ອາເມລິກາ ແລະ ຊາອຸດິອາຣະບີ ຮຽກຮ້ອງສອງກຸ່ມທະຫານຊູດັງ ຕໍ່ເວລາຢຸດຍິງຮອບໃໝ່ ເປີດທາງສູ່ການຊ່ວຍເຫລືອທາງມະນຸດສະທໍາເພີ່ມຕື່ມ

ອາເມລິກາ ແລະ ຊາອຸດິອາຣະບີ ອອກມາຮຽກຮ້ອງໃຫ້ສອງກຸ່ມທະຫານຊູດັງຂະຫຍາຍໄລຍະເວລາຢຸດຍິງ ຫລັງຈາກການສູ້ຮົບຂອງທັງສອງຝ່າຍໄດ້ເຮັດໃຫ້ນະຄອນຫລວງຄາທູມ ແລະ ພື້ນທີ່ອື່ນໆ ມີສະພາບບໍ່ຕ່າງຈາກສະໜາມຮົບມາເປັນເດືອນແລ້ວ.

ໃນຖະແຫລງການຮ່ວມທີ່ອອກມາໃນວັນທີ 28 ພຶດສະພາ, ເຈົ້າໜ້າທີ່ຂອງອາເມລິກາ ແລະ ຊາອຸດິອາຣະບີຮຽກຮ້ອງໃຫ້ກອງທັບຊູດັງ ແລະ ກອງກໍາລັງເຄິ່ງທະຫານ Rapid Support Forcess (RSF) ຕໍ່ເວລາຂໍ້ຕົກລົງຢຸດຍິງຮອບປັດຈຸບັນ ເຊິ່ງມີກໍານົດຈະສິ້ນສຸດລົງໃນເວລາ 21:45 ໂມງ ຂອງວັນທີ 29 ພຶດສະພາ ຕາມເວລາທ້ອງຖິ່ນ ເພື່ອຊ່ວຍເປີດທາງໃຫ້ອົງກອນຕ່າງໆໃຫ້ການຊ່ວຍເຫລືອດ້ານມະນຸດສະທໍາແກ່ຊາວຊູດັງໄດ້.

ການປະທະກັນລະຫວ່າງສອງກຸ່ມທະຫານຊູດັງເກີດຂຶ້ນນັບແຕ່ວັນທີ 15 ເມສາຜ່ານມາ ຈາກການຍາດຊີງອໍານາດລະຫວ່າງ ພົນເອກ ອັບເດລ ຟັດຕາ ອັລ-ບູຮານ ຜູ້ນໍາຄະນະລັດຖະປະຫານໃນປີ 2019 ແລະ ຜູ້ບັນຊາການກອງທັບຊູດັງ ກັບ ພົນເອກ ໂມຮາເໝັດ ຮໍາດັນ ດາກາໂລ ຜູ້ບັນຊາການກອງກໍາລັງ RSF ສົ່ງຜົນໃຫ້ມີຜູ້ເສຍຊີວິດຫລາຍຮ້ອຍຄົນ, ສ່ວນຜູ້ບາດເຈັບມີຫລັກພັນຄົນ ແລະ ເຮັດໃຫ້ປະເທດຢູ່ໃນສະພາບໃກ້ລົ້ມສະລາຍ ໂດຍປັດຈຸບັນມີປະຊາຊົນຊາວຊູດັງເກືອບ 1,4 ລ້ານຄົນຕ້ອງອົບພະຍົບຍ້າຍຖິ່ນ ເນື່ອງຈາກສະພາບບໍ່ມີຄວາມປອດໄພໃນຊີວິດ.

ອ້າງອີງ:

http://www.aljazeera.com/…/us-saudi-arabia-call-for…

http://www.reuters.com/…/us-saudi-arabia-call-extended…/