະບາງ ໄດ້ຮັບເງິນສົດ 3 ລ້ານກີບ ແລະ ອັນດັບທີ 3 ມັດສະດາ ລາວ ຈີບີ ທີມເອ ໄດ້ຮັບເງິນສົດ 1 ລ້ານກີບ. ສ່ວນແຊ໋ມ ຢູ-12 ເປັນຂອງ ດັບເບິນຢູໄອຈີ ນາຄາ ໄດ້ຮັບຂັນແຊ໋ມ, ຫຼຽນລາງວັນ ແລະ ເງິນສົດ 5 ລ້ນກີບ, ຮອງຊະນະເລີດ ພີເຄພີ ຈາກແຂວງຫຼວງພະບາງ ໄດ້ຮັບເງິນສົດ 3 ລ້ນກີບ ແລະ ອັນດັບທີ 3 ໂກນເດັນບອຍ ທີມບີ ຈາກໄທ ໄດ້ຮັບເງິນສົດ 1 ລ້ານກີບ. ຂະນະທີ່ແຊ໋ມ ຢູ-14 ເປັນຂອງ ຄຳໃສ ເອັບຊີ ໄດ້ຮັບຂັນແຊ໋ມ, ຫຼຽນລາງວັນ ແລະ ເງິນສົດ 5 ລ້ານກີບ, ຮອງຊະນະເລີດ ວອນທະບິງ ອາຄາເດມີ ຈາກແຂວງຫຼວງພະບາງ ໄດ້ຮັບເງິນສົດ 3 ລ້ານກີບ ແລະ ອັນດັບທີ 3 ມັດສະດາ ລາວ ຈີບີ ເອັບຊີ ໄດ້ຮັບເງິນສົດ 1 ລ້ານກີບ. ນອກຈາກລາງວັນດັ່ງກ່າວ ກໍຍັງມີລາງວັນນັກກິລາດີເດັ່ນແຕ່ລະຮຸ່ນອີກດ້ວຍ ສະເພາະລາງວັນຂອງ ຢູ-10 ກໍຄື ປະຕູດີເດັ່ນ ເປັນຂອງ ພີເຄພີ, ນັກກິລາດີເດັ່ນ ເປັນຂອງ ດັບເບິນຢູ ໄອຈີ ນາຄາ ແລະ ຄູຝຶກດີເດັ່ນກໍເປັນຂອງ ດັບເບິນຢູ ໄອຈີ ນາຄາ. ສ່ວນ ຢູ-12 ປະຕູດີເດັ່ນ ເປັນຂອງ ດັບເບິນຢູ ໄອຈີ ນາຄາ, ນັກກິລາດີເດັ່ນ ເປັນຂອງ ດັບເບິນຢູ ໄອຈີ ນາຄາ ແລະ ຄູຝຶກດີເດັ່ນ ເປັນຂອງ ພີເຄພີ ແລະ ຢູ-14 ປະຕູດີເດັ່ນ ເປັນຂອງ ມັດສະດາ ລາວ ຈີບີ ເອັບຊີ, ນັກກິລາດີເດັ່ນ ເປັນຂອງ ຄຳໃສ ເອັບຊີ ແລະ ຄູຝຶກດີເດັ່ນກໍເປັນຂອງ ວອນທະບິງ ອະຄາເດມີ.

ຂໍ້ມູນ-ຮູບພາບ: ໜັງສືພິມສຶກສາ-ກິລາລາຍວັນ