ອິນເດຍສັ່ງພັກວຽກເຈົ້າໜ້າທີ່ລັດ ຫລັງສັ່ງສູບນໍ້າອອກຈາກເຂື່ອນ ເພື່ອຫາໂທລະສັບມືຖືທີ່ຕົກລົງໄປ

ທາງການອິນເດຍສັ່ງພັກວຽກເຈົ້າໜ້າທີ່ລັດທີ່ເຮັດໂທລະສັບມືຖືຕົກລົງໄປໃນນໍ້າໃນເວລາຖ່າຍຮູບຢູ່ເຂື່ອນແຫ່ງໜຶ່ງໃນລັດສັດຕີຄໍຂອງອິນເດຍ ເຮັດໃຫ້ທ່ານຕັດສິນໃຈສັ່ງສູບນໍ້າຫລາຍລ້ານລິດອອກຈາກເຂື່ອນດັ່ງກ່າວເພື່ອຊອກຫາໂທລະສັບມືຖືທີ່ຕົກລົງໄປ ກ່ອນຈະໃຊ້ເວລາດົນກວ່າ 3 ວັນ ຈຶ່ງຈະເຫັນໂທລະສັບມືຖື.

ເຈົ້າໜ້າທີ່ລັດຄົນດັ່ງກ່າວອ້າງວ່າໂທລະສັບມືຖືໜ່ວຍດັ່ງກ່າວບັນທຶກຂໍ້ມູນສໍາຄັນ ແລະ ອ່າວລະອຽດອ່ອນຂອງລັດຖະບານທ້ອງຖິ່ນເອົາໄວ້ ຈຶ່ງມີຄວາມຈໍາເປັນຈະຕ້ອງເກັບກູ້ໂທລະສັບມືຖືເຄື່ອງນີ້ຂຶ້ນມາຈາກເຂື່ອນ. ເຖິງຢ່າງໃດກໍຕາມ, ທ່ານໄດ້ຮັບສຽງວິພາກວິຈານໃນບັນຫາທີ່ໃຊ້ອໍານາດໜ້າທີ່ໃນທາງບໍ່ຖືກຕ້ອງ ກ່ອນຈະຖືກໜ່ວຍງານຕົ້ນສັງກັດສັ່ງພັກວຽກ.

ນອກຈາກນີ້, ເຈົ້າໜ້າທີ່ຄົນດັ່ງກ່າວຍັງອ້າງວ່າ: ລາວພະຍາຍາມເກັບກູ້ໂທລະສັບມືຖືທີ່ຕົກລົງໄປໂດຍການຂໍການຊ່ວຍເຫລືອຈາກທີມນັກດໍານໍ້າທ້ອງຖິ່ນແລ້ວ, ແຕ່ບໍ່ປະສົບຜົນສໍາເລັດ ລາວຈຶ່ງຕັດສິນໃຈເລືອກໃຊ້ວິທີສູບນໍ້າອອກຈາກເຂື່ອນແຫ່ງນີ້ ໂດຍລາວຍັງອ້າງອີກວ່າ: ລາວໄດ້ຮັບອະນຸຍາດທາງວາຈາຈາກເຈົ້າໜ້າທີ່ຮັບຜິດຊອບໃຫ້ສາມາດລະບາຍນໍ້າອອກຈາກເຂື່ອນໄປຫາຄອງນໍ້າທີ່ຢູ່ໃກ້ຄຽງ. ພ້ອມກ່າວອີກວ່າ: ສິ່ງທີ່ລາວເຮັດຍັງພໍຈະເປັນປະໂຫຍດຕໍ່ພີ່ນ້ອງກະສິກໍາໃນພື້ນທີ່ໃກ້ຄຽງ.

ທາງການທ້ອງຖິ່ນມີຄໍາສັ່ງໃຫ້ຢຸດພາລະກິດສູບນໍ້າອອກຈາກເຂື່ອນ ຫລັງໄດ້ຮັບການຮ້ອງຮຽນໂດຍເຈົ້າໜ້າທີ່ເບິ່ງແຍງຮັບຜິດຊອບບັນຫານີ້ເປີດເຜີຍວ່າ: ເຈົ້າໜ້າທີ່ຄົນດັ່ງກ່າວຈະຖືກສັ່ງພັກວຽກຈົນກວ່າຈະມີການສືບສວນບັນຫານີ້ໃຫ້ສໍາເລັດ ເນື່ອງຈາກນໍ້າຖືເປັນຊັບພະຍາກອນທີ່ມີຄວາມສໍາຄັນຫລາຍ ແລະ ຈະປ່ອຍໃຫ້ສູນຫາຍໄປແບບນີ້ບໍ່ໄດ້.