ນາຍົກ ພົບປະໂອ້ລົມປະຊາຊົນກຸ່ມບ້ານນໍ້າຊຸ ເມືອງຊານໄຊ ແຂວງອັດຕະປື ແລະ ມອບເງິນຊ່ວຍ ເຫລືອໃຫ້ບ້ານລະ 10 ລ້ານກີບ ຈຳນວນ 10 ບ້ານ

ວັນທີ 29 ພຶດສະພາ 2023, ທ່ານ ສອນໄຊ ສີພັນດອນ ນາຍົກລັດຖະມົນຕີ ພ້ອມຄະນະ ໄດ້ເຄື່ອນໄຫວຢ້ຽມຢາມ ແລະ ພົບປະໂອ້ລົມ ປະຊາຊົນກຸ່ມບ້ານນໍ້າຊຸ ເມືອງຊານໄຊ ແຂວງອັດຕະປື, ຕ້ອນຮັບໂດຍ ທ່ານ ສຸວັນສີ ແກ້ວວິເສີດ ເຈົ້າເມືອງຊານໄຊ ພ້ອມດ້ວຍຄະນະນຳຂອງເມືອງ. ເຊິ່ງທ່ານນາຍົກລັດຖະມົົນຕີ ໄດ້ເປີດກວ້າງໃຫ້ຜູ້ເຂົ້າຮ່ວມ ໄດ້ສະເໜີ ແລະ ປະກອບຄຳຄິດເຫັນ ຕໍ່ການປົກປັກຮັກສາ ແລະ ສ້າງສາພັດທະນາປະເທດຊາດ ກໍຄື ບ້ານເມືອງຂອງຕົນ.

ທ່ານນາຍົກລັດຖະມົົນຕີ ໄດ້ຢ້ຽມຢາມຖາມຂ່າວ ເຖິງການດຳລົງຊີວິດຂອງປະຊາຊົນ ແລະ ສະແດງຄວາມຊົມເຊີຍຕໍ່ຜົນສຳເລັດ ທີ່ອົງການປົກຄອງທຸກຂັ້ນ ພາຍໃນເມືອງຊານໄຊ ສາມາດຍາດມາໄດ້ ໃນໄລຍະທຜ່ານມາ, ພ້ອມທັງໄດ້ຍົກໃຫ້ເຫັນສະພາບການພົ້ນເດັ່ນທີ່ເກີດຂຶ້ນຢູ່ພາຍໃນ ແລະ ຕ່າງປະເທດ, ລວມທັງສະພາບການພັດທະນາເສດຖະກິດ-ສັງຄົມ ຂອງປະເທດເຮົາໃນປັດຈຸບັນ ໂດຍສະເພາະ ບັນດາຂໍ້ສະດວກ, ຂໍ້ຫຍຸ້ງຍາກ ແລະ ສິ່ງທ້າທາຍຕ່າງໆ ຕະຫລອດຮອດຄວາມພະຍາຍາມ ແລະ ເອົາໃຈໃສ່ ຂອງພັກ ແລະ ລັດຖະບານ ກໍຄື ອົງການປົກຄອງຂັ້ນຕ່າງໆ. ພ້ອມນີ້, ທ່ານຍັງໄດ້ເນັ້ນໃຫ້ເອົາໃຈໃສ່ຕື່ມບາງດ້ານ ເປັນຕົ້ນໃຫ້ຂະແໜງການກ່ຽວຂ້ອງຂອງແຂວງ ແລະ ເມືອງ ສົມທົບກັນກວດກາ ແລະ ຈັດສັັນພື້ນທີ່ທຳການຜະລິດ ໃຫ້ແກ່ປະຊາຊົນ, ພ້ອມທັງ ມີການຊຸກຍູ້ສົ່ງເສີມເຂົາເຈົ້າ ທຳການຜະລິດ ຕາມທ່າແຮງຂອງບ້ານ, ສ້າງເງື່ອນໄຂໃຫ້ປະຊາຊົນ ມີວຽກເຮັດງານທຳ, ມີອາຊີບຖາວອນ, ມີລາຍຮັບ, ຊີວິດການເປັນຢູ່ ນັບມື້ໄດ້ຮັບການປັບປຸງດີຂຶ້ນ ເປັນກ້າວໆ.

ຄຽງຄູ່ກັນນັ້ນ, ກໍສືບຕໍ່ປະຕິບັດແຜນການອອກໃບຕາດິນ ໃຫ້ປະຊາຊົນ ໃຫ້ມີຄວາມຄືບໜ້າໄວ; ໃຫ້ຂະແໜງການເງິນ ເອົາໃຈໃສ່ຈັດເກັບລາຍຮັບເຂົ້າງົບປະມານແຫ່ງລັດໃຫ້ຄົບຖ້ວນ, ໂປ່ງໄສ ແລະ ສຳເລັດຕາມຄາດໝາຍທີ່ກຳນົດໄວ້; ສືບຕໍ່ປະຕິບັດກົດໝາຍ ແລະ ລະບຽບການ ທີ່ກ່ຽວຂ້ອງກັບທ້ອງຖິ່ນເປັນສ່ວນໃຫຍ່ໃຫ້ເຂັ້ມງວດ ໂດຍສະເພາ ກົດໝາຍວ່າດ້ວຍປ່າໄມ້, ກົດໝາຍວ່າດ້ວຍທີ່ດິນ, ກົດໝາຍວ່າດ້ວຍສິ່ງແວດລ້ອມ; ເອົາໃຈໃສ່ປະຕິບັດ ວຽກງານປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານໃຫ້ແຂງແຮງ ແລະ ເລິກເຊິ່ງ ເພື່ອຕ້ານ ແລະ ສະກັດກັ້ນປະກົດການຫຍໍ້ທໍ້ຕ່າງໆ ເປັນຕົ້ນ ບັນຫາຢາເສບຕິດ, ຂີ້ລັກ ແລະ ອື່ນໆ; ສືບຕໍ່ປັບປຸງການຈັດຕັ້ງບ້ານ ຕາມ 5 ໜ່ວຍງານ ໃຫ້ມີຄວາມເຂັ້ມແຂງ, ປະຕິບັດໜ້າທີ່ວຽກງານ ມີປະສິດທິພາບ ແລະ ປະສິດທິຜົນ; ບໍລິໂພກຂໍ້ມູນຂ່າວສານ ຜ່ານສື່ສັງຄົມອອນລາຍ ຢ່າງມີສະຕິ, ມີເຫດມີຜົນ, ສາມາດຈຳແນກມິດ ແລະ ສັດຕູ ໄດ້ຢ່າງຈະແຈ້ງ.

ໃນມື້ດຽວກັນ, ທ່ານນາຍົກລັດຖະມົນຕີ ພ້ອມຄະນະຍັງໄດ້ໄປຢ້ຽມຢາມໂຄງການຊົນລະ ປະທານ ທີ່ນຳໃຊ້ນໍ້າທ້າຍເຂື່ອນເຊປຽນ-ເຊນໍ້ານ້ອຍ ຢູ່ເຂດບ້ານລະຍາວໃຕ້ ເມືອງສາມັກຄີໄຊ ເພື່ອຊຸກຍູ້ການສະໜອງ ແລະ ຊົມໃຊ້ນໍ້າຊົນລະປະທານດັ່ງກ່າວ ເຂົ້າໃນການຜະລິດຂອງປະຊາຊົນ ໃຫ້ເປັນຂະບວນການ ແລະ ເກີດປະໂຫຍດສູງສຸດ ຕື່ມອີກ.

ຂ່າວ: ແຂວງອັດຕະປື