ທາງການຟີລິບປິນ ສັ່ງປິດໂຮງຮຽນ-ຍົກເລີກຖ້ຽວບິນ ກຽມຮັບມືກັບພາຍຸໄຕ້ຝຸ່ນ ມາວາ

ສຳນັກຂ່າວຕ່າງປະເທດລາຍງານຈາກນະຄອນຫລວງມະນີລາ ປະເທດຟີລິບປິນ ໃນວັນທີ 28 ພຶດສະພາ 2023 ຜ່ານມາວ່າ: ສຳນັກງານອຸຕຸນິຍົມວິທະຍາແຫ່ງຊາດຟີລິບປິນ ລາຍງານວ່າໄຕ້ຝຸ່ນມາວາເຄື່ອນຕົວຈາກພາກຕາເວັນອອກຂອງເກາະລູຊອນ ເຊິ່ງເປັນເກາະທີ່ໃຫຍ່ທີ່ສຸດ ຢູ່ທາງພາກເໜືອຂອງຟີລິບປິນ ປະມານ 895 ກິໂລແມັດດ້ວຍຄວາມໄວລົມສູງສຸດໃກ້ສູນກາງ 175 ກິໂລແມັດ/ຊົ່ວໂມງ.

ເຖິງພາຍຸຈະບໍ່ຂຶ້ນຝັ່ງທີ່ຟີລິບປິນ ແຕ່ຄວາມຮຸນແຮງເມື່ອພັດຜ່ານຈະສົ່ງຜົນໃຫ້ເກີດຝົນຕົກໜັກ ແລະ ລົມພັດແຮງ, ຂະນະທີ່ 4 ແຂວງໃນເກະລູຊອນ ໄດ້ປະກາດປິດໂຮງຮຽນໃນພື້ນທີ່, ດ້ານ ຟີລິບປິນແອລາຍ ສາຍການບິນແຫ່ງຊາດຟີລິບປິນ ຍົກເລີກຖ້ຽວບິນພາຍໃນປະເທດ ເຂົ້າ-ອອກນະຄອນຫລວງມະນີລາ ຢ່າງໜ້ອຍ 8 ຖ້ຽວ ລະຫວ່າງວັນທີ 29-31 ພຶດສະພາ ນີ້.